Read Hatam NEHEI LEUSI 36 Bible Online

NEHEI LEUSI 36 - Hatam bible

NEHEI LEUSI 36

¹Bezaleel kin Oholiab kin tukan nindigsi nya di TUHAN sindem tut yok biyai ningon di ki biyok ba, ibon mun di ibohok TUHAN De Prak Meng bou inda him kan cem ri. Suar yoni igyai kep midyai dima bit leu nok TUHAN nicuk yokti tu.”

²Lene Musa hig Bezaleel kin Oholiab kin tukan nindigsi di TUHAN sindem tut yok di ijoi sut igyai kep midyai dima yahagom kwei leu api cuk yok ba, ikinyon eisi.

³Ba, Musa kes ndigban di mben Israel ikwas tut Allah mem gima ibohok Nide Prak Meng hagom ei tukan dima yok indati. Noro mben Israel ikum eisi bu bikwop njap bipwoi ndigban di ikwas tut Allah dor njiriek bu kwei tu

⁴Gima rino tukan di igyai kep midyai yuug ba,

⁵ipai sut bak Musa “Ade limwa nya ipwoi ndigban di ikwas tut Allah bidor njiriek leu ade nicuk yokti mem midyai dini kwei tu.”

⁶Nok rino Musa sok nihyet bak mben Israel ei ide prak meng yati leu binhyepo ikes hon ba, ipwoi ndigban di ikwas tut TUHAN mem Nide Prak Meng dima kwei bu au. Lene yoni ipwoi ndigban hi kwei bu bi.

⁷Mun di ikwas tut Allah tu midem mem midyai dima ba, put lene niken mijo.

⁸Lene yo di ingon ki dor njiriek nindigsi pima yohok TUHAN De Prak Meng. Igyai minyahas linen di dia-diau kei ninghas simnai di iba mong wol di nimmun kin nghei nta kin gi ningwoi ba, ibibien kerub[20] nya ingwes bidis yam kikau ei nahacanti.

⁹Bikwop ninghas dima yok hagom noyam ba, nijeisi meter simnaibrimigcan lene ninyanti meter can.

¹⁰Inap ninghas muhwi kin yam nok nititut yam di jei bibor gom lene inap nindigsi ninghas muhwi kin yam nok gi pima cem bu.

¹¹Lene ibien nibisrousi nya ei ninghas him.

¹²Ibien nibisrousi ningot muhwi ei nititut yam gom ninghas him lene nok gima cem mem nititut yam gom kin bu ninghas him.

¹³Lene iba mas bibon mun di buhum kin yam ningat ningot muhwi leu binhyepo ibuhum minyahas nititut yam dima hacem kin yam nok gom.

¹⁴Lene iba kambir nta bibien prak meng simnaibrimiggom bu leu binhyepo ibinggai kep Prak Meng dima.

¹⁵Lene ibien hagom noyam ba, nijeisi meter simnaimuhwidip ba, ninyanti meter can.

¹⁶Lene inap prak meng dini yok nimeng muhwi kin yam ba, nok nititut yam di jei bibor gom lene inap nindigsi nimeng muhwindagom kin yam ba, nok nititut yam di jei bibor gom bu. Lene ikrop nimeng gi nimuhwindagom kin yam mem gima ipindur ei Prak Meng nuhui.

¹⁷Lene ibien nibisrousi nya ningot muhwi kin nititut yam gi nigom ninghas him lene ibien ningot muhwi kin bu kin nititut yam gi nican ninghas him.

¹⁸Lene iba ngkimom-tembaga bibon mun di buhum nititut yam dini hacem kin yam nok gom.

¹⁹Lene iba domba nikre ningkek di ningwoi kin mindhe hiter ningkek di kei bibor kei bibon prak meng nimeng can kin bu mem gima ibimie kep Prak Meng bu.

²⁰Iba biei meng dia bibon biei kibi nya bibingon nok ig hyei mem Prak Meng.

²¹Ibon biei kibi dima nanaisi meter bitai ba, ninyanti senti ningot muhwindagom ba, muhwindagom.

²²Icim mun di nok keu di sren ningat can eisi bidem biei kibi nya hagom leu binhyepo bindei binut nikiou nya.

²³Ibon biei kibi ningat ningot can mem ighyei ei nite di ndam mpia nibiho.

²⁴Lene iba perak bibon nikiou nya ningot bitai mem biei kibi dima ba, ningat can mem bikwop biei kibi gom lene nok. Ibicim keu di sren gom ei nikiou gom, gom ei nikiou gom lene nok.

²⁵Lene ibon biei kibi ningat ningot can mem ighyei nite bei mpia nijjai bu.

²⁶Kin nikiou perak ningat ningot bitai ba, ningat can bikwop biei kibi gom lene nok.

²⁷Lene ibon biei kibi ningat muhwindagom mem ig hyei ei nite di ndam mpia nikimbasti bu.

²⁸Lene ibon biei kibi ningat can bu mem ig nuhuisi.

²⁹Lene ibon mun di pek biei kibi ningat can di jo hammi nuhuisi kin yam ei nitriti kui kikau ug bipek ninggrupti. Ibindei biei kibi mem ig hyei di jo hammi nuhuisi hacem rap yam nok gima.

³⁰Gima rino ig hyei ei nite dima kwei bon biei kibi ningat muhwindaningai tut nikiou nya ningat simnaimuhwidip brimigtehigom di iba perak bibon ba, nikiou ningat can mem biei kibi ningat gom lene nok.

³¹Lene iba biei meng dia bibon biei njiti di jei bibor ningat simnaimuhwidip. Ningat muhwi mem ig hyei ei nite hi,

³²lene ningat muhwi mem ig hyei ei nite hi bu. Lene ningat muhwi mem ig hyei ei nite di ndam mpia nikimbasti bu.

³³Ingot biei njiti kin biei kibi pima ei nahacanti sur yam leu Prak Meng dima nuhuisi kikau ug bipek nuhuisi gi nite hi bu.

³⁴Lene iba mas ibinggai kep biei kibi nya kin biei njiti nya hagom. Lene iba mas bibon srak mem gima isu biei njiti nya eisi.

³⁵Lene igyai minyahas linen di dia-diau kei bu mem ban mbrawin ba, ibien mong wol nimmun kin nghei nta kin gi ningwoi eisi. Lene ibien kerub[21] nya ingwes eisi bidis yam kikau ei nahacanti.

³⁶Lene ipindur ban mbrawin dini ei paku mas ningat bitaisi di ipek kin cou ninjem bitai di iba biei meng dia bibon. Iba mas binggai kep cou dini yok leu api ita hagom ei nikiou nya di iba perak bibon.

³⁷Lene ibon ninghas gom kin bu mem gima ipindur ser dimbou huigya. Iba minyahas linen di dia-diau kei bibon ninghas dini ba, ibien mong wol di nimmun kin nghei nta kin gi ningwoi eisi. Lene ibien ninghas him nya cem bu.

³⁸Lene iba biei meng dia bibon cou ningat muhwi mem ninghas dini lene iba mas bibon nikoisi nya cem. Lene iba mas binggai kep ninggrupti nya kin nide bot nya cem. Lene iba ngkimom-tembaga bibon nikiou nya ningat muhwi.