Read Hatam NEHEI LEUSI 37 Bible Online

NEHEI LEUSI 37 - Hatam bible

NEHEI LEUSI 37

¹Lene Bezaleel ba biei meng dia nisra bibon Brua Gi Preu di nijeisi senti sratus gom ba, simnai lene ninyanti kin nanaisi senti ningot muhwindagom ba, muhwindagom.

²Lene noni ba mas binggai kep bei ninsi ba, bei nisai cem. Lene noni ba mas hi kin bu bimau ninghas him nya.

³Lene noni ba mas bibon srak ningat bitai leu api bicim kin brua nuhuisi leu binhyepo ibikon. Cim srak can ei nite hi lene cim srak can ei nite hi.

⁴Lene noni ba biei meng dia bibon ug ningat can lene ba mas binggai kep.

⁵Lene noni su ug dima hacem kak srak ninsi ba, ug gom ei nite hi lene gom ei nite hi.

⁶Lene noni ba mas bibon nibeng ba, nijeisi senti sratus gom ba, simnai lene ninyanti senti ningot muhwindagom ba, muhwindagom.

⁷Lene noni ba mas di itug bidile bibon kerub.[22]

⁸Lene kerub hacem rap nibeng bingkiem bibor ba, hi ya ei niyenti gom lene hi ya ei niyenti gom bu.

⁹Lene noni kiek kerub dima hacem noho birok yam ba, ikieng inyehei gau brua nibenga.

¹⁰Lene Bezaleel ba biei meng dia nisra bibon meja gom di nijeisi senti ningot muhwindaningai ba, muhwindaningai lene ninyanti senti ningot bitai ba, bitai lene nanaisi senti ningot muhwindagom ba, muhwindagom.

¹¹Lene noni ba mas binggai kep hagom lene ba mas hi kin bu bimau ninghas him nya.

¹²Lene noni bibon biei njiti di ninyanti senti muhwindacan biniken bijo sir meja ninghas him nya leu api ba mas hi kin bu bimau biei njiti dima ninghas him nya.

¹³Lene noni ba mas bibon srak bitai leu api bicim kin meja nuhuisi bitai hammi nimig nicimti nya.

¹⁴Srak dima yok rimem gima isu ug eisi mem gima ibikon meja dima.

¹⁵Lene noni ba biei meng dia bibon ug hacem leu api ba mas binggai kep.

¹⁶Lene noni ba mas bibon den kin mok kin ampou kin bokor nya mem ba anggur ngei di ikwas tut Allah.

¹⁷Lene Bezaleel ba mas bibon mini njeng nidihim. Noni ba mas di itug bidile bibon nikiou kin nikrausi. Lene noni ba bunggan nya bitut nitou nya kin nimar di noni ba mas bibon bimau ningat ba, hagom cim nikiou kin nikrausi nok gom.

¹⁸Noni bon ninda muhwindagom ba, ninda ningai ntun nidihim nite hi him lene ninda ningai ntun nidihim nite hi him.

¹⁹Lene noni ba bunggan badam ningat ningai bitut nimpung kin nimar bimau bikwop ninda-nda hagom noyam.

²⁰Lene noni ba bunggan badam pima ningat bitai bitut nimpung kin nimar bimau nidihim cem.

²¹Lene noni ba nimpung gom bimau bikwop ninda hagom di ntun him nibehei.

²²Gima rino noni ba mas di itug bidile ninggop gom bibon mini njeng nidihim dima bitut nimpung nya kin ninda nya hagom.

²³Lene noni bon mini njeng ningat muhwindacan bikes hagom bijo ei ninda ninggrupti nya. Lene ba mas bibon mun di ibicok mini njeng nipu kin mun di bindei mu ninjeng nya.

²⁴Noni ba mas kilo ningot ningai ba, muhwi bibon mini njeng nidihim bitut nimbumbati nya hagom.

²⁵Lene Bezaleel ba biei meng dia nisra bibon nimbar hum dok mem gima indig biei nggrai di ui-gwang kei nipriot eisi. Ba, nijeisi kin ninyanti noyam ba, hacem senti ningot bitai ba, muhwi. Lene nanaisi senti ningot muhwindatai. Lene noni bibon ninggai nya di tug nuhuisi bitai bingkiem.

²⁶Lene noni ba mas binggai kep nidip kin nitta-tta nya kin ninggai nya lene ba mas hi kin bu bimau ninghas him nya cem.

²⁷Lene noni ba mas bibon srak ningat can bicim ninghas him nibehei ei nite hi lene ningat can ei nite hi leu binhyepo isu ug nya di ibikon nimbar dima eisi.

²⁸Lene noni ba biei meng dia bibon ug nya lene ba mas binggai kep.

²⁹ Lene Bezaleel bon mini nibon midut kin biei nggrai di ui-gwang kei di noyam kin mini ibou mem nimbar hum dok.