Read Hatam NEHEI LEUSI 39 Bible Online

NEHEI LEUSI 39 - Hatam bible

NEHEI LEUSI 39

¹Lene Bezaleel kin Oholiab iba minyahas wol di nimmun kin nghei nta kin gi ningwoi binap sinsun nibon midut mem gima imam nya ijuk ei yokti tirigi igyai kep midyai nok imam ei Ninsi Di Kwes. Inap sinsun dini mem Harun bit leu nok TUHAN nicuk Musati.

²Lene iba linen di dia-diau kei kin wol di nimmun kin nghei nta kin gi ningwoi kin mong mas cem binap sinsun efod ningat gom.

³Idip mong mas di dile bibor leu api ibien kin linen di dia-diau kei kin wol di nimmun kin nghei nta kin gi ningwoi dima.

⁴Lene ibien nimmam can kin sinsun efod ba, gom ei nite hi lene gom ei nite hi leu binhyepo bisrou imam ninghat dip.

⁵Lene iba mong ninyeng hagom pima cem bibien mun di bikri kep imam nintig bou ba, inap kin sinsun efod nok sinsun ningat gom di ibien bikei-kau-kei.

⁶Lene igyai tig delima ninjep can ba, ikes tig dima hacem bicim kin bunggan nimpung di iba mas bibon. Lene ikilis Yakub nipmot bat nya ibou simnaibrimigcan inyeng eisi.

⁷Lene iba tig ninjep can dini bitut nimpung nya bicim kin nimmam can di ibien kin sinsun efod. Tig dini hacem nok tig nibiyok ngon kep mben Israel ide keret simnaibrimigcan bit leu nok Allah nicuk Musati.

⁸Lene tukan nya iba minyahas kin mun di ibien ei sinsun efod him pima binap sinsun minai mem imam ninggeda.

⁹Lene ikrop minyahas mem sinsun minai dini kin yam mbigom leu binhyepo nijeisi kin ninyanti hacem senti ningot can ba, can.

¹⁰Lene icim tig permata nipuig bitai kin nibiho. Icim tig delima kin topas kin baiduri sepah ei nipuig gi nigom.

¹¹Lene icim tig zamrud kin nilam kin intan ei nipuig gi nican.

¹²Lene icim tig lazuardi kin akik kin kecubung ei nipuig gi niningai.

¹³Lene icim tig pirus kin yakut kin ratna cempaka ei nipuig gi nibitai. Lene ibicim hagom kin bunggan nimpung di iba mas bibon.

¹⁴Lene ikilis bibikwop Yakub nipmot bat nya ibou simnaibrimigcan inyeng ei tig permata pima dip ba, gom ei tig gom lene gom ei tig gom lene nok leu binhyepo ibiyok ngon kep mben Israel ide keret nya.

¹⁵Lene iba mas bibon lante can dem kep nok kuk mbrei ba, ibien kin yam mem sinsun minai dini cem.

¹⁶Lene iba mas bibon srak ningat can ba, inap kin sinsun minai nuhuisi di jo nai.

¹⁷Lene inap lante mas can pima kin srak can dini.

¹⁸Lene inap lante mas can pima niyenti kin tig delima pima nide bunggan nimpung leu binhyepo sinsun minai kin sinsun efod nimmam nya u yam nok gi kei bitak kep yam bingkiem.

¹⁹Lene iba mas bibon srak can bu leu api inap hacem kin sinsun minai nuhuisi ndam nibehei hammi ninghas him simiak sinsun efod pima.

²⁰Lene iba mas bibon srak can kin bu leu api inap hacem hammi sinsun efod nimmam niyenti ei nibiho ndam ninghas him leu binhyepo mun di imam bikri kep nintig bou pima jo bijehei bu.

²¹Lene iba kuk nimmun bikim srak di ndun ei sinsun minai kin srak di ndun ei sinsun efod kin yam leu binhyepo sinsun minai jo nai leu mun di imam bikri kep nintig bou ba, kwat bi. Nok leu binhyepo hagom bit leu nok Allah nicuk Musati.

²²Lene tukan nya iba minyahas wol di nimmun binap sinsun ndok di jei mem imam juk ei noti ba, jo ser sinsun efod pima.

²³Lene ibien sinsun dima ninghas him ndam nikra ngkiem bibor ser nhyepo nonti rik bi.

²⁴Lene iba mong wol di nimmun kin nghei nta kin gi ningwoi kin mong linen di dia-diau kei cem bibien mun di nok biei delima ningat ba, ipindur hagom bindun sinsun ndok di jei dima ninghas him ndam dihyeisi.

²⁵Lene iba mas bibon brem-brem mien nya ba, ipindur hagom bindun sinsun ndok di jei dima ninghas him ndam dihyeisi bu.

²⁶Lene ipindur brem-brem mas ningat gom ba, ipindur biei delima ningat gom lene nok sindam bindun sinsun ndok di jei dima him bit leu nok TUHAN nicuk Musati.

²⁷Lene inap sinsun ninda mem Harun kin nipmot bat nya ijuk ei yoti.

²⁸Lene iba linen di dia-diau kei binap topi kin sinsun bopen.

²⁹Lene iba linen di dia-diau kei kin wol di nimmun kin nghei nta kin gi ningwoi binap mun di imam bikri kep nintig bou bit leu nok TUHAN nicuk Musati.

³⁰Lene iba mas bibon penen di bindo bipia Imam Nibou Ndig dimig nonti ei mem TUHAN ningat gom leu api ikilis eisi nok gini. TUHAN Dimig Imam Dini Ei Mem Nonti.

³¹Lene iba kuk nimmun bingot mun di nok penen dima kin imam de topi bit leu nok TUHAN nicuk Musati.

³²Lene midyai dino yohok TUHAN De Prak Meng dima hagom put tu. Mben Israel ibon hagom bit leu nok TUHAN nicuk Musati.

³³Lene ikon Prak Meng dima ningat tut nimbumbati nya hagom kwei bak Musa. Nimbumbati nya rinok gini. Nikoisi nya kin nide biei kibi nya kin nide biei njiti nya kin nikiou nya,

³⁴kin prak meng di iba domba nikre ningkek di ningwoi bibon kin prak meng di iba mindhe hiter ningkek di kei bibor kei bibon kin minyahas nititut yam di ibinggai kep biei kibi nya,

³⁵kin Brua Gi Preu bitut tig mma can di joti nya kin nide ug nya kin nibeng,

³⁶kin meja bitut nimbumbati nya hagom kin roti di ipigig sut ei mem Allah,

³⁷kin mini njeng nidihim di iba mas bibon bitut nide ninjeng mbrei nya kin nimbumbati nindigsi nya kin nide mini,

³⁸kin nimbar hum dok mem biei nggrai di iba mas bibon kin mini nibon midut kin biei nggrai di ui-gwang kei kin ninghas di ndun ser dimbou hui ei Allah De Prak Meng nsi,

³⁹kin nimbar hum dok di iba ngkimom-tembaga bibon bitut nide kawanggai kin nide ug nya kin nimbumbati nindigsi nya kin bokor minyei bitut nidihim,

⁴⁰kin minyahas nititut nya mem sar kin cou nya kin nikiou nya kin ninghas di ndun ser dimbou hui ei sar dimati bitut nide kuk nya kin keu di sren nya mem Prak Meng kin mun di imam nya ikrau kep ei Prak Meng dimati,

⁴¹kin sinsun nibon midut mem imam nya ijuk ei yokti tirigi igyai kep midyai ei Ninsi Di Kwes di inap nok sinsun nibon midut mem Harun kin nipmot bat nya ijuk ei yokti hagom.

⁴²Mben Israel igyai kep midyai dini hagom bit leu nok TUHAN nicuk Musati.

⁴³Lene Musa yok niyai kep mun dima yok hagom bingat lo, ibon hagom bit leu nok TUHAN nicuk noti. Gima rino noni ngat nadi leu binhyepo TUHAN njei mun di kei bak yoni.