Read Hatam NEHEI LEUSI 4 Bible Online

NEHEI LEUSI 4 - Hatam bible

NEHEI LEUSI 4

¹Lene Musa buhup TUHAN nihyet bipai “Notou mem da tut gima mben Israel iba ingon com da bibit dihyet bi i? Gino isrep tut da bipai bipia ando Nanti bida bi lene midibuhup hanyen biyok notou i?”

²Gima rino TUHAN hig ser noni “Akrau mindei ei andati dima i?” Lene Musa buhup “Dikrau ditde tom.”

³Lene TUHAN cuk noni bipai “Acom ade tom ei dihyeisi mu.” Tirigi noni com nide tom ei dihyeisi lene tom dima luei nitta bidem kep nok wou. Apino Musa nang leu.

⁴Lene TUHAN cuk noni bu bipai “Asu anda ba, akat wou nipu a.” Gima rino noni su ninda bikat leu api wou luei nitta bidem kep nok nide tom hanyen bu.

⁵Lene TUHAN cuk noni bu bipai “Ma ando mindur dima bak mben Israel nok mun di bindo bipia TUHAN di nok idigup-idigai bat Abraham kin Ishak kin Yakub yoni ide Allah ndo Nonti bina tu.”

⁶Lene TUHAN cuk Musa bu bipai “Asu anda ei ade sinsunti.” Lene noni yai mun bit leu nok TUHAN nicuk noti. Noro tirigi noni brim ninda hanyen leu sinsunti lene ngat ninda lo, hagom tiei-tiau lewo bras mbrei yem.

⁷Lene TUHAN cuk noni bu bipai “Asu anda hanyen ei ade sinsunti.” Lene noni yai mun bit leu nok TUHAN nicuk noti bu. Tirigi noni brim ninda hanyen leu lene ngat lo, kei hanyen tu.

⁸Lene TUHAN pai binoni “Gino iba ingon com nani bi ba, mindur di ando biyok bibie dima tot ingonti bi lene mindur gi nican dini mibindei ba, iba ingon com nani yo.

⁹Gino mindur ningat can dini mitot ingonti ba, iba ingon com nani bi ba, ikou sut nihyet di atri tut biyok lene atau minyei leu Minyei Nil leu api asiber ei dihyeisi. Apino minyei dima midem kep nok nggrom bu.”

¹⁰Noro Musa srep bipai “Tuhan e, henha nipou kikau kwei bipek tirigi ambrap bit da ammani kep lene dimbrap kan bi. Diji buhun ba, nggicai cem.”

¹¹Lene TUHAN buhup “Tou ripai tes tungwatu nya yuhui i? Tou ribindei dino tungwatu nya itingou nam ba, ibbwe cem i? Tou ribindei dino tungwatu nya igyai piga ba, igyai tu cem i? Da di TUHAN diyai mun dima yok hagom kan.

¹²Gima rino ma aug hak ug! Midimpu na tirigi ahap aji ba, midipingok angonti tut ahyet di mitibim ei ahui him cem.”

¹³Noro Musa srep bipai “Tuhan e, dahara mem Nani. Ma apinak da ug ei minu Mesir hanyen au. Noro ma apinak hiter bu.”

¹⁴Lene TUHAN ningon sibui sut Musa bipai binoni “Abon akindig Harun bi e? Dikan tut bipia noni mbrap kan. Ningat ne noni ningat rima kak puig sinon kwei su. Tirigi noni kwei ngat angat bou niyai him lene ningon llei bibor kei.

¹⁵Ma ambrap bit noni ba, apingok ningonti tut mun di suar noni mbrap tut. Midimpu jahacem lene midingginau je tut mun di suar jitri tut kin mun di jiyai nya cem.

¹⁶Noni mimbrap tug hon anyeng ei jide limwa nya yoho bei. Noni miba niji di ngkiem biya hacan mem na. Lene apingok ningonti tut nihyet di mitibim ei nuhui him tereu nok TUHAN rino pingok tungwatu nya ingonti.

¹⁷Ma ambut tut ade tom pima lewo aba tom dima bibon mindur nya.”

¹⁸Lene Musa ngkwei hanyen buug ngat nipmang Yitro bipai binoni “Gino ace tut lene midingkwei hanyen ug ei minu Mesir leu binhyepo diyok diyai kep dide bat nya.” Lene Yitro ce bipai “Acem ambut.”

¹⁹Nipou tirigi noni mbut bigyo lene TUHAN pai binoni “Ma angkwei hanyen ug ei minu Mesir lewo yo po ibungwam mem gima igyai nimai bina pima yahagom imai leu su.”

²⁰Gima rino noni buwak nitnem kin nipmot bat nya bikon yok ei keledai gom dip behei sut yok lene ngkwei hanyen ug ei minu Mesir. Lene noni ttei nide tom bit leu nok TUHAN nicuk noti.

²¹Lene TUHAN pai hanyen bak Musa “Nisindemti mem gima abibon mindur nya ne diyai bina tu. Tirigi aug krau minu Mesir hanyen bu lene abibon mindur pima hagom ei Firaun noho bei. Noro midibindei ba, ningkek ndok tut ahyet apino noni mikes mben Israel bimbut bingwes ngun bi.

²²Lene asok kep noni bipia Da di TUHAN disimbot dat bipia Israel ne dimunggwom mighumbou ri.

²³ Dikes dihyet bak noni mem gima noni sindui sut dimunggwom ba, mbut leu binhyepo kuk no biDa. Noro noni mikou sut. Gi nok lene midiyai nimai bak nonti nimunggwom mighumbou.”

²⁴Tirigi Musa nya yuug ei mpia ttou nsi gom ei puig sinon tu lene TUHAN um noni bipi biyai nimai bak.

²⁵Noro nitnem Zipora teu tig di nggwen bibor gom haninyai leu api yai nibon midut sunat bak nipmot lene bingget Musa nimigya.[3] Lene pai “Dijjep na e, ninggrom dini micuon ayaisi.”

²⁶Noni simbot dat nok gima drek dip nibon midut sunat pima. Gima rino TUHAN yai nimai bak Musa bi.

²⁷Mpe dima lene TUHAN cuk Harun bipai “Aug um Musa ei iggum ndigsi.” Gima rino noni ug um Musa ei nungug di kwes-kwau pima leu api mei Musa ningyoi.

²⁸Lene Musa ndat kep mun di TUHAN pai binoni ei mpe di po cuk noni bingkwei hanyen ug ei minu Mesir pima hagom bak. Lene pai sut mindur nya di TUHAN cuk noni tut cem.

²⁹Gima rino Musa kin Harun ingkwei hanyen ug ei minu Mesir binduk nibou mben Israel yahagom kwei.

³⁰Ba, Harun tri tut mun di TUHAN cuk Musa tut hagom biyok leu api Musa ndo mun di mindur nya brei bou yahagom igyai him.

³¹Apino yahagom iba ingon com Musa Harun nya ighyet. Tirigi imiap tut bipia TUHAN yok ngon kep mben Israel bingat mun di buhun tak yok hagom bou niyai him lene ikuk yok binggei sut Noni.