Read Hatam NEHEI LEUSI 5 Bible Online

NEHEI LEUSI 5 - Hatam bible

NEHEI LEUSI 5

¹Lene Musa kin Harun yuug ngat Firaun bipai binoni “TUHAN di nok mben Israel ide Allah sok nihyet bak na di Andigpoi bipia suar asindui sut Nide limwa nya bimbut ug ei iggum ndigsi leu binhyepo ikuk yok biNoni ei sirima.”

²Lene Firaun buhup “TUHAN dima tou i? Nggon rino dibit nihyet dima bidisindui sut mben Israel bimbut i? Dikan tut TUHAN dima bi. Gima rino midisindui sut mben Israel bimbut bi.”

³Lene Musa kin Harun ipai binoni “Mben Ibrani ide Allah ndo Nonti binye tu. Gima rino ma asindui sut nye binimbut ug ei iggum ndigsi mem mmun-njap ningai leu binhyepo nibon midut nindig mindhe kep hum ba, nibikuk nye ei TUHAN Noho bei. Gino niyai igbit TUHAN nicuk nyeti bi lene nahagom minitug ndei nimai tug hon ninggwen di buhun kin pran cem.”

⁴Lene Firaun hig ser Musa kin Harun “Nggon rino jibindei dino jide limwa nya inghen leu ide midyai nya i? Suar jicuk yok bipia ikinyon ei ide midyai pimati hanyen hak ug!

⁵Yo dima idigek bibor ba, imangti kum eisi bu tu. Leu api nogindini jijoi sut yoni ikes hon ba, igyai kep midyai dima bu bi!”

⁶Njap gom ndia ne Firaun kes nihyet bak mindor nya di inyeng tak kep nibou mben Israel di inyeng tak kep ide limwa nya bipai biyok,

⁷“Hon kep ammani kui lene jiyai mbrui ut bak yo dima mem gima ikioi kin igtuyap ba, ibibon nok tig mma bu au. Suar yonti yuug nggok mbrui ut nok gi dem mem ide tigya.

⁸Noro suar ibibon tig mma dima nimangti dem kep gi nipou pima bikwop njap-njap. Yahagom inghen ba, iba ikou biyai midyai. Gima rino ibidip huk da nyen leu binhyepo disindui sut yok ba, yuug bon midut nindig mindhe kep hum bit leu nok ide Allah nicuk yoti!

⁹Ma jikum ei ide midyaiti leu binhyepo ibou sibui ei midyai dimati leu ba, mibon nituti mem ibit yo dini di iris kep yok ighyet bu bi.”

¹⁰Lene mindor nya pima yok kin nibou mben Israel pima yok yuug pai bak mben Israel “Firaun ggai ser nye ba, miniyai mbrui ut bije mikuisi bu bi.

¹¹Suar jenti jinggok mbrui ut ariwace. Noro suar jibibon tig dima nimangti dem kep gi nipou pima bikwop njap-njap.”

¹²Gima rino mben Israel imbut bidem minu Mesir nisurti-nipekti binggok ser mbrui ut nok gi dem.

¹³Mindor pima yok ibidip huk yok bibor bikes mun di buhun bibor ei inghat dip ba, ibindei dino mben Israel ibon tig mma nimangti bikwop njap bit leu nok gi nipou tirigi po Firaun yai mbrui ut mikuisi biyok pima.

¹⁴Mindor nya ibui-bui nyen nibou mben Israel di igyok igyai kep midyai dima lene iba imbuk hig ser yok “Nggon rino jide limwa nya ibibon kep tig mma nimangti noyam kin gi nipou pima bi i?”

¹⁵Lene nibou mben Israel pima yok yuug ba, ilua sok tut bak Firaun bipai “Na di Andigpoi di anyeng jei e, nggon rino abindei ba, mun dini cut igkep nye i?

¹⁶Ayai mbrui ut binye bu bi noro suar nibibon tig mma nimangti noyam kin gi nipou pima! Nogindini na di Andigpoi ade nibou nya ibui kep nye lo, yoni rino igyai igbit bi a!”

¹⁷Lene Firaun buhup “Jinghen bibor bijiba jikou yai midyai nya. Gima rino jahara da leu binhyepo disindui sut je ba, juug bon midut nindig mindhe kep hum bit leu nok TUHAN nicuk jeti.

¹⁸Suar juug yai kep jide midyai pima hanyen hak ug! Midiyai mbrui ut bije bu bi sren. Noro suar jibibon tig mma nimangti noyam kin gi nipou pima.”

¹⁹Tirigi nibou dima yok imiap nihyet di cuk yok bipia suar ibibon tig mma nimangti noyam kin gi nipou pima lene ikan tut bipia mun di buhun bibor tak kep yok tu.

²⁰Yehei leu Firaun de ig lene ikwei um Musa kin Harun di imem kep ser ikweisi.

²¹Lene ilua bak Musa kin Harun bipai “Mun di jibon dima jo nibreisi ei TUHAN niyai him tu. Apino Noni mikes hukum ei je dip drek dip gima! Jibindei ba, nibou ndig kin yo di igya kui noni ingon mpo tut nye. Jei bi lene yoni migyai nimai binye drek dip.”

²²Lene Musa kuk no ei TUHAN Noho bei mbigom kin bu bilua bipai “Tuhan e, nggon rino abibon Ade limwa nya kinei nok gini i? Nggon rino apinak da kwei ei sirini i?

²³Lewo hammi tirigi diya hacan mem Ade limwa nya tug hon anyeng ei Firaun noho bei rino noni ba nisibut bico kep nye bu lo, ampu Ade limwa nya bi!”

²⁴Lene Allah pai bak Musa “Hon kep ammani kui ma angat notou midibirop hanyen bak Firaun ug ri. Midicuk noni leu binhyepo noni misindui sut Ditde limwa nya bingwes ngun ba, imbut bihigom. Ningat ne midicuk noni leu binhyepo noni mijji yok leu minu dini.”