Read Hatam NEHEI LEUSI 7 Bible Online

NEHEI LEUSI 7 - Hatam bible

NEHEI LEUSI 7

¹Lene TUHAN pai bak Musa “Amiap e, midibindei ba, akindig Harun minok no di binut ahyet ba, noni mitri tut ahyet bak Firaun tereu nok nabi di binut dihyet bak tungwatu nya.

²Ma apai mun di dicuk na tut hagom bak Harun leu api noni mitri tut hanyen bak Firaun leu binhyepo noni misindui sut mben Israel bimbut leu minu Mesir.

³ Noro midibindei ba, Firaun ningkek ndok ahyet. Mbro nok gino dikes mindur di buhun bibor ei mben Mesir dip lo, noni mimiap ahyet bibit kan bi.

⁴Mpe dima lene midikes hukum di buhun bibor ei yok dip leu api midibuwak Ditde limwa di mben Israel yahagom ba, yehei bingwes ngun leu minu Mesir.

⁵Tirigi dikes hukum ei mben Mesir dip lene dibuwak mben Israel bingwes ngun leu minu dima lene mijo nibreisi mem mben Mesir bipia Dani ne TUHAN ri.”

⁶Lene Musa kin Harun igyai hagom bit leu nok TUHAN nicuk yoti.

⁷Tirigi yuug ngat Firaun lene Musa de njap ug ei ari bingwam ningot muhwindaningai ba, Harun de njap ug ei ari bingwam ningot muhwindaningai ba, ningai.

⁸Lene TUHAN pai bak Musa kin Harun,

⁹“Gino Firaun cuk je bipia suar jibon mindur nok bindo lene acuk Harun bipia yai nide tom bicom ei dihyeisi bou Firaun niyai him lene tom dima minok wou.”

¹⁰Lene Musa kin Harun yuug ya ei Firaun noho bei bigyai hagom bit leu nok Allah nicuk yoti. Harun com nide tom ei dihyeisi mu ei Firaun kin yo di igya kui noni yoho bei lene tom dima nok wou.

¹¹Lene Firaun hig nide limwa di ingon ki nya kin gi hi di nung kui yok kwei leu api yoni cem ibon mindur di noyam kin Harun de tug hon ide nung nya.

¹²Yoni cem icom ide tom nya ei dihyeisi leu api ide tom nya nok wou nya. Noro Harun de tom pinde ide tom hagom bingwig ug.

¹³Mbro nok gima lo, Firaun ningkek ndok tut Musa kin Harun ighyet bit leu nok TUHAN nipaisi pima. Bit bon noni ce tut ighyet bibit kan bi.

¹⁴Lene TUHAN pai bak Musa “Firaun ningkek ndok bibor bikou sut gima kes mben Israel dima yehei bingwes ngun ug a.

¹⁵Gima rino ma aug um noni mem njap di hyep tirigi noni juk ei Minyei Nil nyai. Ma attei tom di nok wou pima lene agwam ba, amem kep ser nikwei ei mam beisi.

¹⁶Lene apai binoni bipia TUHAN di nok mben Ibrani ide Allah cuk na kwei. Lene apai bak Firaun bipia suar noni kes Ditde limwa nya bimbut ug ei iggum ndigsi leu binhyepo ibon midut nindig mindhe kep hum bak Dani ei mpia dima. Noro Firaun ce tut bibit dihyet bi kikau kwei bipek ammani kep.

¹⁷ Gima rino disok kep noni bipia mbigom mijo nibreisi mem noni bipia Dani ne TUHAN rin tug hon mindur nya di midibon ug ri. Mpe dima lene ma attei ade tom ba, abui Minyei Nil ningwa dip apino minyei minok nggrom.

¹⁸Wau nya hagom mimai leu api minyei hagom mpiei bibor ug ri. Ba, bit bon mben Mesir idut minyei kan bi lewo ninghap mpiei.”

¹⁹Lene TUHAN pai bu bak Musa “Ma acuk Harun biyai nide tom lene su gau minyei nya kin minyei pmot nya kin igpong nya hagom ningwa dip apino minyei minok nggrom bidem minu Mesir nisurti-nipekti hagom. Minyei ei tong nsi nya kin dibijigsi nya hagom minok inggroma.”

²⁰Lene Musa kin Harun igyai hagom bit leu nok TUHAN nicuk yoti. Harun su nide tom ei Firaun kin yo di igya kui noni yahagom yoho bei bibui Minyei Nil ningwa dip apino hagom nok nggrom.

²¹Wau nya ei Minyei Nil ngeisi hagom mai bingwig apino minyei mpiei bibor ba, bit bon mben Mesir idut kan bi. Minyei ei minu Mesir nisurti-nipekti hagom nok nggrom bu.

²²Lene Firaun de limwa di nung kui yok cem ibon mindur nok gima bu tug hon inda di dut apino Firaun ningkek ndok kikau. Noni kou sut gima ce tut Musa kin Harun ighyet bit leu nok TUHAN nipaisi pima.

²³Noro noni ngkwei hanyen ug ei nide ig bei lene digit tut mindur dima bi sren.

²⁴Lene mben Mesir yahagom itig jui sir Minyei Nil nipimat bibinggok minyei bousi nya leu binhyepo idut eisi lewo bit bon idut Minyei Nil kan bi.

²⁵TUHAN sigion Minyei Nil bijo njap muhwindacan kep leu ug e.