Read Hatam NEHEI LEUSI 8 Bible Online

NEHEI LEUSI 8 - Hatam bible

NEHEI LEUSI 8

¹Leu api TUHAN pai bak Musa bu “Ma aug pai bak Firaun bipia dikes dihyet bak noni leu binhyepo noni sindui sut Ditde limwa nya bimbut ug leu binhyepo ikuk yok biDa.

²Gino Firaun kou sut lene midikes hukum dino ugwaham di sider-wap nya mingwig kep minu Mesir.

³Minyei Nil mimpung tut ugwaham nya apino yehei leu minyei ba, icoi ei Firaun de ig kin nghim nsi kin nibongti ba, ibicoi yo di igya kui noni kin nide limwa nya ide ig nya kin ide atriemti nya kin ide bokorti nya.

⁴Ugwaham dima yok mipri bikui Firaun kin nide limwa nya kin yo di igya kui noni yahagom ingkek dip ug ri.”

⁵Lene Noni pai bu bak Musa “Ma acuk Harun bisu nide tom bijo nai gau minyei nya kin minyei pmot nya kin igpong nya hagom ningwa dip bibindei ba, ugwaham nya mikiju leu minyei jou bikieng kep minu Mesir nisurti-nipekti hagom.”

⁶Gima rino Harun su nide tom bijo nai minyei ngwa dip nya apino ugwaham nya ikiju leu minyei jou bikieng kep minu Mesir nisurti-nipekti hagom.

⁷Lene yo di nung kui yok pima cem iba inda di dut bindei ba, ugwaham hi kin bu ikiju leu minyei jou bikieng kep dihyeisi.

⁸Lene Firaun jem Musa kin Harun kwei bipai biyok “Ma jingat nadi bak TUHAN leu binhyepo Noni micok tut ugwaham dini yok hagom bingwig leu nye apino midisindui sut jide limwa nya bimbut. Leu binhyepo ibon midut nindig mindhe nya kep hum ei TUHAN Noho bei.”

⁹Lene Musa buhup “Dingon llei sut gima dingat nadi tindei na di Andigpoi. Noro ma ando nituti di kei bibor mem gima dikwei ngat nadi tindei na di Andigpoi kin yo di igya kui na di Andigpoi cem kin ade limwa nya hak ug e. Lene ugwaham nya hagom mimai bingwig leu na di Andigpoi lo, nikenti nya he mibong ei Minyei Nil jou bit leu nok igyai kepti.”

¹⁰Lene Firaun buhup “Ma angat nadi tindei da mem njap di hyep.” Lene Musa pai binoni “Midiyai hagom bit leu nok na di Andigpoi acuk dati. Lene mijo nibreisi mem na di Andigpoi bipia TUHAN di nok nyende Allah sindem bibor dor njiriek kwar di jikuk je bak ei dihyeisi dini nya.

¹¹Ugwaham nya hagom mimai bingwig leu na di Andigpoi kin yo di igya kui na di Andigpoi cem kin ade limwa nya jahagom lo, nikenti nya he mibong ei Minyei Nil jou bit leu nok igyai kepti.”

¹²Lene Musa kin Harun ikes Firaun ei bimbut leu. Leu api Musa ngat nadi bak TUHAN leu binhyepo Noni micok tut ugwaham nya di Noni bindei bingwig kep Firaun hagom leu.

¹³Lene TUHAN birop Musa nihyet bibindei ba, ugwaham nya di ingwig ei igbei kin biyati nya kin miaisi nya imai bingwig.

¹⁴Lene mben Mesir iroi hagom kok yam bikui sur mpia ei apino minu dima hagom mpiei bibor.

¹⁵Noro hammi tirigi Firaun ngat lo, ugwaham nya hagom imai bingwig nok rino ningkek ndok tut Musa kin Harun ighyet pima hanyen bibit bi bit leu nok TUHAN nipaisi.

¹⁶Lene TUHAN pai bu bak Musa “Ma acuk Harun bisu nide tom ba, bibui dihyei ninjek dip leu api dihyei ndung hagom midem kep nok amihip nya bikieng kep minu Mesir nisurti-nipekti hagom ug ri.”

¹⁷Gima rino Harun ba nide tom bibui dihyei ninjek dip apino dihyei ndung hagom nok amihip nya ba, ingwig kep tungwatu nya kin mindhe-ndhe nya hagom.

¹⁸Lene yo di nung kui yok pima cem ibingon lo, bit bon iba inda di dut bindei dihyei ndung dem kep nok amihip nya kan bi. Mpe dima lene amihip nya kieng kep minu Mesir nisurti-nipekti hagom.

¹⁹ Apino yo di nung kui yok pima isimbot dat bak Firaun bipai “Allah bibon mindur dini!” Noro Firaun ningkek ndok tut Musa kin Harun ighyet pima hanyen bibit bi bit leu nok TUHAN nipaisi.

²⁰Lene TUHAN pai bu bak Musa “Ma aug um Firaun njap di hyep bu mem ha yausi tirigi noni juk ug ei Nil nyai leu api apai binoni bipia Da dicuk noni bipia suar noni sindui sut Ditde limwa nya bimbut ug leu binhyepo ikuk yok biDa.

²¹Disok kep noni bipia gino ningkek ndok tut dihyet bu lene midikes hukum dino kros nya mingwig kep noni kin yo di igya kui noni kin nide limwa nya. Kros nya migyem mpia ei mben Mesir ide ig bei nya leu api mikieng kep dihyei ninjek dip hagom cem ug ri.

²²Noro midisrin ser hanjop Gosyen tut Ditde limwa nya di ibong ei mpia dima leu binhyepo kros nya mingwig kep yok bi. Gima hagom nok leu binhyepo Firaun mikan tut bipia Da di TUHAN rino dibindei mindur dini.

²³Midibindei ba, Ditde limwa nya kin Firaun de limwa nya ter leu yam. Mindur dini micut igkep yok mem njap di hyep.”

²⁴Lene TUHAN kes hukum kros di isider-wap nya bingwig ei Firaun kin yo di igya kui noni ide ig. Apino mben Mesir yahagom inggwen bibor ba, ide mun di inyeng tut nya hagom kinei bibor drek dip kros di sider-wap pima.

²⁵Lene Firaun sok nihyet bak Musa kin Harun bipai biyok “Ma jahagom juug nggok mpia tou nsi di mem gima jibon midut nindig mindhe kep hum ei Allah Noho bei ei minu Mesir hak ug.”

²⁶Lene Musa buhup “Dem tut gima bi. Lewo mben Mesir ingon mimpo tut nye drek dip nibon midut di nibon bou igyai him dima leu api yoni miba tig bihwen nye ba, nahagom nimai.

²⁷Suar nimbut ug ei iggum ndigsi mem mmun-njap ningai leu binhyepo nibon midut dima ei TUHAN di nok nyende Allah Noho bei bit leu nok nicuk nyeti.”

²⁸Lene Firaun ce bipai “Nna ba, midice tut ba, juug ei iggum ndigsi leu binhyepo jibon midut dima bak TUHAN di nok jide Allah. Noro ma jimbut ug ei minu ting au. Lene jingat nadi tindei da.”

²⁹Leu api Musa buhup “Mbigom tirigi dikes na di Andigpoi ei bidimbut lene midingat nadi bak TUHAN leu binhyepo kros nya hagom mipror leu nani kin yo di igya kui nani kin ade limwa nya yahagom mem njap di hyep. Noro ma aris binye bu ba, acuon ser nye di mben Israel di nimbut mem nibon midut dima ei TUHAN Noho bei bu au.”

³⁰Lene noni kes Firaun ei bimbut leu lene ngat nadi bak TUHAN.

³¹Lene TUHAN birop Musa nihyet bibindei ba, kros nya hagom idimba bihigom leu Firaun kin yo di igya kui noni kin nide limwa nya yahagom ba, kros gom cem jo bu bi.

³²Noro dem kep nok gi nipou pima ba, Firaun ningkek ndok tut mben Israel bisindui sut yok bimbut bi.