Read Hatam NEHEI LEUSI 9 Bible Online

NEHEI LEUSI 9 - Hatam bible

NEHEI LEUSI 9

¹Lene TUHAN pai bu bak Musa “Aug ngat Firaun ba, apai binoni bipia TUHAN di mben Ibrani ide Allah cuk noni leu binhyepo noni misindui sut Ditde limwa nya bimbut ug leu binhyepo ikuk yok biDa.

²Gino noni kou sut gima kes yok bimbut,

³lene midikes nsuwer di buhun bibor ei mben Mesir ide mindhe-ndhe nya hagom dip bitut kuda nya kin keledai nya kin unta nya kin sapi nya kin domba nya kin kambir nya hagom.

⁴Midibindei ba, mindhe-ndhe di mben Israel ide kin mben Mesir ide ter leu yam apino mben Israel ide mindhe-ndhe nya mingwes ngun ba, hi mimai bi.

⁵Da di TUHAN dikos tut bipia midikes mun di buhun bibor dini ei yok dip mem njap di hyep.”

⁶Njap di hyep bu lene TUHAN yai hagom bit leu nok nipaisi leu api mben Mesir ide mindhe-ndhe nya hagom mai bingwig noro mben Israel ide hi mai bi.

⁷Lene Firaun hig ser yo di igya kui noni tut mun di cut igkep yok leu api ibuhup bipia mben Israel ide mindhe-ndhe nya hi mai bi. Nok rino ningkek ndok tut mben Israel ba, noni sindui sut yok bimbut bingwes ngun bi.

⁸Lene TUHAN pai bak Musa kin Harun “Ma jikam atriem ndung leu atriemti ei jindati. Lene Musa bigimahap kui ei Firaun noho bei.

⁹Leu api atriem ndung dima migimahap bidem minu Mesir nisurti-nipekti hagom. Mibindei ba, buhwei micom tungwatu nya kin mindhe-ndhe nya hagom apino buhwei com yoni bibok jus yamti.”

¹⁰ Gima rino ikam atriem ndung leu api yuug ya ei Firaun noho bei. Tirigi Musa bigimahap kui lene atriem ndung dima bindei ba, buhwei com tungwatu nya kin mindhe-ndhe nya hagom apino buhwei com yoni bibok jus yamti.

¹¹Bit bon yo di nung kui yok ikwei ya ei Musa noho bei kan bi lewo buhwei com ingut titut yam noyam kin mben Mesir nindigsi nya yahagom.

¹²Noro TUHAN bindei Firaun ningkek ndok leu api noni bit Musa kin Harun ighyet bi bit leu nok nipaisi pima.

¹³Lene TUHAN pai bu bak Musa “Aug ya ei Firaun noho bei ei njap di hyep mem ha yausi leu api apai binoni bipia TUHAN di nok mben Ibrani ide Allah cuk noni bipia suar noni kes Ditde limwa nya leu binhyepo yuug kuk yok biDa.

¹⁴Lewo mindur di dibon nogindini mibindei ba, hukum micut igkep yo di igya kui noni kin nide limwa nya he bi. Noro micut igkep noni cem leu binhyepo jo nibreisi mem noni bipia tungwa hi noyam kin Da ei dihyeisi dini bi.

¹⁵Gino dikes hukum ei yok dip tug hon ninggwen di buhun bibor lene ningat ne yahagom imai bingwig su.

¹⁶ Noro disindui sut noni biniyaijo leu binhyepo dindo Ditde nisindemti binoni apino tungwatu nya mitri tut dinyeng di jei kikau ug bipek minu nohon keti.

¹⁷Mbro nok gima lo, ningon jei bijo ninno apino noni mikou sut gima kes Ditde limwa nya bimbut.

¹⁸Njap di hyep bu mem jam di noyam kin mpia di nok gini lene midibindei ba, biget mbras nok tig njep ug ri. Ba, nibuhunti dor njiriek biget di mbras nok tig njep ei minu Mesir habiei ei nimbie him kikau kwei bipek ammani kep.

¹⁹Gima rino ma Firaun cuk nide limwa nya leu binhyepo ijem ide mindhe-ndhe nya hagom ug ei ig bei bikon mun di jo nisai nya hagom ug ei ig gudanti. Lewo biget di mbras nok tig njep micut igkep tungwatu nya kin mindhe-ndhe nya di igya hak ei nisai hagom apino mimai bingwig.”

²⁰Lene nihyet dima bindei ba, yo di igya kui Firaun ibou poi ingon digit tut nindig bibor. Gima rino ibuwak ide awak nya bijem ide mindhe-ndhe nya hagom kwei ei ig bei leu binhyepo ingwes ngun.

²¹Noro nindigsi nya ingkek ndok tut TUHAN nisok kep yokti lene isindui sut ide awak nya kin ide mindhe-ndhe nya bigya ei nisai.

²²Lene TUHAN cuk Musa bipai “Ma asu anda kui mpia-bbed him apino biget di mbras nok tig njep mibut ei minu Mesir nisurti-nipekti bihwen tungwatu nya kin mindhe-ndhe nya kin njita kioi ei miaisi nya ug ri.”

²³Lene Musa kon nide tom kui mpia-bbed him leu api TUHAN bindei ba, kru cut lene biget mbras nok tig njep ba, kigyei ninjeng srei ug ei dihyeisi. TUHAN bindei ba,

²⁴ biget di mbras nok tig njep dima nindig bibor leu api kigyei ninjeng srei. Mben Mesir ingat biget di mbras nok tig njep nok gima habiei ei nimbie him kikau kwei bipek ammani kep bigyo.

²⁵Biget di mbras nok tig njep dima hwen mun di jo nisai bidem minu Mesir nisurti-nipekti hagom bitut tungwatu nya kin mindhe-ndhe nya kin njita kioi ei miaisi kin biei nya cem rus bingwig.

²⁶Noro biget mbras nok tig njep ei hanjop Gosyen po mben Israel ibong kep pima bi.

²⁷Lene Firaun sok nihyet bak Musa kin Harun bikwei ngat noni lene pai biyok “Dibon sisar tu. TUHAN ningon sren lo, dani kin ditde limwa nya nibon mun di tunggwei.

²⁸Ma angat nadi bak Noni mem nye! Nyeni nitug ndei hukum nidut di cut igkep nye tug hon kru di cut kin biget di mbras nok tig njep dem tu. Cobi! Midikes je bijimbut bijingwes ngun hak ug. Mijibong kep minu dini bu bi.”

²⁹Lene Musa buhup “Hammi tirigi dehei leu minu ndig dini lene midikon dinda kui leu api midingat nadi bak TUHAN. Mpe dima lene kru kin biget di mbras nok tig njep micut bu bi. Gima hagom nok leu binhyepo mijo nibreisi mem na di Andigpoi bipia TUHAN Nongkom ninyeng tak kep dihyeisi dini.

³⁰Noro dikan tut bipia na di Andigpoi kin yo di igya kui nani cem jittin tut TUHAN Allah haigtu bigyo.”

³¹Mben Mesir ide njita rami kin barli hagom kinei bibor lewo rami ngat ningat tu lo, barli sindi nitou kieng.

³²Noro ide gandum tut ningan di ntun him hi kinei bi lewo len bigyo.

³³Lene Musa kes Firaun ei buug leu minu ndig dima leu api kon ninda kui leu api ngat nadi bak TUHAN. Lene kru kin biget kin biget di mbras nok tig njep hagom kes ba, mpia mbum-bra.

³⁴Tirigi Firaun ngat mun dima bou niyai him lene noni bon sisar mbigom kin bu. Noni kin yo di igya kui noni yahagom ingkek ndok kikau.

³⁵Firaun kou sut gima kes mben Israel bingwes ngun bit leu nok TUHAN nipaisi tug hon Musa.