Read Hatam AYUB 12 Bible Online

AYUB 12 - Hatam bible

AYUB 12

¹Lene Ayub buhup “Jit, jengkom dini ne yo di igya hacan di imbrap gau tungwatu nya yahagom ri. Gino jimai lene ningon ki cem mimai bit je.

³Noro dani cem no di nikan-kan nyenti kwes. Dingon hukti tut mun nyeng di jindat kep dima yok hagom. Nok gima cem tou rino kan tut gima yok hagom bigyo i? Gima rino ma jikan bipia mun di jikan tut nya dima dor njiriek mun di dikan tut nya au!

⁴Mbro nok gino dibon mun di igbit ba dingon kwes lo, disut bat nya kin dingon kieti nya ipa ndip da. Nipou ne Allah buhup ditde nadi mpe dino dahara Noni.

⁵Jibong kei jigwam kei lo, jingwes pri gau yo di mun di buhun cut igkep yok. Jibuig no di dilleu di micut.

⁶Noro yo di ipos mun igkei nya ibong kei igwam kei. Mun di buhun cut igkep yo di ibungwam ndam gima isrep tut Allah. Ide kwar di iba ingon com ne yonti ide nisindemti he ri.

⁷Ma jihig ser ha nya kin mindhe nindigsi nya leu api yoni mingginau jeni.

⁸Ma jahara mun di Allah pai tes nya di ingat rin ei dihyeisi kin gi ingat rin ei muk ngeisi cem leu api mijiyai ningon kiti leu yok.

⁹Tou risrig mindhe-ndhe dima yok yahagom ikieti di ningon hukti tut gi Allah Nonti rino pai tes yok i?

¹⁰Noni rino nyohou dimig mun di pek kep mem Nide mun di pai tes nya yahagom. Ninyeng tak kep bikwop tungwa gom-gom ninnei cem tu.

¹¹Gino nihyet tibim ei tungwagom nitingou nsi lene noni dimig nihyet di kei leu gi kinei nya. Nok gima cem tut njita di noni piei bikan lo, bihi nyop lene bihi nyop bi.

¹²Ipai bipia ningon ki no jo bak andig-ndau nya. Noro ningat ne ningon ki kin nisindemti no jo bak Allah Nongkom he. Ipai bipia ningon dor niti no jo bak yo di ide njap ug ninno tu. Noro ningat ne ningon dor niti kin nisindemti mem gima yai nibou tut mun nyeng hagom no jo bak Allah he!

¹⁴Bit bon hi ngot mun di Noni nggek bingwig hanyen kan bi. Bit bon hi kwek no di Noni bindei sima hanyen leu ig bui nsi kan bi.

¹⁵Gino Noni yam ser minyei lene minyei pingge leu lene biyon ngoi ei mun nyeng hagomti cem. Gino Noni kes minyei bibiam hanyen lene minyei misu bihwen mun nyeng hagom!

¹⁶Allah sindem ba, mimbri kui ningkek apino bindei cut Nide siceu nya! No di ris mun igkei kin no di cut bak no di ris pima yahacem ingat rin ei Allah ninda behei.

¹⁷Noni tiba ningon ki leu nibou di inyeng tak kep limwa nya lene bindei nibou ndig nya ba, intin kiek.

¹⁸Noni cut nibou ndig nya inyeng lene bindei sima yok.

¹⁹Noni om imam nya kin yo di inyeng jei nya.

²⁰Noni bitot ser yo di imbrap ngat nya di tungwatu nya iba ingon com yok ba, tiba andig-ndau nya ide ningon kiti leu yok cem.

²¹Noni bindei ba, yo di inyeng jei nya igyai nimmai lene bindei timek nibou ndig nya ide nisindemti cem.

²²Allah bindei ba, nipigati piga digai minu nimai nya ide ba, piga digai nidinditi di dindi-kai nya cem.

²³Noni bindei ba, mben bihi ikieng kep mpia ba, ibongti kin igyemti kin imati dem mem yok leu api Noni bindei sar yok bingwig.

²⁴Allah bindei ba, ide nibou nya ingon ttai-ttai bou leu api israwir bikan tut mpia di yuug eisi bi,

²⁵apino itibap-tibap nyen ei nidinditi ba, ibou buwei noyam kin yo di idut pes di pu yok cem.