Read Hatam AYUB 14 Bible Online

AYUB 14 - Hatam bible

AYUB 14

¹Nyeni inghuisi mbriong ba, isindem bi mpe di po isrek kikau kwei bipek ammani kep. Mun di buhun bibor tak kep nye mem nijam di igyaijo cun bibor.

²Imahan lo, yahagom inoyam kin mitou di kieng bimui hanyen. Ipren hanyen nok ningwes di kigyei gau nye.

³Allah e, angig ayai kep da e? Akes da, bidiya ei Aho bei tirigi agwam nok nikei e, he bi e?

⁴Bon no di bon sisar bindei ba, mun di kwes kei ntun him e?

⁵Akos tut nide njap nijeisi kin nide bed nimangti nipou su. Akos tut nide niyaijo nimbie him kin ningwigsi. Bit bon noni pigau akos tutti dima kan bi.

⁶Asindui sut ba, noni bong kep ninghuisi hak ug. Ma abindin noni au. Leu binhyepo bong kei bigwam kei kikau bibou nide midyai nya ngwig ug e.

⁷Biei ngwam di sindi iwim tu mui bihigom bi noro ningunti bindei ba, nipras ntun him hanyen bu ba, bon ninggram cem.

⁸Mbro nok gino nigau mui ba, ningwam cem nggun lo,

⁹gino iba minyei biprok lene nipras mipras hanyen noyam kin njita kioi.

¹⁰Noro gino tungwatu mai su lene mai bihigom. Noni kes dihyeisi dini ei lene ug ei siritou bu i?

¹¹Gima noyam kin igpong di sri bipingge hanyen kin minyei di pingge leu di biam bu bi cem.

¹²No pima cem mai bihyen hanyen kan bi. Hi miwin noni mem nijam di mpia-bbed him jo nijoti bi sren. Noni mikiju hanyen leu nibong maisi bi sren.

¹³Ma aku da nyahan ei minu nimai nya ide ba, digwam nding leu ayai him kikau bibou Ade ningon sibui sut dati pren hanyen ug e. Lene ma atto ei mem da tut bitto bou mem gima ayok ngon kep da.

¹⁴Leu gino tungwagom mai su lene bon noni kiju hanyen leu nimai eisi e? Noro midibet dingon bibou nijam di kinei bibor dini ngwig ug e.

¹⁵Mpe dima lene mporo ma ahig da leu api midibuhup ahyet. Mpe dima lene mporo ma angondut Ade nipai testi di dani.

¹⁶Mpe dima lene mporo ma anyohou da kak dimbutti nya hagom lo, akwop kep ditde sisar nya bu bi.

¹⁷Mporo ma akos ser ditde sisar nya leu api acom hagom ba, aciu ser mun di diyai tunggwei di nipou nya hagom bingwig.

¹⁸Mimbrek-mimbrek lene nungug nya hagom mitti bingwig. Bor ngug di nddong kei nya cem hagom mison leu nijoti.

¹⁹Minyei di biam sindem micit tig bingwig ba, biget di mbras sindem mibiam tut dihyei. Nok gima cem abindei ba, mun di tungwatu nya igyok ingon mem nya timek bingwig.

²⁰Abindei timek yok bijo ninno bijo kikau. Acuk yoni biyuug bihigom bibindei ba, iimaisi ngak-cai.

²¹Ipmot bat nya itug ndei inyeng di jei noro icig bat di imai su nya ikan tut gima bi. Gino hi cug ipmot bat nya inyeng di jei leu yok lene bit bon hi pai sut gima bak icig bat nya kan bi.

²²Yo di imai su nya ingkek kan inghuisi di dut ba, ingon ngguk tut yonti imaisi he cem.”