Read Hatam AYUB 15 Bible Online

AYUB 15 - Hatam bible

AYUB 15

¹Leu api Elifas sok kep Ayub bipai “Mun di asimbot dat dima yok bon ninyeng bi ba, ahyet nok bu tan! No di ningon ki hi gi simbot dat nok gima bi. Ba, noni miba nimbrapti di bon ninyeng bi dima bimbrap gau nonti bi.

⁴Gino hi bit ade nipingokti dima lene tungwa hi dima mittin tut Allah bingat nadi bak cem bi.

⁵Ambrapti nya bindo brei bipia abon mun tunggwei. Noro aba ahyet dwei biku ade nibon munti di kinei bibor nya.

⁶Suar dipai kep na bidinjei kep na tut atunggwei sutti bi lewo nanti ambrapti bindo brei bipia angon mui su.

⁷Akan bipia nangkom he rino tungwatu nimbie him ngat di apmem srek tut na e? Angat rin bit Allah ei mpe di po Noni pai tes nungug him nya e?

⁸Apo amiap tut Allah ningon kanti di Noni kos tut nya e? Apo ningon ki titut yam jo binangkom e?

⁹Mun di akan tut nya ne nyeni cem nikan tut hagom. Mun di angon huk niti tut cem jo nibreisi mem nye.

¹⁰Niyai ningon ki leu ndigpoi di ibou tiei nya di ingat rin ei nipou tirigi acig srek bigyo.

¹¹Nggon rino akou sut gima Allah win kep angonti i? Nyeni niba noom ningon kin nihyet nggriu-nggrop cem bimbrap bit na tug hon Allah ninyeng.

¹²Noro angon kui bibor ba, apri ayai kep nye cem ba,

¹³angon sibui sut Allah ba, asrep huk Noni cem.

¹⁴ Bon tungwa hi gitunggwei mun nyeng hi bi sren e? Bon hi pai sut nonti bipia ningon kwes kin Allah e?

¹⁵Mei! Allah ba ningon com malaikati nya bi. Yoni ingon kwes ei Allah niyai him cem bi.

¹⁶Gino Allah ba ningon com yok bi lene notou mem no di kinei-kinau kin no di ningon rom di dahat nikibou ei nibon mun di kinei biborti noyam kin gi dahat nikibou ei minyeiti he i?

¹⁷Ayub e, amiap kep mun di jo ei dibou ngwakti.

¹⁸Yo di ingon ki nya ingginau da lewo ipikor tut ningginausi dima tug hon idigup bat-idigai bat di nipou nya ba, ibinut hagom nyahan bak yo di intun him yok nya.

¹⁹Mpe dima lene ngkiai nya ibong timiei ei ide minu ba, hi di bindei srawir yok leu puig di Allah de bi.

²⁰No di sibut di co kep nisut bat nya mporo ningon mibos-bos nyen ba, gima ngot kep noni kikau ug ei niyaijo ningwig honti.

²¹Nibimbiti nindig bibor di tibim tut ningon digitti mibindei ba, nitingou nam lene yo di ipos ndigban igkei nya mihwen noni ei mpe di noni kan bipia mpia mbum-bra.

²²Bit bon yok ningon mem gima ningwes ngun leu nidinditi kan bi. No di hwen mun igkei miba singau simeda buhuk-huk nyen noni bikwop nituti hagom ba,

²³ha nasar nya ibet ingon mem nimaisi leu binhyepo ipuk ningut biduhwen. Apino ningon huk niti bipia nindibutti minggai kep nide njap nidipti.

²⁴Mun di micut igkep noni dem kep nok nibou ndig di sindem bibor di tin ei mem gima hwen noni tu.

²⁵Mun di buhun dima hagom micut igkep no di srep huk Allah bibrim ningkek mem gima tte tut No Di Sindem Bibor.

²⁶Noni ba ningon di jei bisrep huk Allah leu api su nide mun di bipukep tibor ninggwen lene kan bipia noni micut bak Allah bi.

²⁸No dima bong timiei ei minu ndig ngot di inggek sinsiou bingwig ba, bong ser ig ngot di jo ei mpia nintiti di tungwatu nya ibong ser bi. No dima srep huk Allah tug hon nisinati dima.

²⁹Nide mun di nyeng tut nya mipror nyahan leu noni bibon niceti ei bi. Nide ndigban misar bingwig hak leu noni noyam kin ningwes di kigyei bisar bihigom.

³⁰Miningwes ngun leu nidinditi di dindi-kai bi. Hum miyem nide njita kioi bingwig. Noni misar tug hon ninnei di hei kwei leu Allah ninsi.

³¹Gino ningon mbum ba, ba ningon com nibon kep sisarti lene mun dima miris noni ug ei nikineisi. Nimuhup di mitau binoni cem minok bu tan.

³²Nipou tirigi nijam dem mem gima mai bigyo lene noni mimai urung leu noyam kin biei nda di bon nimeng ngun noro nimeng dima mingun hanyen bu bi sren.

³³No dima dem kep ba anggur di ningat llet bingwig nipou tirigi nggwop bigyo ba, biei zaitun di nitou llet urung bingwig leu.

³⁴No di sibut mibon nide nintun him yamti di bram yam nya bi. Gino ba mitiei nibingot kep tungwatu nyati biwin ig lene hum miyem ig dima bitimek bingwig.

³⁵Gima ne yo di igyok ingon gom mem gima ibon mun di kinei kin yo di ibindei mbut ide ningon kanti di suwok ri. Ba, ingonti mpung tut gi iris mun igkei bijo ninno bijo kikau.”