Read Hatam AYUB 16 Bible Online

AYUB 16 - Hatam bible

AYUB 16

¹Noro Ayub buhup “Dimiap kep nihyet dima yok mbirimang tu. Abingon mem gima agwam ser dingon noro ahyet dima hwen bit da bikum ei ditde ninghuisi di weiti he.

³Apig bu api akes hon ahyet di noyam kin bu tan di tibim ei ahui him dima i? Mindei ribindei dino abirop hanyen tut ahyet ngwak him di ahyet ngwig kep da i?

⁴Gino siluei yam hoti lene bon dani cem dimbrap nok ambrapti dima apino dimbrapti dima misu kep ambrapti leu api midikit-kit nyen dibou tut nani cem ba,

⁵bon ditri tut nisok kepti di biyai angon ngkiem ba, angon gwam cem.

⁶Dimbrapti dima bindei ba, dinghuisi di wei cut leu da bi. Mbro nok gino digwam bidimmou hak lene gima cem bindei bidikei hanyen bi.

⁷Na di Allah abindei ba, dinghuisi sindem bi. Asindui sut ba, ditde ig bei nsi nya yahagom isar tu.

⁸Ahwen bit da ba, akat da cem tu. Apino gi jo ndia rino ditta di nggek kin dinjum nya he. Apino imang bibor ikan bipia mun di cut igkep da dima yok ndo bindo bipia dibon sisar tu.

⁹Allah nggek dinjum dem kep nok mindhe di niten-pos di briug mun di yem. Noni ba niyai di huk-huk nyen da bigga da.

¹⁰Tungwatu iba ighyet bicig da ba, igyai ngkek ttin ser da cem leu api ingwig kep da bittem dingyoi cem.

¹¹Allah kes da ei yo di isibut nya indati. Lene bicut da ei yo di ibon mun hacican indati cem.

¹²Nipou yo ne dibong kei digwam kei noro Allah kat da kros boom ku dikimam bico kep da bidinem-nnai. Noni dimig da ei mem gima ba Nide tibor bikik da,

¹³bingondut da bi noro ninda jo kep biprindei da kikau apino dikimbu nya kin disingau tigwau bitau biyem mpia.

¹⁴Noni cut igkep da bihwen da noyam kin nihwen kep mun cig di bindei ba, dibok-ba nyen.

¹⁵Dijuk sinsun kron di bindo tut dingon nggukti bidigwam tut ei atriemti lewo Noni bindei timek da tu.

¹⁶Dipim kikau apino diimaisi hai. Diyai njep dwoi binnum bibor cem.

¹⁷Noro diba nisibutti bibon mun hi bi. Jo nibreisi bipia diba dingon sren bingat nadi bak TUHAN.

¹⁸Na di dihyei dini e, ma aku nibon munti di kinei bibor di cut igkep da leu da au. Ma akimut anda ser da tut dihyet ei mpe dino dahara nikei mem gima ba ningon srenti bimbus dingonti au.

¹⁹ Dikan tut bipia no di mbrap gau da ningat rin ei gwamti. Noni miya hacan bipai sut da bipia dibon sisar bi.

²⁰Disut bat nya iba ighyet bicig da bipa tut da cem. Diba nipim bisau ndam Allah ba, dahara Noni bimpu da.

²¹Nnaba dingat nadi leu binhyepo no di mbrap gau da ei Allah Noho bei pima mbrap gau da noyam kin no di mbrap gau nide di ningon kieti.

²²Ditde njap nikenti di jo yo mang bu bi su. Jei bi lene duug krau nohon keti bidingkwei hanyen bi sren.