Read Hatam AYUB 21 Bible Online

AYUB 21 - Hatam bible

AYUB 21

¹Noro Ayub buhup “Ma jingig jitingou mem dihyet. Tug hon nisinati gom ngat dima lene mijibigwam ser dingon. Diyok dingon mem gi ndima he.

³Ma jibon nituti mem da leu binhyepo dimbrap. Tirigi dikes dihyet leu api nok gino jipai da kinei lo, nna ba jipai da ug.

⁴Diliriem tungwatu bi. Nok gino doom dingonti laide bi lo, nok ug e.

⁵Ma jingig jiyai kep danti njem. Gima mibindei ba, jinga leu tut da ba, jiya bijinddong-ndau sut apino jiba jinda bia bei bikimut juhui hak ug cem.

⁶Gino dikan-kan nyen tut mun di cut igkep da dini lene didigit tut ba, dinghuisi mpig sut.

⁷Nggon rino Allah sindui sut ba, yo di isibut nya ide njap jei ei dihyeisi dini ba, ide ndigban cem bikum eisi kikau i?

⁸Igyai wer bijo ninno ba, ingat ignyon bat kin idrot bat nya imahanti bou igyai him kep.

⁹Ide bat nya ibong kei igwam kei. Allah bindei ba, mun di buhun cut igkep yok bi.

¹⁰Ide mindhe-ndhe nimuhup tu nya ipri gau yam ba, imangti kum eisi. Mindhe-ndhe di ide nya ibep kinei cem bi.

¹¹Yo di isibut imunggwom bat nya ikek bit yam kin ingon di llei bibor noyam kin domba nipmot bo di ningon llei bibor.

¹²Lene iba mun di impig-mpig nyen kin porei kin nggong mbrei nibimbi bibiyai nillei. Ibipai doia ba, ingon mingon bibien-bien nyen cem.

¹³Ide njap ngwig ei ide ningon nggei-hi-nggei dimati leu ba, iba ingon di jo nyahan bimai ug ei jui nsi.

¹⁴Mbro nok gima lo, ipai bak Allah “Aom na minu ting leu nye ba, aug leu nye! Nyeni niginjor akos tutti kin angon kanti mem nyeni ba, nijoi sut ningon huk niti tut bi.”

¹⁵Yo dima ikan “Nikuk nye bak Allahti kin ningat nadi bak Noniti bon ninyeng bi.

¹⁶Apo ijoi sutti kin ingon kanti hagom di pek kep mem nye pima tug hon nyenti ide nisindemti bi e?” Mbro nok ipai nok gima lo, digice tut ikan-kan nyenti kin ikos tutti nya dima bi sren.

¹⁷Apo yo di isibut nya imai urung ba, mun di buhun bibor hi cut igkep yok tu e? Apo Allah ba niggati bikes hukum ei yok dip cem tu e?

¹⁸Apo idem kep gandum nintam kin atriem ndung di hou sigau yai ba, bit hou pima tu e?

¹⁹Jipai bipia “Allah kes hukum ei munggwom nya dip drek dip icig bat nya ide sisar.” Noro danti dipai bipia e bi! Suar Allah kes hukum ei yo di ibon sisar nya yonti dip. Leu binhyepo ingon huk niti bipia yonti ide sisar rino bindei di Allah kes Nide hukum ei yok dip a.

²⁰Suar yo di ibon sisar ibiang ide sisar nibuhunti. Suar itug ndei Allah Di Ninyeng Jei nigga biborti leu binhyepo ibikan tut.

²¹Tirigi ide njap ngwig ei dihyeisi dini ne ingon hukti tut ide ig bei nsi nya ide nibong kei nigwam keisi e?

²²Bit bon tungwatu nya ingginau Allah kan bi. Noni rino mbus Nide awak di ingat rin ei gwamti nya ingonti.

²³Tungwatu bihi imai mem nijam di inghuisi kwes ba, ingon jo nyahan cem ibong kei igwam kei cem.

²⁴Inghuisi kwes kei mem nijam di igyaijo ei dihyeisi dini ba, ingkek pap-nap kei cem.

²⁵Noro bihi ingon mpung tut nimpo-mpamti mem nijam di igyaijo jei kin njap di imai leu ba, igingat ingwes ei ingon nggei-hi-nggeiti bi.

²⁶Mbro nok gima lo, iprion yahagom ei nimai jui nsi bibong ei mpia dima leu api njingwoi kin adihyeisi ingwig kep yahagom ingut a.

²⁷Ningat ne dikan tut jikan-kan nyenti nya kin jide ningon sibutti di jibingon-ngon nyen ei mem da hagom tu.

²⁸Ba, jihig yam “No di ninyeng jei di ninyeng tak kep tungwatu po ba ningon di sibut bibon mun pima nide ig jo tirigitou i?”

²⁹Apo jigihig ser yo di imig dia mem imbutti nya bigyo e? Jingon gibit yok bi e?

³⁰Yoni ipai “Njap dino Allah ba nigga biborti bikes hukum ei tungwatu nya dip lene yo di isibut nya mingwes ngun.”

³¹Hi di pai no di sibut kinei drek dip nibon munti nya bi. Hi di kes hukum ei noni dip drek dip nisibutti cem bi.

³²Mpe dino ittei ningut ug ei nimai jui bikes ei jui nsi lene tungwatu nya inyohou nijui dip ba, igya ser.

³³Tungwatu nya ibou sribu-ribu imbut binjei ttai ningut. Ibiji dihyei kep ba, dihyei di nggriu-nggrop yon kep brua nimai.

³⁴Noro tut jeni ne apo jiba jihyet di nok bu tan bigwam ser dingon bi e? Jiba niris munti bibuhup nitu he!”