Read Hatam AYUB 23 Bible Online

AYUB 23 - Hatam bible

AYUB 23

¹Noro Ayub buhup “Disrep huk bidinso Allah. Gi mbun doom dingonti tut ninso-nso nyenti dima bi.

³Ayo! Handei kon ba, dikan tut mpia di Noni ningat rin eisi leu api duug ngat bidimbrap bit.

⁴Gi nok lene midipai sut ditde munhyet bak Noni. Lene nihyet nibimbrap gau daniti mehei leu duhui a.

⁵Disuar gi dikan tut nihyet kin nibuhupti cem.

⁶Noni miba nisindemti bimbrap bit da e? E bi! Ningat ne Noni mimiap kep dihyet.

⁷Ditunggwei sut mun hi bi ba, bon dimbrap gau danti ei Noho bei leu api Noni mipai sut bipia dingwes ngun bihigom.

⁸Dinggok Allah ei nite bei mpia nipriti noro ningat rin ei sirima bi. Dinggok Noni ei nite bei mpia nikimbasti cem noro ditau kep Noni ei sirima bi.

⁹Dinggok Noni ei nite bei mpia nijjai noro ndo Nonti brei bida bi. Dikiek da bei mpia nibiho bidinggok lo, dingat Ningat bi.

¹⁰Mbro nok gima lo, Noni kan tut dimbutti kin dicoti nya hagom. Gino Noni bingon da dem kep nok tukan di ikinding mas pimbai kei lene mijo nibreisi bipia dingon kwes kei.

¹¹Diba dingon gom bibit nihyet kikau. Dikriek leu Nide puig di kos tut ei mem da bi sren.

¹²Dibit Allah nicuk dati nya bikwop mmun-njap. Digibit mun di diyok dingon mem nya bi leu binhyepo dibit Nonti ningon kanti nya.

¹³Allah giluei ningonti bi sren. Bit bon hi di hwen bit Allah kan bi. Noni bon mun bit leu Nonti ningon kanti.

¹⁴Noni mibindei mbut ningon kanti di tin ei di bitut dani. Ter leu gima ne ningon kanti di tin ei mem dani mang bibor bu no rinaha.

¹⁵Dittin tut Noni apino digwam ei nidigitti. Gino dikan-kan nyen tut nidigitti dima ne dittinti cem kum eisi kikau.

¹⁶No Di Sindem Bibor cut nisindemti hagom leu da tu. Mbro nok gino nidinditi yon ttai da binggai kep diimaisi lo, dittin tut bi lewo dittin tut Allah Nongkom he.