Read Hatam AYUB 27 Bible Online

AYUB 27 - Hatam bible

AYUB 27

¹Ayub binut nipaisi bipai “Dani deheng bitug hon Allah di Niyaijo di mbus dingonti igbit bi dima,

³ninyeng bipia ei nijam di Allah yai dinnei leu da bigyo yo di dinnei no jo da him yo dini,

⁴lene nimbrap nihyet di igbit bi mitibim ei duhui him ba, didweb mipri tut niris munti bi sren.

⁵Midipai ei duhui him bipia jibuhup bidati pima igbit bi sren. Midikrau kep dingon srenti kikau ba, duug bimai kep.

⁶Dimpig bou kep dingon srenti leu api midiluei dingonti tut hanyen bi sren. Dingon mien cem pwoi-pwau bikwop njap ngwa hagom.

⁷Dijoi sut bipia ditde siceu nya yahagom mitug ndei hukum noyam kin nisibut cig nya di itug ndei hukum ba, yo di ihwen bit da itug ndei hukum noyam kin yo di imbuk cem.

⁸Mpe dino Allah yai no di bon mun di kinei hacican ninnei leu lene miningwes ngun leu Noni ninda nsi yo e?

⁹Mpe dino mun di buhun cut igkep noni lene Allah mimiap naharati e? E bi!

¹⁰Nikeisi rima suar noni ningon ya mem ningon di nggei-hi-nggei di Allah tin ei mem no lene ba nimbris biborti bingat nadi bak Noni bi.

¹¹Jisindui sut bidingginau je tut Allah nisindemti di nindig bibor. Midipai sut No Di Sindem Bibor ningon kanti di tin ei cem bije.

¹²Noro ningat ne jahagom jingat gima bou jiyai him tu. Gima rino nggon rino jiyai nipingokti di bon ninyeng bi bida i?”

¹³[20] Zofar pai bak Ayub “Allah Di Sindem Bibor mikes hukum ei no di co kep nihyet kin no di sibut tug hon nisinati dini.

¹⁴Gino ibon imunggwom bat nya imang lene yoni mimai ei pranti ba, ignyon bat nya imati kin igyemti midem mem yok haigtu bi cem.

¹⁵Nimbier kimti nya di ingwes ngun nya mimai tug hon nsuwer ajar apino bon nituti mem kibom di imai leu yok nya igipim tut yok bi.

¹⁶Mbro nok gino yo di isibut inju perak bikui sur mpia ba, inju sinsun nya cem bijo-jo yam dip lo,

¹⁷yo di ingon sren minyeng tut perak kin sinsun dima yok hagom nok ide bu.

¹⁸No di sibut de ig minggun noyam kin mimpam ham[21] kin ig jibei di awak nya yohok mem gima ibiya ser beisi.

¹⁹No dima nok no di nyeng di ug bong nyahan bihigom noro mikiju hanyen bi sren. Noni da niyai bingat lo, ndigban di nyeng tut nya hagom sar bingwig leu no tu.

²⁰Mun di biyai ningon ttin biborti micut igkep no dem kep minyei di su bibor. Hou sigau di cut mem mmun mihwen noni bittei noni buug sut.

²¹Hou mpia priti micut bikon noni bicok tut leu nide ig.

²²Mun dima yok mingondut noni bi noro micut igkep noni ba, suar nang binggok tring behei biya nding.

²³Noni nang sindem noro sigau ttem-ttem nyen no ba, hou huk-huk nyen no bidem ninangti nya hagom.”