Read Hatam AYUB 28 Bible Online

AYUB 28 - Hatam bible

AYUB 28

¹[22] Tungwatu nya itig perak biyuum ei dihyei jou. Mpia di ikwen mas bibindei pwoi-pwau eisi cem no rinaha.

²Itig ngkimom nitu bigyai leu dihyei jou. Ibindei jet ngkimom-tembaga di srig tigti leu tig.

³Tungwatu nya icoi ug ei nidinditi di dindi-kai ei dihyei jou bitau kep ninsi di jut bibor. Icoi bingig igyai kep ba, inggok ser tig nya ei mpia di dindi-kai.

⁴Tungwatu nya itig jui nya ei mpia di ting bibor di hi bong ser ba, igicoi eisi bimbut eisi cem bigyo. Yuhuk kuk tut yam bikinyon ug ei jui di jut bibor ba, ihim-him nyen ei dihyei nyem di jo hak di mpia mbum-brati cem.

⁵Njita hei ei dihyei ninjek dip mem tungwatu. Noro tungwatu nya itig dihyei dima nijou mu kou ba, ikiek-kiek nyen apino mun di jo dihyei mu kou sinsiou nyen a.

⁶Tig nilakandi jo srig tig di jo dihyei jouti ba, mas di pimbai kei srig dihyei ndungti cem.

⁷Hacam gikan tut puig di ug ndam mpia dima ba, ha nasar cem ko-ko nyen gau mpia dima bi sren.

⁸Mindhe singa kin mindhe di niten-pos nindigsi nya cem igimbut kak puig di mbum-bra nuug ndam mpia dima bigyo.

⁹Tungwatu nya itig ei tigsi di ngkiem-kiau bijut lene ibinggek nungug ba, ug bipek ningug nikiou cem.

¹⁰Tirigi itig dihyei nyem biyuug ei nungug tig dima lene itau kep tig permata di nibok kak bibor.

¹¹Itig kikau ug bipek minyei di biam ei dihyei ninjek dip nibousi nehei leusi nya ba, ibikon mun di jo nding bijo nibreisi.

¹²Noro minggok ser ningon ki ei hantou i? Miyuug pikor ei hantou leu binhyepo igyai ningon di dor niti i?

¹³Ningon ki nibousi ningat rin ei tungwatu ikieti bi. Hi di kan tut ningon ki dima nibok ngig-ngat bi.

¹⁴Muk jou kin muk ningwa dip ipai bipia ningon ki jo bit yoni bi.

¹⁵Bit bon iba mas kin perak di pimbai kei cem bipek ningon ki dima kan bi.

¹⁶Mas kin tig permata di nibok kak bibor cem nibok gi noyam kin ningon ki nibok de bi.

¹⁷Miba mas kin kisina di dia kei binai cem bi. Dem tut gima iba bokor mas di ngkiem kei bipek kan bi.

¹⁸Ningon ki nibok kak bibor dor njiriek bor ningwoi ei minyei jou kin kisina di jimjit bibor kin sriou tiei njep yahagom ibok bu.

¹⁹Gino ibinai kin tig topas gi ningat-ngat kin mas di pimbai kei cem lene bit bon tungwatu nya ingon dor niti tut nibok kan bi.

²⁰Ningon ki nibousi jo hantou i? Inggok bitau kep ningon di dor niti ei hantou i?

²¹Mun dima jo nding leu mun di bon niyai nya hagom leu ba, hi gingat bou niyai him bi sren. Jo nding leu ha di ko-ko nyen ei mpia-bbed him cem.

²²Nimai kin nisar ipai bipia yoni cem imiap nihyet nahamui he di tibim bipek yoni.

²³Allah Nongkom he rino kan tut ningon ki nijoti. Nongkom he rino kan tut puig di ug ndam a.

²⁴Lewo Noni ngat kikau ug bipek dihyei nohon keti. Noni ngat mun nyeng di jo ei gwam nibehei bicap hagom.

²⁵Mpe di Noni yai nisindemti bak hou nimig cem kos tut muk kin dihyei nibikkin yamti cem ba,

²⁶kos tut mpia di biget but eisi nya cem puig di kigyei kin kru mbut kak nya cem,

²⁷leu api Noni ngat ningon ki ningat. Lene tri tut leu api ta ba, yok niyai kep.

²⁸ Allah pai bak tungwatu nya “Suar jiba nibou di cut bak Allah bikon ninyeng mem gima jibiyai ningon ki leu Noni. Ma joom jenti ei minu ting leu mun di kinei nya leu binhyepo jibiyai ningon dor niti leu Noni.”