Read Hatam AYUB 30 Bible Online

AYUB 30 - Hatam bible

AYUB 30

¹Noro tini bu ne yo di igyati nddong bigyo nya iba da bikek. Icig bat nya inok nikinei-kinau di idem mem gima inyohou ditde domba nya bimpu ditde nsien di igya ser domba dima yok bi.

²Yo dima ibon inyeng ei diyai him bi. Lewo ide nisindemti ngwig leu yok tu.

³Imai inggum biwer mindhe bibor apino bitig dino inis ndia gau mem mmun igbit iggum ndigsi di ha he bong.

⁴Yohom kep biei war dino cun-cun nya ei iggum ndigsi bigyem nimeng kin nigau cem.

⁵Nindigsi nya iba ighyet di ten bijji yok noyam kin gi ijji ninggimang kep mun kin nimbrai kep mun cig nya.

⁶Yo dini ibong-bong nyen bidem hak mihyeti nya di itig ei tring behei binok ide ig.

⁷Lene idinyang-dinyang nyen ei bigbehei nindibutti noyam kin mindhe di ibon nimpung ei biei war behei igbit susti.

⁸Yo dima ibon inyeng ba, inyeng jei bi cem. Timiei nya ijji yok leu minu dima tu.

⁹Tini bu ne yo dima ikwei pa tut da. Dinok mun di balor yok bou igyai him ba, ipa ndip da.

¹⁰Ibibon da nok nikinei-kinau kin nisuwok cem bitig dino itrai diimaisi cem.

¹¹Igyai inda leu da bingon sibui sut da lewo Allah sindui sut ba, dinghuisi wei bidisindem bi cem.

¹²Nimpung nihwen bit da dima ihwen da bei doho bei ba, yuhum yam nsi tut dicutti cem.

¹³Isrin ser dinangti ba, igruap mem gima ibindei sar dani. Tungwa hi di bigen ser yok[23] ei mpe di ihwen bit da kan bi.

¹⁴Yoni inok minyei di su dino tu ditde ngug tig niya ngkiemti. Ibram yam kwei biyoom da noyam kin muk di rus di om da.

¹⁵Ningon di ttin bibor om kep da dem kep hou di cut. Dinyeng di jei cut hak. Nituti mem gima dihwen ditde siceu nya pren leu da dem kep hou di cut ninjiriek dati.

¹⁶Son dideu nicunti mem gima dimai lewo niwei kin nidut di hwen da wer cut leu da binggan bi.

¹⁷Dibong mem mmun lo, dinjum nya hagom dut bibor. Nidut di dem kep mup tukti pimo jo kep da buug hon nohonti bi.

¹⁸Allah kat kep sinsun di nggai kep dikimam bipek kin dikimam bingkiem apino sinsun de njui kok yam ei dingutti.

¹⁹Lene ba da bitoi igkrop ba, diwer igkrop apino mumpiang cem kui da!

²⁰Allah e, dahara bak Nani noro agibuhup dihyet bi. Gino dingat nadi bak Nani lene agiyok atingou kep dihyet bi.

²¹Ambuk tut da ba, aba ade nisindemti titut yam bihwen bit da cem.

²²Asindui sut ba, hou yai da nyen. Aba sigau di nimig ten bibor bittem-ttem nyen da.

²³Dikan tut bipia akri da ug ei minu nimai ide. Gima ne mpia di mporo yo di yahagom midem yam eisi ri.

²⁴Dihwen bit no di cut ei nikineiti di hara mem gima dingondut noni bi sren.

²⁵Apo dipim tut yo di yuum mun di buhun bibor bi e? Apo dingondut yo di imati kin igyemti dem bi nya bi e?

²⁶Dingon ya mem ningon nggei-hi-ngeisi kin nipigati nikweisi noro mun di buhun kin nidinditi he rino tau kep da.

²⁷Ningon di buhun kin ningon di ngguk bibor bindei ba, dingon a tut danti bidiyai ninghuisi wei bikwop njap ngwa hagom.

²⁸Ditibap-tibap nyen ei nidinditi lo, nipigati com digai da bi. Dikiju bidiya ei yo di imang bibor yoho bei ba, dahara mem gima hi mpu da.

²⁹Dihyet di ngguk di kiek hiter ningon dem kep nok nsien bigbehei kin ha unta ipimti.

³⁰Dingkek noyam kin mun di prab yem ba, ningkek di dut tigut dingut titut yam.

³¹Nipou yo ne dimiap kep doia di ipai di ibikiek-kiek nyen di biyai dingon nggei-hi-nggei noro tini bu ne dimiap kep nipimti di iba nicot pai ningkom he.