Read Hatam AYUB 31 Bible Online

AYUB 31 - Hatam bible

AYUB 31

¹Diba neheng bipreu ei bipia miditou kep sop gwam nitta pilei nya nggilun bidingon pri kep yok bi sren.

²Notou Allah Di Sindem Bibor bibon nye di tungwatu nya i? Noni ba mindei birop hanyen binye tut igyai munti nya i?

³Noni bindei ba, mun di buhun bibor kin ninggruk biborti cut igkep yo di isibut bibor nya!

⁴Allah kan bidem tut diyai munti nya hagom. Noni ngig niyai kep dimbutti nya hagom.

⁵Diba neheng bipai bipia dibon mun di mbuk bibor ba, dibisinggre mem diris tungwatu nya bi sren.

⁶Disindui sut ba, Allah ba Nide kilo di igbit binai da leu api Noni mikan tut bipia dingon ngun yo.

⁷Gino disrawir leu puig di igbit cem diba doho rok mun di kinei cem sisar di nok map kui dindati cem lene,

⁸nnaba yo di hiter igyem njita bingwig leu ditde beisi ba, njita ngat hagom pror bingwig leu da hak ug.

⁹Gino dingut kanti pri kep disut nitnem ba, diku da kui dimbou bidisuskui noni lene,

¹⁰nnaba ditnem yem njita tut hiter bibong ei pinai hiter nibongti hak ug.

¹¹Gino dibon sisar di mpiei dima ne suar ditug ndei hukum nimai hak ug.

¹²Sisar dima ne mun nibindei sar rin ba, gima noyam kin hum njengti di yem mun di dinyeng tut nya hagom bingwig leu da ri.

¹³Mpe di po ditde awak gom kwei lua tut gi diyai tunggwei sut mun di suar yai leu da pima lene doom dingon bidiba dingon sren bibon bak noni.

¹⁴Gi bi lene notou midiya ei Allah Noho bei i? Tirigi Noni mikwei mbus dingonti lene notou midibuhup nihyet hanyen i?

¹⁵Lewo Allah di pai tes dani ne pai tes ditde awak nya cem bi e?

¹⁶Dingkek ndok tut nuhui mbum nya bidisindui sut kibom nya biba ingon di ngguk bigwam nyen ei bi sren.

¹⁷Tirigi diyem njita nok gi dem ne disindui sut moibihi nya ba, ninggum hwen yok bi sren.

¹⁸Noro dinyohou yok bidimpu yok habiei leu dimien kwei bipek ammani kep.

¹⁹Tirigi dingat no di nuhui mbum di bit bon pek sinsun mem nonti kan bi lene,

²⁰dikwas sinsun dut di diba ditde domba nya inta bibon tut noni bijuk ser ningkek. Apino noni ba ningon titut yam binggei sut da.

²¹Gino diyok dingon gom tut moibihi leu binhyepo noni micut ei nikei noho bei lewo dikan tut bipia nibou nya itti kin da lene,

²²ma hi bindei ba, dinda pang nya hacem dahat leu ba, ntun dinghat him bu bi hak ug.

²³Bit bon dibibon moibihi nok gima kan bi lewo dingon digit tut hukum di Allah mikes ei da dip.

²⁴Diba dingon com ditde ndigban kin mitiei bi sren.

²⁵Dingon jei sut ndigban kin mitiei di dinyeng tut nya bi sren.

²⁶Dikuk da bak mpia njap di kwes kei kin bed mmun di tungwatu nya igyai ngat kei bi sren.

²⁷Mun nyeng cin dima ris da bibindei ba, dinggei sut yok tug hon gi dimei dinda bia bei bidipigo yok bidikuk da bak yok bi sren.

²⁸Suar yo di ibon kep sisar dima itug ndei hukum nimai lewo bindo bipia ikou sut Allah Di Sindem Bibor.

²⁹Dingon kei kep ditde siceu nya di itug ndei mun di buhun tak yok kin mun di kinei bibor di cut igkep yok bi sren.

³⁰Dingat nadi tindei yok leu binhyepo itug ndei nimai bi sren. Leu gino dingat nadi nok gima lene sisar ntun him.

³¹Ditde awak nya di igyai midyai mem da yahagom ikan tut bipia dicigit ngkiai nya kui ig bit leu nok diyai kepti.

³²Dicigit yo di imig dia nya cem kui igya. Disindui sut yok ba, ibong bas hak ei simpak nya bi sren.

³³Hiter iku ide sisar bijo nding leu tungwatu nya igyai him noro diyai igbit igyai kepti dima bi sren.

³⁴Dingon digit tut yo di ikkin kep dinghapti kin yo di ingwes om kep da bi sren. Dikimut duhui bidiku da nyahan ei ig bei drek dip gi dittin tut yo di irom ighyet kui da bi sren.

³⁵Tungwa hi ngig nitingou mem dihyet bi e? Diba neheng bipai bipia mun di tibim ei duhui him hagom ne nijit ri. Handei kon ba, Allah Di Sindem Bibor mibuhup dihyet. Gino no di tte tut da pas kep ditde nitunggweisi nya di noni pai kep da tut bidingat hagom bou diyai him lene,

³⁶midiba dingon di llei bikes srat dima ei dinghat dip bidittin nok topi mas ei dibouti cem.

³⁷Midipai jit ditde niyai munti nya hagom bak Allah. Midinggei ngwig sut danti drek dip bidibrim dingkek kep Noni tirigi diya ei Noho bei.

³⁸Gino dison patok ei hanjop nibikkinti ba, dibipos hi nide dihyei binok ditde bu ba,

³⁹gino diyem njita di diyai leu nide dihyei dima leu api disindui sut dihyei ceu ngat nya ba, ninggum hwen yok lene,

⁴⁰ma gandum-jelai kin gandum-barli hei ei dihyei dimati au. Noro ndia nggwen di tigot-tigau kin sinai kin njung nongkom hei eisi. Da di Ayub dikes dihyet hon tiri.”