Read Hatam AYUB 32 Bible Online

AYUB 32 - Hatam bible

AYUB 32

¹Ayub niji ngkiem tut nonti tut ningon srenti. Gima rino nisut bat ibou ningai pima ikou ser ba, igibuhup nihyet bu bi.

²Noro Elihu di Barakheel nipmot no ya nyen ei mpia dima. Elihu ntun Bus him binggre kin Ram ninsi de. Gi mbun noni om kep ningon di sibui drek dip Ayub di pai niji ngkiem tut nonti tut ningon srenti binjei kep Allah tut mun di cut igkep noni kan bi.

³Ningon sibui sut Ayub nisut bat nya ibou ningai cem. Leu mbro nok gino injei kep Ayub nok no di yai mun tunggwei lo, bit bon iba ighyet dahat nihyet kan bi.

⁴Elihu ne pilei ngat dor njiriek nindigsi nya. Gima rino om ningonti tut nindigsi nya ba, imbrap bingwig leu api noni mbrap bu.

⁵Tirigi noni ngat lo, bit bon ibou ningai pima ibuhup Ayub nihyet kan bi lene ningon sibui sut bibor,

⁶bipai biyok “Dani ne pilei he yo noro jeni ne ndigpoi su. Gima rino apo dipai dingon kanti bi lewo didigit tut je ba, dihig dingon nyen cem.

⁷Dikan bipia suar jeni rima jimbrap bit Ayub a. Suar je di ndigpoi rino jikwas jingon ki tut a.

⁸Noro Allah Di Sindem Bibor de Ninnei he rino yai ningon ki bak tungwatu nya.

⁹Tungwatu nya ingon ki tug hon gi iwer andig-ndau bi. Ba, ingon hukti tut mun di igbit tug hon ide njap nijeisi bi.

¹⁰Gima rino jingig jitingou mem dihyet. Ma jisindui sut ba, dipai dingon kanti bije.

¹¹Tirigi jibuhup mun biyam pima ne doom dingonti tut je tu ba, dibet dingon mem nihyet ningon di ki hi tibim ei juhui him.

¹²Dingig ditingou mem jihyet mungkun kei ba, dimiap lo, jitunggwei sut tu. Bit bon jigindo Ayub nimbrapti di tunggwei kan bi.

¹³Nggon rino jipai bipia juum ningon ki pima tu i? Suar Allah Nongkom buhup Ayub nihyet lewo jikes jihyet hak leu ba, jigibuhup kan bi.

¹⁴Ayub mbrap pijum bit jeni. Noni gimbrap bit da bi. Noro midibuhup nihyet noyam kin jibuhupti nya bi sren.

¹⁵Ayub e, yoni mipai mindei bina bu i? Ingon tai-tai bou ser ba, gi mbun ibuhup ahyetti kan bi.

¹⁶Dibet dingon bidimbrap bi e? Yoni imbrap bu kan bi ba, igya igyati hak bimmou kep yam he.

¹⁷E bi! Nogindini bon nituti mem dibuhup ahyet bidipai dingon kanti bina.

¹⁸Doom dingonti tut nihyet di mpung ei duhui bu bi. Bit bon doom kep dihyet bu bi.

¹⁹Gino dikimut duhui bidigwam hak lene duhui mikimbo dem kep nok aigmui mindhe ngkek di mpung tut ba anggur ngei di nijep ug ri.

²⁰Suar dimbrap tut dingon kanti nya leu binhyepo dingon jo nyahan. Suar dahap diji bidibuhup.

²¹Ditti kin nite hi tirigi jiba jihyet dahat yam bi. Midiba nihyet mmau bimig mbus tungwa hi bi.

²²Digikan tut nisinati mem gima diba nihyet mmau bimig mbus tungwatu nya bi. Gino dikan tut nisinati dima ne Allah mikes hukum kros ei da dip.