Read Hatam AYUB 34 Bible Online

AYUB 34 - Hatam bible

AYUB 34

¹Apo jingon tek ba, jingon ki cem bi e? Lene ma jintu kep dihyet.

³Tungwatu nya ingat igbit njita di nyop kei kin njita di nyop bi. Ba, imiap igbit nihyet ningon di ki ei mpe di intu kep nihyet dima.

⁴Suar nyeni ipai biyam tut munhyet pini leu api ikos tut abia bu.

⁵Ayub pai ‘Dingon ngun noro Allah kou sut gima kos tut ditde munhyet.

⁶Notou mem gima diris mun bidipai kep danti bipia dibon mun tunggwei i? Tini bu ne mbro nok gino ditunggwei sut mun nyeng hi bi lo, dibokti ullen bibor.’

⁷Jingat no di noyam kin Ayub dini hi tu e? Noni ba nihyet bicig Allah bijo kikau,

⁸lene jem nisut bit yo di ibon kep sisar ba, bit-bit nyen yo di isibut nya.

⁹Noni pai bipia nibrim ningkek bibit Allah ningon kanti bindei ba, mun di kei pek kep mem noni bi.

¹⁰Je di jingon ki e, ma jingig jitingou mem dihyet a. Mpaba Allah Di Sindem Bibor mibon mun tunggwei e? E bi!

¹¹ Noni birop bak tungwatu nya dem igbit igyai munti nya. Bibon bak tungwatu nya bit leu imuhup di mitau biyok.

¹²Allah Di Sindem Bibor tunggwei sut gi bon mun di igbit kan bi. Noni tunggwei sut gi bon mun di igbit tut tungwatu nya bi sren.

¹³Allah yai nide nisindemti leu tou i? Tou rino bindei ba, Noni ttei nibou bikos tut mun ei dihyeisi dini i?

¹⁴Gino Allah brim tungwatu nya innei leu yok lene biyai ninnei niyaijo hanyen leu yok,

¹⁵lene mun di ninnei tau nuhwap nsi hagom mimai bidem kep dihyei ndung hanyen.

¹⁶Gino angon ki lene ma angig atingou mem dihyet ba, amiap kep.

¹⁷Anjei kep Allah di ningon gom ba, sindem bibor cem dima e? He ma akan bipia Allah ningon mpo tut giba ningon di gom bimbus tungwatu nya ingonti e?

¹⁸Gino nibou ndig nya kin nibou di inyeng jei nya ibon mun di kinei lene Allah kes hukum ei yo dip.

¹⁹Noni tti kin nibou ndig nya ba, mig mbus yo di inyeng nya leu nikinei-kinau nya bi. Lewo yoni ne Nide tungwatu di pai testi nya ri.

²⁰Mpe hi imai kros hak mem mmun mau. Allah kes hukum ei ninyeng tak kep cig nya dip ba, isar hak. Krop kei mem Noni yai nimai biyok.

²¹Allah nyohou ngig niyai kep tungwatu nya igyai munti nya bingat bidem imbutti-igwamti hagom.

²²Bit bon nidinditi di dindi-kai cem ku yo di ibon sisar nya leu Allah niyai him kan bi.

²³Dem mem gima Allah ndo ngon bou mem njap dima tungwatu yuug bigya ei Noho bei leu binhyepo mbus ingonti bi.

²⁴Mbro nok gino Allah nggok tut biyok niyai kep bi lo, Noni micut yo di inyeng tak kep nya inyeng hak leu yok lene kon nijep nya bigya luei yohoti bu.

²⁵Lewo Noni kan tut igyai munti nya hagom apino ba mmun binggek yok bibindei sar yok cem.

²⁶Noni ttem yok drek dip ide sisar bikes hukum ei yok dip brei bou tungwatu nya igyai him,

²⁷drek dip gi ibit ningon kanti bigyok ngon kep nicukti nya cem bi.

²⁸Yo dima ibindei ba, yo di yuhui mbum nya yahara Allah leu api Noni miap ide nahara Noti.

²⁹Gino Allah kos tut bipia Noni migwam bimmou hak bibon mun nyeng hi bi lene bit bon tungwa dima ba nihyet yai Noni kan bi. Gino ku niimaisi leu yok lene bit bon tungwa hi dima ngat Noni kan bi.

³⁰Noni dimig yo di ikou sut Noni ei bibindei ba, ide limwa nya israwir. Ba, Noni ta yok binok nibou ndig nya di inyeng tak kep tungwatu nya.

³¹Ayub e, apo apai jit ade sisar di abon dima bak Allah tu e? Apreu ei mem Noni bipia abon sisar bu bi tu e?

³²Ahara Noni leu binhyepo ndo ade nitunggweisi nya bina tu e? Aheng tut bipia akes hon ade nibon munti di kinei tu e?

³³Gino akou sut Allah niyai munti nya lene notou ayok ngon mem Noni miyai igbit mun di angon ya mem i? Suar nani rima akos tut gima. Dani midikos tut bi. Apai angon kanti binye!

³⁴Ningat ne yo di ipmem bat nya imiep ingon tu nya kin yo di ingon ki nya di imiap dihyet dima tu yahagom mice tut,

³⁵bibuhup bipia Ayub ba ningon di hukti bi bimbrap lene ba ningon di kan kipa bitri tut nihyet.

³⁶Gino ipigot bram Ayub nihyetti mungkun kei lene mijo nibreisi bipia nimbrapti dem no di sibut nimbrapti.

³⁷Noni ba sisar naham nimbuk kep Allahti bikum nitunggweisi nya lene ba nihyet bicig Noni ei nyeni noho bei.