Read Hatam AYUB 36 Bible Online

AYUB 36 - Hatam bible

AYUB 36

¹Ayub e, mun di dimbrap tut no rinaha yo. Aom angon ba, angig atingou mem dihyet mbigom bu lewo diya hacan mem Allah.

³Diba ditde nikan tutti di nindig bibor bindo brei bipia No di pai tes da ningon sren-srau.

⁴Nihyet nitrowai hi srig dihyetti bi. Ningon ki tut mun cig ningat rin ei aho bei dini.

⁵Allah ne Allah di sindem bibor ri! Ningon dorti tut mun nyeng hagom. Ningwes om tungwatu nya igom cem bi.

⁶Noni gisindui sut yo di isibut nya bigyaijo ninno bi. Noni ba ningon sren bibon nuhui mbum nya di itug ndei ninghuisi wei.

⁷Noni nyohou ngig niyai kep yo di ingon gom nya lene bindei ba, inyeng tak kep limwa nya noyam kin nibou ndig nya cem leu api tungwatu nya inggei sut yok bijo ninno bijo kikau.

⁸Noro gino ba lante ngkimom biteu yok bigyai inghuisi wei ne igyai inghuisi di wei drek dip igyai mun tunggweisi nya,

⁹lene Allah ndo ide sisar kin ide ninggei-nggwang tut yontiti brei biyok.

¹⁰Noni wit huk yok leu binhyepo imiap kep nisok kep yokti ba, ikes hon ide nisibutti.

¹¹Gino ibit Allah nihyet ba, inok awak di inggei sut Noni ne yoni ibong kei igwam kei ba, mun di isuar nya dem mem yok ug bipek ide njap ningwig honti.

¹²Gi bi ne yoni mimai drek dip ide ningon mbumti.

¹³Yo di ikuk yok bak Allah bi dima iku-ku nyen ide nigga biborti. Mbro nok gino Noni kes hukum ei yok dip lo, yahara bak mem gima Noni mpu yok bi.

¹⁴Imai bijet-jop ei nijam di ipilei yo lewo igyaijoti mpung tut ide nimmai sut yonti.

¹⁵Allah ba ninghuisi wei bingginau tungwatu nya. Noni ba mun di buhun biyai ningon huk niti biyok cem.

¹⁶Allah kwek nani leu mun di buhun bibor apino abong kei agwam kei ba, ade meja niyem njita eisi mpung bibor tut njita di mmau kei.

¹⁷Noro tini bu ne abiang ayai munti nibuhunti drek dip ade nimbuk biborti.

¹⁸Asok kep nanti ser nhyema mitiei ningot kepti ris na ba, acut au. Asindui sut ba, ninyeng tut ndigbanti bindei srawir na cem au.

¹⁹Bit bon ade nahara mem nimpu nati kin angkek di sibui kin ade nisindemti nya dem mem gima cuon ayaisi leu hukum di micut igkep na kan bi.

²⁰Ma ayok angon mem mmun di dindi-kai kin tto bou tirigi mben nya isar ningwig hak nitausi au.

²¹Ma asok kep nanti ser nhyema aba angha bak nihyet ba, aham ambuk kep au. Lewo Allah ba ninghuisi wei dima bibindei ba, akes hon ade nibon munti di kinei.

²²Ma ayok ngon kep bipia Allah ne Allah di sindem bibor ri. Guru di mipbor ngat noyam kin Noni hi ningat rinaha e?

²³Tou rima ndo Nide midyai bak Noni bipai kep Noni bipia bon mun tunggwei i?

²⁴Niyai munti bindei ba, Nide nipai testi nya hagom inggei sut Noni bijo kikau. Gima rino suar nani cem akon ninyeng bijo nai.

²⁵Yahagom ingat nibon munti nya tu. Noro tungwa di ningon huk niti tut Noni mungkun kei hi bi.[24]

²⁶Allah dia-diau jit ba, bit bon nyeni ingon dorti tut Noni kan bi. Bit bon ikwop Nide ari bingwam nimangti cem kan bi.

²⁷Allah rino brim nimihip leu dihyeisi lene bindei ba, bumbuhui tap leu api bindei ba, bumbuhui dima nok biget ngwa di cut kwei leu mpia-bbed him.

²⁸Noni siber biget ningei di but kwei leu bumbuhui di jun mpia-bbed him ba, biprok tungwatu dihyeisi dini hagom.

²⁹Tungwa hi di ningon dorti tut bumbuhui nimbutti nya ba, ningon dorti tut kru di cut kwei leu mpia-bbed him ei mpia di Allah gwam niti nibimbiti cem bi.

³⁰Noni pinak kigyei ninjeng di srei bipiga mpia-bbed him titut yam noro muk jou ne dindi-kai bijo nok.

³¹Noni ba biget di but biyai njita bak tungwatu nya[25] Ba, binjei njita di nindig bibor bak yoni.

³²Noni ba ninda bikat kigyei lene bindei ba, ninjeng tot mpia di Noni ndo ei su.

³³Kru di cut dima ne bitto bipia sigau mihwen dihyeisi dini ug ri. Mindhe-ndhe nimuhup tu nya ikan tut bipia jei bi ne hou di nimig ten micut.