Read Hatam AYUB 38 Bible Online

AYUB 38 - Hatam bible

AYUB 38

¹Lene TUHAN ba nibuhupti di noyam kin sigau nibimbiti buhup bak Ayub bipai,

²“Na di aba ahyet hou kin ahyet di nok bu tan ahig bikiek dingon di ki e, anyeng tou i?

³Akiju ba, akrop ade sinsun ba, aya pijum leu api abuhup Ditde nihig ser nati nya.

⁴Gino angon dorti tut mun nyeng mang bibor ne ma abuhup Ditde nibisigbo nati dini. Nipou tirigi dipai tes dihyeisi dini ne angat rin ei siritou i?

⁵Tou rikos tut bipai tes dihyeisi dini ninyanti i? Tou ribrim nai bipap kei ei ninjek dip i? Bon abuhup dihyet kan e?

⁶Mindei ribindei dino cou nipmem di hati dihyei nipmem ninjek dip nya hagom nddong kei i? Tou riprion tig nibiyok ngon kepti ei dihyeisi dini nuhuisi i?

⁷Mpe di pima ne hambong nya ighyet kui yam bipai doia noyam ba, mun di Allah pai tes nya ei gwamti[26] iba ingon di llei bibor bimbos-hi-mbos tu.

⁸ Tou ringgam mbou pmem di hajung ser muk ngeisi tirigi po minyei tigwau bitau kwei leu dihyei ninghopti pima i?

⁹Dani rino dibindei di bumbuhui nggai kep muk ngeisi ningwa dip ba, diba nidinditi binggai kep hagom.

¹⁰Dipek hanjop nibikkinti mem muk ngei bidiwa ser dimbou pmem nya ser nhyema minyei pigau hanjop bi.

¹¹Dipai bak muk ngei ‘Hon tiri! Apigau hanjop nibikkinti au! Ma muk di tti nindig bibor kes hon bipigau hanjop dini au.’

¹²Ayub e, abindei ba, mpia com mem njap bigyoti mbigom tu e, he bi e?

¹³Akes ahyet bak mpia di com nimig mem njap bigyoti bikat dihyeisi dini bimpig sut yo di isibut nya ba, icut kwei leu ninsi di iku yok eisi nya tu e, he bi e?

¹⁴Mpia nipriti bindei ba, nungug nya kin mbang briep nya hagom sieng kei dem kep nok nikilis igtuyapti kin sinsun dut nikropti.

¹⁵Yo di ingon tindur nya ikou sut nipigati di piga digai mem njapti lewo nipigati dima bindei ba, bit bon ibon mun di mbuk nya bit leu igyai kepti nya kan bi.

¹⁶Ayub e, aug ngat minyei bousi nya di biam ei minyei jou tu e? Aya-ya nyen ei muk jou ei nijou mu tu e?

¹⁷Hi ndo dimbou nya di ngkiem ser nimai nya ikieti di dindi kai bina tu e?

¹⁸Akan bidem tut dihyeisi dini nijeisi kin ninyanti e? Gino akan tut ne ma abuhup bida.

¹⁹Akan bidem tut nipigati nikwei leusi kin nidinditi nehei leusi e?

²⁰Akan bidem tut mpia di nidinditi kin nipigati ikwas yam bingkwei hon e? Tirigi ikwei ngat na leu lene asindem mem gima acuk yok bingkwei hanyen ug e?

²¹Ningat ne bon ayai mun dima yok hagom kan lewo ade njap ug ei ari bingwam mang bibor ba, angat rin tirigi po dipai tes dihyeisi dini!

²²Aug ngat ig gudan di dinju biget es kin biget di mbras nok tig njep eisi bou ayai him tu e?

²³Dibet biget dima ei mem nijam di buhun bibor kin nijam di tungwatu nya ikon pran bit yam.

²⁴Akan tut mpia di mpia njap nijobou dip nijoti e? Akan tut mpia di hou mpia nipriti di dut bibor nicut kwei leusi e?

²⁵Tou ribon kon mem biget di mbras biam kak kwei i? Tou ritin puig mem sigau kin kigyei di idor kak kwei i?

²⁶Tou ribindei ba, mpia but ei iggum ndigsi di ha he bong i?

²⁷Tou riba minyei biprok dihyeisi di ngak-cai kin iggum ndigsi bibindei ba, mintu-minta hei hanyen i?

²⁸Mpia di but kin nggou di llet leu susti ibon icig e?

²⁹Minyei es kin nggou es ibon ipmem e?

³⁰Tou ribindei di minyei bon ninggop binok tig i? Lene tou ribindei di es kieng ei muk ningwa dip bibindei ba, ngkiem-kiau i?

³¹ Asindem mem gima angot Kartika di ham mpia-bbed him keyam ba, akwek kuk di kat ham Belantik ei mpia-bbed him e?

³²Ayai nisindemti mem gima abie tut ham mpia-bbed him ngot bidem nijam di bram yam nya e? Ando igbit puig mem Biduk Ndig kin Biduk Mien di ham mpia-bbed him imbut eisi e?

³³Akan tut niggai serti nya di ditri tut bak nipigati ei mpia-bbed him nya e? Asindem mem gima abindei ba, nikos tutti nya dima ndo igbit dingon kanti mem dihyeisi mu e?

³⁴Asindem mem gima aba ahyet nindig bicuk bumbuhui nya e? Abindei ba, mpia but mbras noyam kin minyei di su kep na e?

³⁵Tirigi akes ahyet bak kigyei leu binhyepo ninjeng srei lene kigyei dima mikwei pai bina “Midiyai hagom bit leu angon kanti hak ug!” Lene nok gima e?

³⁶Tou ritri tut tto bou mem Minyei Nil su nindig bibor bak ha ibis[27] i? Tou ritri tut tto bou mem mpia nibut kweisi bak hacig i?

³⁷Tou riningon ki nok gi dem mem gima kwop igbit bumbuhui hagom nimangti ba, tin bumbuhui nok no di tin ampou bibindei ba, mpia but mbras,

³⁸lene bindei ba, biget bibon dihyei ndung binoyam kin igkropti i?

³⁹Angim kan ba, anggok mikwau nok gi dem mem mindhe singa nya kin imien bat nya bibriug kep inggum,

⁴⁰tirigi ibong kep inghuisi ei yahamti ba, ikos dik sir mindhe-ndhe niran cem e?

⁴¹Tou rinyohou mini wou di inggum di imba-mba nyen binggok ser njita nya i? Tou rimpu imien bat nya tirigi yahara Da tut njita i?