Read Hatam AYUB 4 Bible Online

AYUB 4 - Hatam bible

AYUB 4

¹Lene Elifas pai,

²“Ayub e, gino dipai dihyet gom bina lene ma andron da drek dip bi e? Lewo bit bon dikimut duhui kikau kan bi.

³Na di Ayub angginau tungwatu nya imang bibor ba, asindem tut yo di inghuisi jet nya tu.

⁴Ade nipingok tungwatu nyati bindei ba, yo di icut kin yo di inghuisi jet kin yo di igyai nggrop buhun yahagom igyai nisindemti bibrim ingkek hanyen.

⁵Noro tini bu ne tto bou dem mem mun di buhun dima cut igkep nanti bu lo, anghuisi mpig sut ba, angon cut leu su.

⁶Akuk na bak Allah lene abon mun tunggwei sut Noni hi bi sren. Gi nok lene gi igbit rino aba angon com ba, ayok angon mem Noni.

⁷Ma akan-kan nyen tut gini ug e. Mun di buhun bibor hi cut igkep tungwa di ningon sren tu e?

⁸Dingat bou diyai him bipia yo di ikkin dihyei ei miai sisarti kin yo di yahap mun di sibut bibor di noyam kin njita ngan ei dihyei suti yahagom igyai ningat di kinei kin ningat di suwok cem!

⁹Allah ningon sibui sut yok noyam kin sigau di yem tungwatu nya bingwig.

¹⁰Yo di isibut nya igyau-yau nyen ba, inggiling noyam kin mindhe singa noro Allah kimut ninda kep yok bibindei ba, ikwai hagom hwop tu.

¹¹Yahagom imai noyam kin singa di ninggum hwen bibindei ba, imien bat nya ibou buwei bintek gimahap.

¹²Mpe di gom ne nihyet gom tibim kwei lo, gima noyam kin nihyet di nggan kei ei ditingou nsi.

¹³ Dibong dibongti noro mumpriem di buhun gom bindei bidibong mai kan bi lewo nihyet dima bindin da,

¹⁴leu api dingon digit ba, dinghuisi mpig sut cem.

¹⁵Hou di nimig mbris kei gom kui diimaisi bibindei ba, dingkek pikou bibor.

¹⁶Dingat lo, tungwagom ningwes ya bibie doho bei. Ditou kep ningwes dima noro dingat igbit ningat bi. Lene dimiap nihyet gom di tibim kwei leu nimbum-brati di hig ser da,

¹⁷‘Tou ridem mem gima ba ningon di sren biya ei Allah Noho bei i? Tou ridem mem gima ba ningon di kwes biya ei Nipai Tes Cig Noho bei i?

¹⁸Ningat ne Allah ba ningon com Nide awak ei gwamti nya bi. Noni ngat lo, Nide malaikati nya cem ibon mun tunggwei.

¹⁹Gi nok lene notou mem mun di Noni ba dihyei ndung bipai tes i? Gima yok noyam kin atimai di tungwatu nya ico kep.

²⁰Mbro nok gino ninnei jo tungwa hi nuhwap nsi mem njap bigyoti lo, mai binongkom mem mmunti leu api yahagom ingon prion ser noni hanyen bu.

²¹Nide ndigban di nyeng tut nya hagom sar bingwig leu noni leu api noni mai lo, yai ningon ki leu Allah bigyo.’