Read Hatam AYUB 40 Bible Online

AYUB 40 - Hatam bible

AYUB 40

¹Ayub e, gino ahyet jei kep Da di Allah Di Sindem Bibor ne akes ahyet hon e, he ma abuhup mun di dihig ser na tut nya e.”

³Lene Ayub buhup TUHAN nihyet bipai “TUHAN e, duhui buwei. Notou midibuhup ahyet hanyen bu i? Midikimut duhui tut dingon kanti hak ug.

⁵Lewo duhui buwei sut mun nyeng mang bibor binjiriek tu.”

⁶Lene TUHAN ba sigau bibuhup Ayub nihyet hanyen.

⁷Noni pai “Ayub e, akiju ba, akwei ya ei Doho bei dem kep no di pinai leu api abuhup dihyet nok igbit.

⁸Abingon mem gima acuon ser Ditde ningon sren-srausi e? Ambrap gau nanti angon di sren lo, anjei mun di kinei kep Dani e?

⁹Ade nisindemti noyam kin Ditde nisindemti e? Ahyet tibim nok kru di cut noyam kin Da dihyet e?

¹⁰Gi nok lene ma aba anyeng di jei kin angon di jei bimau nanti. Ma ajuk sinsun nibou ndig bitut nikei-kau-keisi.

¹¹Angig ayai kep yo di ingon jei nya leu api anden kau tut ade ningon sibui sut yokti leu api abindei ba, ikuk yok binani hak ug.

¹²Igbit ri! Ma angig ayai kep yo di inggei-nggwang tut yonti leu api abindei ba, ikuk yok ei aho bei. Ma aco kep yo di isibut nya ei igyati.

¹³Ma atig yok ei dihyei jou ba, abikrop yok ei minu nimai nya ide.

¹⁴Gino ayai nok lene midinggei sut na lewo aba ade nisindemti bindei ba, yahagom icut bak nani tu.

¹⁵Aba angon bisrip huk mindhe di nindig krop di ninyeng Behemot ug e.[28] Dipai tes noni kin na di Ayub cem. Noni yem kep minta dem kep nok sapi.

¹⁶Noro angig ayai kep ningut di sindem bibor kin ninggiluk niprip di dor bibor i!

¹⁷Noni su nipu di singga dem kep nok binsip nda ba, nindimuhum nddong kei cem sindem bibor cem.

¹⁸Ninjum noyam kin ngkimom-tembaga di bit bon hi kinam kan bi ba, nimig dem kep nok cou ngkimom nitu.

¹⁹Noni ne mindhe di mipbor ngat dor njiriek mindhe di dipai tes nindigsi nya hagom ri. Da di dipai tes noni rima Dangkom disindem mem gima dipijuk noni.

²⁰Minta bou di nok njita mem noni hei bidem nungug tou nya ei mpia di mindhe-ndhe di niten-pos nya ikek-kek nyen eisi.

²¹Noni bong nyahan ei susti di nitigot-tigausi lene ku no nyahan ei minyei yaisi ei lipig nghousi nya.

²²Sus di tigot-tigau kin biei gandarusa ei mam bei jei gau noni ba, nok nohousi mem gi noni bong kep ninghuisi.

²³Mbro nok gino Minyei Yordan ninggram biam sindem bibor lo, noni kek eisi bidigit tut bi. Mbro nok gino minyei yon gau niimaisi lo, ningon jo nyahan.

²⁴Tou ridem mem gima kat noni bitak niyai ba, ndin bon bisrou nuhwap jou i?