Read Hatam AYUB 41 Bible Online

AYUB 41 - Hatam bible

AYUB 41

¹ Adem mem gima aba simper nindig bipos unggor di ninyeng Lewiatan[29] ba, aba kuk ngot nidwep kan e?

²Adem mem gima aba kuk mbrei bisrou nuhwap lene aba nikoisi bisrou niji kan e?

³Noni hara na leu binhyepo akes noni bimbut e? He mikon ninda ser na e?

⁴Noni mitto ei mem na e, he mipreu kep na bikuk no nok ade awak bijo ninno bijo kikau e?

⁵Noni dem kep nok ha bigbehei di hek di angot nimig ba, apijuk di bindei ba, ade awak sop nya ingat ingwes eisi e?

⁶Nipos kep wau cig nya ikwai mikkin tut noni e, he ma nitri-nipek mun cig nya mikos noni kukiau bibitri tungwatu nya e?

⁷Adem mem gima aba ndra bidat ningkek kan e, he ma aba micim bidat nibou bitau nite hi e?

⁸Gino angget noni mbigom he lene mporo ma angget noni bu bi sren. Bit bon angon prion ser minjina di cut igkep na dima kan bi!

⁹Bikwop no di ngat unggor di ninyeng Lewiatan bou niyai him ningwes mien leu api mai tirimpoi.

¹⁰Gino hi win noni lene noni ugwa-kwei ba, cig-cai. Mimbri kui no dima ningkek biya ei minjina dima noho bei kan bi.

¹¹ Tou rihwen noni leu api ningwes ngun leu nuhui him i? Bitbon tungwatu bidem dihyeisi dini hagom ihwen noni bingwes ngun leu nuhui him kan bi.

¹²Akwei ba, dipui mun bina tut unggor di ninyeng Lewiatan nimbumbati nya kin nisindemti nya.

¹³Bit bon hi yai nide sinsun dut leu noni bidat sinsun pran di noni juk kan bi.

¹⁴Tou ridem mem gima bindei ba, unggor dima hap niji di mpung tut nikwai di sindem bibor i?

¹⁵Ninghim dem kep nok mun di tentara ibipukep ser tibor ninggwenti nya ba, hagom rap yam ba, nghai bibor noyam kin tig mma cem.

¹⁶Hagom rap yam bingkiem-kiau. Bit bon hou coi ug ei ninggreti kan bi.

¹⁷Bit bon hi nggek ninghim tuti nya di rap yam bingkiem bibor kan bi.

¹⁸Tirigi unggor di ninyeng Lewiatan mihin lene ninjeng srei. Niyai piga kei ba, noyam kin mpia njap bigyoti.

¹⁹Hum njeng di cig-cai kin hum mbom di jek nya hei leu nuhui a.

²⁰Hum mmup di noyam kin hum mmup di brou leu yeng jou tau leu nuhwap nsi.

²¹Ninnei bindei njeng hum mbom ba, hum ninjeng srei kwei leu nuhui cem.

²²Nikra sindem bibor bibindei ba, yo di ittau kep noni yahagom ingon digit bibor.

²³Ningkek dip bon ninggriusi hi bi. Hagom ngkiem-kiau noyam kin ngkimom nitu di bit bon tungwatu nya inggek kan bi.

²⁴Ningon nddong kei binoyam kin tig ba, nghai bibor nok tig huk mbrei cem. Noni ttin tut nide siceu nya bi sren.

²⁵Tirigi noni kiju lene yo di isindem bibor nya ingwes mien ba, inghuisi jet cem.

²⁶Bit bon hi ba singau simeda kin micim kin singau tibor biyai nibok bak kan bi.

²⁷Lewo noni bibon ngkimom nitu noyam kin mintu-minta di mui ba, ngkimom-tembaga noyam kin biei di nggun cem.

²⁸Bit bon tungwa hi ba hampiap bijji noni kan bi. Gino hi ba tig bihwen noni lene noni ngat tig dima noyam kin mahai lep he.

²⁹Gino hi ba tom bibui lene noyam kin ba sinai meng gom bibui. Tungwatu nya iba micim bidat noni noro noni pa ndip yok.

³⁰Ninnan di nggai kep ninghopti noyam kin ampou kki di nggwen bibor bikilis igkropti binoyam kin biei ner di bon ninggwenti ba, tungwatu nya ibico kep gandum nintama.[30]

³¹Noni bindei ba, muk ngeisi kiak noyam kin gungei biyon gau noyam kin mini di nirai kui biyon gau yeng.

³²Noni bindei ba, nohoti piga mpia ei ninghim dip ba, nirai kieng kep muk ningwa dip.

³³Bit bon ibinai noni kin mindhe-ndhe nindigsi ei dihyeisi dini kan bi. Noni ne mindhe di bit bon ttin tut hiter kan bi.

³⁴Ningwes om kep mindhe-ndhe di inggei-nggwang tut yonti nindigsi nya hagom lewo noni bon nonti tereu nok nibou ndig di ninyeng tak kep mindhe-ndhe di iten-pos nya hagom.”