Read Hatam AYUB 42 Bible Online

AYUB 42 - Hatam bible

AYUB 42

¹Lene Ayub buhup TUHAN nihyet bipai “TUHAN e, dikan tut bipia asindem bibor ba, ayai kep midyai nya hagom bit leu angon kanti.

³ Gi po ahig ser da “Na di aba ahyet hou cem ahyet di nok bu tan cem ahig bikiek dingon di ki e, anyeng tou i? Lene dibuhup ahyet bidipai dat mun di dingon kiowi tut kin mindur nya di bit bon dingon dorti tut kan bi.

⁴ Lene acuk da bipia suar dingig ditingou mem ahyet ba, dibuhup ahyet gino ahig ser da cem.

⁵Ei nipou pima ne dikan tut mun di hiter nya ipingok dingonti tut he. Noro tini bu ne dingat angat bou diyai him tu.

⁶Gima rino dimmai sut mun di tibim ei duhui him hagom bidigwam atriemti nok bindo bipia dittin ser hagom tu.”

⁷Niabiati TUHAN mbrap bit Ayub tu lene Noni pai bak Elifas “Dingon sibui sut nani kin asut bat cin dima yok lewo jiji kipa tut Da bijipai mun di igbit bi. Noro Ditde awak di Ayub nipaisi rinok jipaisi dima bi.

⁸Nogindini ma jijem sapi nikre ningut muhwindacan kin domba nikre ningut muhwindacan ba, jijem bak Ayub. Lene ma jibui mindhe dima hagom bijindig kep hum ei nimbar hum dokti drek dip jide sisar. Ayub mingat nadi tindei je lene midibuhup nihyet. Mbro nok gino jiji kipa tut Da bijipai mun di igbit bi lo, midibinim kep je ba, suar jibiang jipai munti nya nibuhunti bi. Noro Ayub pai mun di igbit tut Da.”

⁹Elifas kin Bildad kin Zofar igyai hagom bit leu nok TUHAN nicuk yokti leu api Noni buhup nadi di Ayub ngat kep yok.

¹⁰ Niabiati Ayub ngat nadi tindei nisut bat ibou ningai pima tu lene TUHAN bindei ba, Ayub nyeng tut ndigban hanyen bu. Noni yai ndigban nok gi nipou pima mbican bram yam bak Ayub.

¹¹Ayub nikindig bat-nikinjoi bat nya kin nikwohop bat nya ikwei cem kep noni ba, yahagom ibon pesta nindig bibor. Yoni indo ingon di ngguk tut mun di buhun bibor di TUHAN bindei di cut igkep Ayub hagom leu api igwam ser ningona. Lene bikwop tungwagom-gom yai mitiei kin siban mas bak noni.

¹²TUHAN bindei ba, Ayub ningon nggei-hi-nggei nindig bibor ei ningwigsi dor njiriek ningon di nggei-hi-nggeisi nipou pima. Tini bu ne noni nyeng tut domba ningut sribu simnaibrimigtai kin unta ningut sribu muhwindagom kin sapi ningut sribu can kin keledai ningut sribu gom.

¹³Ayub yai nipmot bat nya ibou muhwindacan kin nipmisop bat nya ibou ningai hanyen bu.

¹⁴Noni jem nipmisop mighumbou ninyeng Yemima bijem nipmisop kieti ninyeng Kezia lene jem nipmisop nipumiap ninyeng Kerenhapukh.[31]

¹⁵Sop nindigsi nya bidem minu dima hagom hi ubbu bibor noyam kin Ayub nipmisop bat nya bi. Yoni cem iba yo kep mun di icig nyeng tut nya noyam kin ikijam bat nya.

¹⁶Ayub de njap ug ei ari bingwam sratus gom ningot bitai bu ba, noni ngat nignyon bat nya kin nignyon bat imunggwom bat nya yahagom bou niyai him.

¹⁷Niyati nddong bibor leu api ninnei kimbas bimai ba, noni ug bong bit nidigup bat-nidigai bat nya.