Read Hatam AYUB 5 Bible Online

AYUB 5 - Hatam bible

AYUB 5

¹Ayub e, ahara hak leu api angig atingou mem no di buhup ahyet ug. Malaikati gi tou rimpu na tirigi ahara noni i?

²Yo di ingon mbum nya yongkom itug ndei nimai drek dip gi indron hiter.

³Dingat yo di ingon mbum nya di ibong kei igwam kei bou diyai him noro dimbriom ide ig bei nsi nya kros hak.

⁴Hi dima nyohou imunggwom bat nya bimbrap gau yok ei nikei noho bei bi.

⁵Yo di inggum bibor igyem njita hagom bingwig leu yo di ingon mbum nya ide beisi bitut gandum di hei ei nitigot-tigausi. Yo di indwau sut ndigban igyem yo dima ide mun di inyeng tut nya bingwig leu yok.

⁶Ningon sibutti tau kwei leu dihyei jou bi, mun di buhun tak tungwatu nya hei ei miaisi nya bi sren.

⁷Igbit ri! Tungwatu nya ibindei ba, mun di buhun cut igkep yonti dem kep nok hum bom di jek nyen nya.

⁸Gino mun di cut igkep na di Ayub micut igkep dani bu lene midahara Allah bidibrim dingkek kep Noni. Midikes ditde munhyet ei nindati.

⁹Allah de midyai nya hagom dor tunggwei bibor. Bit bon singon dorti tut kan bi. Bit bon sikwop kep Nide mindur nimangti kan bi lewo mindur dima ngwig hon nohonti kan bi.

¹⁰Noni kes biget di but kwei ei dihyeisi dini bibindei ba, beisi kin susti hagom ndot bibor.

¹¹Noni ne Allah gom ngat di bindei ba, yo di igyai mun mmuti itug ndei inyeng di jei ba, yo di ingon ngguk bibor nya igyai nillei.

¹²Noni bigen ser yo di ingon mang nya ide nikos tutti nya bibindei ba, ide midyai nya ngat ningat hi bi.

¹³ Noni bindei ba, yo di indin bon mem hiter ibiam ide bon dima hanyen apino mun di yuhum yamsi tut pek kep mem yok bi.

¹⁴Nidinditi nggai kep yok mem mpia ngket bibindei ba, itibap-tibap nyen lewo nindibut nggai kep yok.

¹⁵Noro Allah teu yo di yuhui mbum nya bingwes ngun leu nimai ba, ingwes ngun leu yo di yoom kep yok indati.

¹⁶Tini bu ne yo di ima mun nyeng hi bi nya igyai ningon di nggan-triot kei hanyen bu lene yo di isibut nya igwam bimmou lewo Allah bindei ba, ikimut yuhui.

¹⁷ Gino Allah sok kep na lene ma angon nggei-hi-nggei! Gino Noni hwen bit angonti lene ma awok tut au.

¹⁸ Gino Noni bindei ba, abok lene Noni mingot kep abok dima hanyen bu. Gino Noni bui na lene Noni mikinding na hanyen bu.

¹⁹Gino mun di buhun bibor om kep na lene Noni miteu kep na leu ba, angwes ngun.

²⁰Gino ninggum hwen na lene Noni mibindei ba, amai anggum bi. Gino pran cut lene Noni miteu na ba, angwes ngun leu siceu indati leu binhyepo amai bi.

²¹Noni miteu na ba, angwes ngun leu yo di ikkin kep anghapti. Gino mun di cok tut tungwatu nya tau kwei lene Noni mibindei ba, attin tut bi.

²²Gino tungwatu nya imbuk tut yam ba, ninggum hwen yok cem lene mporo angon mijo nyahan ba, apa ndip yok hak ug. Gino mindhe di niten-pos nya ittau kep na lene mporo attin tut yok bi.

²³Gino akkin dihyei ei miaisi lene tig nya misigi ser midyai di ayai dima bi. Mindhe-ndhe bigbehei di niten-pos cem mittem na bi.

²⁴Mpe dima lene abong kei agwam kei ei ade prak mengti. Tirigi ayok ayai kep ade domba nya lene mporo angat lo, hi pror bi noro hagom ikkou nyahan.

²⁵Bit bon hi kwop agnyon bat nya imangti kan bi lewo imangti noyam kin abris meng nimangti.

²⁶Mporo ade njap ug ei ari bingwam mang bibor ba, awer andig-ndau ba, gima noyam kin gandum di len di ikos nintam bi bibou tto bou dem ug e.

²⁷Ayub e, nyeni niyok niyai kep mun di ditri tut bina hagom wer ninno tu ba, hagom igbit ri. Gima rino ma ace tut hak ug.”