Read Hatam AYUB 6 Bible Online

AYUB 6 - Hatam bible

AYUB 6

¹Leu api Ayub buhup “Minok gino ibakilo dingon nggukti nibuhunti,

³ne nibuhunti midor tunggwei iggum muk ndigsi nibuhunti nya. Gima rino gino dinyohou yai sut dimbrapti nya bi bidingon sror lo, ma jinga leu tut au.

⁴Allah Di Sindem Bibor de tibor tibim dingutti. Mun di nok krisieu silipti tibor dima ninggwenti bipijuk dinghuisi titut yam. Allah nicut igkep dati biyai dingon ttin bibor noyam kin siceu di ittei yam mem gima ikon pran bit da.

⁵Keledai ningon cut hon niyem kep mintu-minta di nggriu. Nok gima tut sapi cem tirigi niceu ba njita di dem mem niyemti bihyen kep.

⁶Noro tou rikimam njita di nyop bi i? Tou riyem guli dunggwei nisuai ngun i?

⁷Dingon yem njita di nok gima bi lewo bindei ba, dingon him muwei sut.

⁸Nggon rino Allah ba ninghim bak ditde nadi i? Nggon rino Noni ngig nitingou mem dahara Noti bi i?

⁹Dikan bipia nna ba Allah co kep da bidinem-nnai ug. Nnaba yai nibou tut da biyai nimai bida ug!

¹⁰Niyai munti dima migwam ser dingon apino midiba dingon di llei bipri-pri nyen drek dip dinghuisi di wei. Dibit Allah Di Kwes-Kwau nicukti nya ba, ditimbe tut bi sren.

¹¹Dani dingat rin tug hon nisindemti mindei i? Diba dingon com mindei di bindei dino diyaijo jei bu i?

¹²Dinghuisi sindem ba, noyam kin bor ngug e? He dingut noyam kin mun di iba ngkimom-tembaga bibon e?

¹³Dinggok tungwatu dima mpu da lo, dindei bi. No di miteu da bidingwes ngun hi bi.

¹⁴Mbro nok gino diba dinghim bak Allah Di Sindem Bibor tu e, he bigyo e lo, disuar disut ningat dima mpu da tirigi ninghuisi wei dini hwen da.

¹⁵Noro disut bat jen, bit bon diba dingon com je ba, dibram kui je kan bi. Lewo jinoyam kin mbang tirimpoi di pingge drek dip biget di but bi pimo.

¹⁶Jinoyam kin minyei di ningei jo nyahan bikingkrai yam cem drek dip es di cut bikieng kep ningeisi ba, kingkrai yam,

¹⁷noro mpe di nijam di biang ngei cut lene es ninggop kin es di kieng kep minyei ngwa dip jet nyahan hak leu ba, hi gingat gima bu bi. Minyei pmot pingge kikau ug ei nijou ba, noyam kin nggileng dip.

¹⁸Nimpung di ibri unta nya di ittei yam ug ei iggum ndigsi inggok minyei mem idut kep inggobiausi lo, israwir drek dip ba, ihwou-hwou wai apino ibimai ei iggum ndigsi dima.

¹⁹Nimpung di ibri unta nya kwei leu minu Syeba kin Tema inggok minyei dima ba, ingon ya mem gima idut kep inggobiausi,

²⁰igyok ingon mem minyei noro ide niyok ningon memti dima pren hanyen tirigi ikwei krau mbang tirimpoi di nok nggileng dip hak.

²¹Disut na e, mbang tirimpoi dima bindo tut nani ri. Angat ninghuisi wei di cut igkep da ba, adigit tut drek dip leu api aom na leu da.

²²Nggon rino ayai nok i? Apo dahara na leu binhyepo akwas mun nyeng hi tut da e, he angot kep tungwa hi mem gima mpu da e, he angkiem ser diyaisi ba, ateu da leu ditde nitok di ngondut tungwatu bi ninda nsi e?

²⁴Handei kon ba, apingok dingonti lene abindo ditunggweisi bida hak ug! Midigwam nyahan bidimiap kep mun di ambot kep tut bida nya hagom.

²⁵Nipingokti di sren kei bindei ba, tungwatu nya ingon huk niti noro ahyet nok bu tan bibon ninyeng bi!

²⁶Akan bipia dimbrapti pima ne hou di dimiep atingou he ri. Gi nok lene nggon rino abuhup dihyet di diba dingon di cut leu pima bipai bina i?

²⁷Gima he bi noro ako ba, abinggok tut mun di mipek kep mem munggwom moibihi. Noro aris mun leu asut ningat leu binhyepo abindei ba, anyeng bibor!

²⁸Angig ayai kep da. Midiris mun bina bi sren.

²⁹Akes hon hak ug! Ma aba angon di sren bibon da! Ningat ne dibon mun tunggwei sut hi bi. Gima rino ma apai kep da au.

³⁰He ma angon kan bipia diris mun e, he bit bon dimig mbus gikei kin gikinei kan bi e?