Read Hatam AYUB 7 Bible Online

AYUB 7 - Hatam bible

AYUB 7

¹Tungwatu nya igyaijoti dem kep nok no di ikus nok pien mem gima ibikon pran. Igyaijoti buhun noyam kin no di nahanggwap mbilen kep midyai di buhun niyaijoti.

²Igyaijoti noyam kin awak di yok ningon mem niceu di yok niprip kep noni. Igyaijoti noyam kin no di yai kep midyai biningon ya mem nimuhup di mittau binoni.

³Diyaijo mikui-kausi bikwop bed di bram yam. Dinggwen bibor bikwop mmun di bram yam.

⁴Bit bon dibong mai mem mmun jei kan bi. Diyok dingon mem mpia nipriti lewo bit bon digibong mai kan bi.

⁵Njingwoi pio dingut titut yam ba, nimpang di ngak-cai ngwig kep dingkek dip. Dingkek bok-ba ba, nuom huisi.

⁶Diyaijoti ne mikui-kausi rin bimbut sindem ndam ningwig honti. Nimbut sindemti dima dor tunggwei mong naham di tukan minghas bindei mbut bibien minghas a.

⁷Allah e, ma ayok ngon kep bipia diyaijoti noyam kin ninnei di ihi ei ihwap nsi he. Dingon nggei-hi-nggeisi pror leu da bibon niceti di mijo bi sren.

⁸Angat da mem nijam dini noro jei bi ne disar ug ri. Gino anggok ser da lene mporo angat da bou ayai him bu bi sren.

⁹Noyam kin bumbuhui di jun mpia lene pren hanyen ba, tungwatu nya cem mporo imai lene igingkwei hanyen kan bi. Yo di ikan tut noni nipou yo yahagom ibbwe ser noni bihigom. Igiyok ngon kep no dima bu bi.

¹¹Gima rino bit bon duhui ngkek sindur kan bi! Bit bon doom kep dingon ngguk biborti kin dingon mpoti kan bi. Suar dahap diji bidimbot kep tut nimpo-mpamti di jo ei dingon bei.

¹²Nggon rima angig ayai kep da ba, aya ser da kikau i? Akan bipia dani ne mindhe naga di niten-pos di bong ei muk jou[7] rin e?

¹³Mbro nok gino dibong kep dinghuisi leu binhyepo niweisi pren leu da ba, dingon ngguk biborti wer cut leu da cem lo,

¹⁴aba mumpriem di biyai nittinti bihwen da bibindei ba, ningat-hi-ngat di kinei kin gi bindei bidingon nde cem pijuk dingon,

¹⁵bibou dillei sut gima hi om ku dikimam bidimai hak ug e leu gima diyaijo ei dingut di mpung tut ningut wei biborti dini.

¹⁶Dinghuisi jet ba, dingon kou diyaijoti dini bidingon llei ndam dimaisi hak ug. Ma asindui sut ba, digwam bidangkom lewo diyaijoti dini bon ninyeng mem da bu bi.

¹⁷ Nggon rima tungwatu nya ibon inyeng ei ayai him i? Nggon rima ayok ayai kep igyai munti nya kikau i?

¹⁸Anggok tut nide niyaijoti bikwop njap tekti ba, abingon niyaijoti bikwop nituti hagom.

¹⁹Apig api akiek aho tai leu da leu binhyepo dipinde dirai i?

²⁰We! Na Di Aya ser da e, ditde sisar bindei ba, mun nyeng hi sar leu Na e? Nggon rino adimig da ei ba, arok kik da leu binhyepo aprindei da i? Apo dinok mun di buhun di buhun tak Na e?

²¹Bit bon akos ser ditde sisar bi sren e? Dem tut gima adip tut ditde sisar bi sren e? Jei bi ne midiprion dingut ei jui nsi apino mporo anggok da lo, angat dingat bu bi sren.”