Read Hatam AYUB 9 Bible Online

AYUB 9 - Hatam bible

AYUB 9

¹ Noro Ayub buhup “Ningat lene dimiap tut mun di apai dima yok hagom nipou su. Noro tungwa tou rima kui dip Allah bibindei ba, Allah cut bak i?

³Gino Allah hig ser tungwatu nya tut mun nyeng nimangti sribu gom lene bit bon hi sindem mem gima buhup nihig serti dima gom ngat he kan bi.[8]

⁴Tut Allah ne ningon ki bibor ba, sindem bibor cem. Tou rino sindem mem gima kui dip Noni i?

⁵Allah sindem mem gima son nungug leu nijoti ba, tri tut niyai munti dima nipou bak tungwatu nya bi. Noni ba ningon sibuisi kin nigga biborti bikiek nungug nya binggek ningwig.

⁶Allah bindei ba, ngkit cut bibindei dihyeisi dini ugwa-kwei. Noni bindei cou nipmem di hati dihyei nipmem ninjek dip cem bingmai-bingmai nyen.

⁷Allah sindem mem gima ggai ser mpia njap ba, pri mem nijam njap tekti bi. Noni cuon ser ham mpia-bbed him nya ba, hi dima jimjit mem mmun bi cem.

⁸Allah sindem mem gima prion mpia-bbed him ba, hi dima mpu Noni bi. Noni co kep mindhe naga di bong muk jou bidram ninghim cem.[9]

⁹ Noni pindur nimpung ham ei mpia nibiho lene ei mpia-bbed him cem. Ham dima ninyeng Ham Biduk kin Ham Belantik kin Ham Kartika.

¹⁰Bit bon ingon dorti tut Nide mun di bon bou ninda him nya ba, isindem mem gima ikwop kep Nide mindur di bon nya cem kan bi.

¹¹Allah mbut hammi doho bei noro digingat ningat bi. Noni ningat rin simin dintig tta bikriau da lo, brei bida bidingat ningat bi.

¹²Noni pos mun nyeng hi bit leu nijoi suti lene tou rima brim ningkek biggai ser Noni tut i? He ma tou rima brim ningkek bihig ser Noni ‘Mei, abon mindei rigima i?’

¹³ Allah goom kep niggati kin ningon sibuisi bi ba, Noni co kep yo di yahati tut mindhe Rahab[10] cem ba, icut bak Noni.

¹⁴Gima rino notou mem gima dikui dip Noni i? Midiba dihyet di notou bibuhup nihyet hanyen i?

¹⁵Mbro nok gino ditunggwei mun nyeng hi bi lo, disindem mem gima dikui dip Noni bi. Noro doom danti ba, dahara ditde nikei di Allah leu binhyepo ngondut da he.

¹⁶Gino Noni sindui sut da, bidahara Noni lo, dingon kiowi eisi bidipai jit e, Noni mibuhup sihyet e?

¹⁷Allah ba sigau bihwen da bidinem-nnai bikum ei dinghuisi wei mikui-kausi.

¹⁸Noni sindui sut bidihi dinnei poi mien cem bi. Noro bindei ba, diyaijoti mpung tut mun di mpo-mpam mang bibor.

¹⁹Gino diba ditde nisindemti bikui dip Noni lene Noni buhup hak yo, dingat rigini. Gino dipai kep Noni drek dip munhyet gom ne tou rimbrap gau da bijem Noni kwei ei nikei noho bei i?

²⁰Mbro nok gino dingon ngun lo, Allah mipai kep da drek dip nihyet di jo duhui. Noni mikiek dihyet bibindei ba, dihyet pai kep danti.

²¹Dibon mun tunggwei hi bi noro nna ba dingon cut leu su. Dikou sut ditde niyaijoti. Mun di micut igkep da bon ninyeng mem da bu bi. No di bon mun tunggwei kin no di bon mun igbit yahacem ide mun di yuum ei igyaijo ningwig honti noyam. Allah mibindei sar yahacem.

²³Mpe di no di bon mun tunggwei bi mai kros lene Allah pa he.

²⁴Allah kes dihyeisi dini bak yo di isibut bibindei ba, nikei nya yahagom igyai tu. Allah bon mun nyeng dini hagom tu. Gi bi bon tou bu i?

²⁵Ditde njap nya dor sindem bitunggwei da lene bisar ba, mun di kei hi pek kep mem da bi.

²⁶Diyaijoti tunggwei da haninyai dem kep kibar di mbut sindem ei minyei ngwa dip ba, dem kep hacam di dwop juk bisus mun di yem cem.

²⁷Gino dibingon mem gima dikwai tiei ba, diba dingon di nggei-hi-nggei bipa cem dibingon mem gima dingon prion ser dinghuisi weisi cem lene dingon nggukti ngkwei hanyen biyon igkep da. Lewo dikan tut bipia Allah no pai kep da drek dip ditde nitunggweisi nya.

²⁹Gino dingon mui lene nggon rino dingon cut leu hak bi i?

³⁰Bit bon sabun tibim tut ditde sisar di dibon nya kan bi!

³¹Allah tur dani ei jui mumpiangti apino ditde sinsun kou sut da.

³²Gino Allah ne tungwatu he rin lene bon dibuhup bak. Bon nahacem nuug ya ei nikei noho bei mem gima nikwam minggwen bit yam ser nyende munhyet ninyeng hagom.

³³Noro nikei di kos tut nyende munhyet biya hacan mem Allah kin dani hi ningat rin bi.

³⁴Dahara ser Allah leu binhyepo kes ninda tut gi ba buhun bida leu ba, om kep mun di buhun bibor dini ug ei minu ting leu da cem!

³⁵Dittin tut gima dimbrap bit Noni bi. Handei kon ba, nogindini midimbrap bit Noni lewo dikan tut dingonti.