Read Hatam MAZMUR 10 Bible Online

MAZMUR 10 - Hatam bible

MAZMUR 10

¹TUHAN e, nggon rino Nani ting bibor i? Nggon rino aku Na leu nye mpe di mun di buhun om kep nye i?

²Yo di isibut iba ingon di jei bico kep yo di yuhui mbum nya. Abindei ba, ide jala mikat yonti hanyen drek dip.

³Yo di isibut irai pri tut ingon kanti di kinei bibor nya. Yo di idrui bou ngwak irom ighyet kui TUHAN bikou sut Noni cem.

⁴Yo di ibon sisar nya ingkek ndok tut TUHAN lewo iba ingon di jei bikan-kan nyen bipia Allah bon ninyeng mem yok bi.

⁵No di sibut nggok minggok ba, ningat mang ntun nide midyai nya him. Noni kan tut TUHAN nicukti nya ba, ningon huk niti tut cem bi. Ningwes om kep nide siceu di iba nitok binoni yahagom.

⁶Noni kan “Bit bon diyai mun tunggwei kan bi. Midicut ug ei mun di srou dati bi sren bijo ninno bijo kikau.”

⁷ Nihyet mpung tut nisigionti kin niris munti kin nihyet nibico kep tungwatu nyati. Nihyet di ndo ningon sibuisi kin ningon kineisi cem tibim kwei leu nuhui him.

⁸Ba, ku no nyahan ei nindingti bidem minu mien nya mem gima yai nimai bak yo di ingon ngun nya. Noni yok nitta kep yo di inghuisi jet nya ba,

⁹om no nyahan ei nindingti noyam kin mindhe singa di om no nyahan ei war behei. Noni kos dik ser simpak nghas bitindei yo di yuhui mbum nya bikat yok tut ibok-ba bikri yok ug.

¹⁰Noni ba nide nisindemti bindei timek yok binjei yok sindem ug ei dihyeisi.

¹¹Noni kan “Nna ug! Allah kiek ningha bak sa bingig niyai kep sa bi ba, mingat sa bi kikau.”

¹²TUHAN e, akiju ba, akes hukum ei yo di isibut nya dip hak ug! Ayok ngon kep yo di ide siceu nya ihwen bit yok nya!

¹³Nggon rino no di sibut nihyet wer mpiahi tut Allah bikan bipia Allah mikes hukum ei noni dip bi i?

¹⁴Noro ningat ne Nani angat gima tu ba, angig ayai kep niduhug-duhug nyenti kin niweisi. Ba, atin ei kikau mem gima ampu yok. Yo di isindem bi nya ikes yonti ei anda nsi. Ampu kep yo di yuhui mbum nya kikau kwei bipek ammani kep tu.

¹⁵Ma adahat kep yo di isibut kin yo di ingkek ndok nya ide nisindemti leu yok ba, akes hukum ei yok dip drek dip ide nibon munti nya kikau bibou ikes hon ug e.

¹⁶TUHAN ninyeng tak kep limwa nya bijo ninno bijo kikau. Ngkiai nya di ikan tut Noni bi nya misar bingwig leu Nide dihyei a.

¹⁷TUHAN e, ningat ne amiap kep yo di ibon inyeng bi nya ide nadi leu api abiwin kep ingonti.

¹⁸Ambrap gau moibihi nya kin yo di ide nitok joti nya ihwen bit yok nya tut ide munhyet leu binhyepo ide nitok joti nya mibindei ba, ingon digit bu bi.