Read Hatam MAZMUR 102 Bible Online

MAZMUR 102 - Hatam bible

MAZMUR 102

¹No di um mun di nggruk bininghuisi jet-jop nso bak TUHAN.

²TUHAN e, angig atingou mem ditde nadi. Asindui sut ba, dahara Nati tibim bipek atingou nsi ug e.

³Ma akiek Aho ttai leu da mpe di mun di buhun buhun tak dani au. Mpe di dahara Na lene amiap kep ba, abuhup dihyet haninyai!

⁴Diyaijoti dem kep hum mmup di pren hanyen. Dinjum nya mbom bidem hum mbom.

⁵Dinghuisi jet bidisindem bi dem kep mintu-minta di mui pimo ba, njita nos da cem.

⁶Dahara nidut-niwei tignam bibor. Ditta cut ba, jo dingkek di nggai dinjum nya he.

⁷Dinok ha undan di teu ei iggum ndigsi kin swen di teu ei nikinei-kinausi di ha he bong cem.

⁸Dibong lo, diyai ngkiem. Dinok ha di ningwes srek di mpia ntus tut ei cau dip ba, bit bon digibong mai kan bi.

⁹Siceu nya iba ighyet bicig da ei njap jei ba, yo di igga da iba dinyeng bisigion yam.

¹⁰Atriem ndung ne ditde njita rin ba, diyai nggwei srig gungei di didutti.

¹¹Lewo aba Ade niggati di cig-cai bikat da ba, acom da.

¹²Ditde njap ug ninna bidem kep ingwes di ingat mem mmunti. Didem kep minta di mbris.

¹³Noro TUHAN e, Nani ne Nibou Ndig dijo ninno bijo kikau ri. Tungwatu nya ide nintun him yamti di bram yam nya migyok ngon kep Na.

¹⁴Mporo akiju ba, angondut Sion yo. Ngon bou dem mem gima angondut minu ndig dima.

¹⁵Mbro nok gino ngkiai nya inggek Sion binggek sinsiou tu lo, Ade awak nya ingon ngakei mpia dima. Mbro nok gino Sion wer ndung-diem tu lo, yoni ingondut minu ndig dima.

¹⁶Ngkiai nya mittin tut TUHAN De nisindemti. Ninyeng di jei bindei ba, nibou ndig nya yahagom ikuk yok biNoni,

¹⁷tirigi Noni win Sion hanyen bu bindo ninyeng di jei brei biyok.

¹⁸Noni mimiap kep Nide limwa nya di iwer nikinei-kinau nya ide nadi lene rok yok tut ighyet di yahara Noni bi.

¹⁹Ma jipas kep TUHAN nibon munti nya hagom mem munggwom nintun him yamti di bram yam ma kwei bu leu binhyepo yo di isrek bigyo cem mikon ninyenga.

²⁰TUHAN cap kwei leu nigwam eisi di kwes-kwau ei nanaisi bingig niyai kep dihyeisi dini.

²¹Noni miap kep yo di isima nya ide ninso-nso nyenti bikwek yo di itug ndei hukum nimai nya.

²²Leu api Nide limwa nya mitri tut ninyeng bidem minu ndig Sion bikon-kon nyen ninyeng ei minu ndig Yerusalem,

²³ei mpe dino ngkiai nya kin ninyeng tak kep limwati nya midem yam ei mem gima ikuk yok bak TUHAN.

²⁴TUHAN dahat ditde nisindemti ei mpe di po dipilei yo bibindei ba, ditde njap cun.

²⁵Leu api dahara Noni “Allah e, ma ayai dinnei leu da mem ditde njap nahacanti dini au.” Na di TUHAN ayaijo ninno bijo kikau.

²⁶ Nipou yo lene apai tes dihyeisi dini ba, mpia-bbed him cem anda ceti di abiyai ri.

²⁷Gima yok hagom misar noro Nani ne Angat rin kikau. Gima yok hagom minok sre nghas di sgwa leu api acom nok icom sinsun timiei bisar.

²⁸Noro Nani ne noyam kikau ba, ayaijoti ug hon nohonti bi sren.

²⁹Nyeni nignyon bat-nidrot bat nya mibong kei migwam kei lewo igwam coi anda nsi ba, anyohou ide nintun him yamti di bram yam nya.