Read Hatam MAZMUR 103 Bible Online

MAZMUR 103 - Hatam bible

MAZMUR 103

¹Doia Daud. Dinnei e, ma anggei sut TUHAN! Danti njem-nnei e, ma jinggei sut ninyeng di kwes-kwau.

²Dinnei e, ma anggei sut TUHAN leu api abbwe ser nisingat tut dati au!

³Noni kos ser jide sisar hagom bibindei dino jikei hanyen leu ninggwenti di hwen je hagom.

⁴Noni teu ayaisi ba, angwes ngun leu jui nsi ba, ningon ngakei nati kin ningondut nati bindei dino ayai mun di kei nya.

⁵Ayaijo tug hon mun di kei di Noni njei bina apino apilei jo bidem singa kin hacam krubri.

⁶TUHAN ba ningon srenti bikos tut mun di kei bak yo di ibon inyeng bi nya.

⁷Noni ndo ningon kanti brei bak Musa bibindei ba, mben Israel ingat Nide mindur di sindem bibor nya bou igyai him cem.

⁸ TUHAN ningon ngakei nye bingondut nye cem. Noni bet ningon mem nye ba, ningon mpung tut ningon ngakei tungwatu nyati di ug hon nohonti bi sren.

⁹Noni sinsam tungwatu nya ba, ningon sibui sut yok kikau bi.

¹⁰Noni kes hukum ei nye dip dem igbit ide sisar di ibon nya ba, birop binye dem igbit ide nitunggweisi nya bi.

¹¹Ningon ngakei tungwatu di ikuk yok biNoni nya nindig bibor dem kep nok mpia-bbed him nanaisi di anai.

¹²Noni com ide sisar ug ei minu ting bibor dem kep nok mpia nipriti kin nikimbasti niting leu yamti.

¹³TUHAN ningon ngakei yo di ikon ninyeng tereu nok andigpoi di ningon ngakei nimunggwom bat nya.

¹⁴Lewo Noni kan bidem tut nyeni inghuisi biyok ngon kep bipia Noni ba dihyei ndung he boop nye binok tungwatu.

¹⁵Tungwatu nya ide njap jei bi binoyam kin mintu-minta susti di hei-hei gwai leu api nitou kieng.

¹⁶Mpe dino hou kuisi lene nitou kieng leu api pror hanyen ba, hi kan tut nijoti bu bi.

¹⁷Noro TUHAN ningon ngakeisi kin nisingat tutti jo ninno bijo kikau mem yo di ikuk yok bak Noni buug ninno mem ide nintun him yamti di bram yam nya,

¹⁸di ikrau kep gi preu di Noni preu ei mem yok kin yo di iba ingon di gom bibit nicukti nya.

¹⁹TUHAN ta nide banggo mbrei ei gwamti. Ninyeng tak kep mun nyeng hagom.

²⁰Je di malaikati di jisindem di jibit nicukti nya ba, jingig jitingou mem nihyet cem e, ma jinggei sut Noni.

²¹Je di TUHAN pai tes je nya kin je di jinok Nide awak nya ei gwamti e, ma jinggei sut Noni.

²²Je di TUHAN pai tes je nya di jingat rin ei minu di ninyeng tak kep nya hagom e, ma jinggei sut Noni. Dinnei e, ma anggei sut TUHAN!