Read Hatam MAZMUR 104 Bible Online

MAZMUR 104 - Hatam bible

MAZMUR 104

¹Dinnei e, ma anggei sut TUHAN! Ditde TUHAN Allah e, anyeng jei bibor! Anyeng jeisi kin Ade nisindemti dem kep nok sinsun nibou ndig di ajuk,

²lene aba nipigati binggai kep Nanti. Angig mpia-bbed him nok no di hok prak meng ba,

³angot ig mem Nanti ei minyei ngwa dip di jo anai gwam nibehei[27] lene apri ba, agwam ei bumbuhui nya di nok Ade kroba pran kin hou ninyehei dip ba, abidor-dor nyen.

⁴ Asok ahyet ei hou dip noyam kin asok ahyet ei no di tri tut angon kanti dip. Abindei ba, kigyei ninjeng srei dem kep nok Ade awak nya.

⁵Akes dihyeisi dini binddong kei bijo ei cou nipmem dip leu api ugwa-kwei bi bijo ninno bijo kikau.

⁶Muk ndigsi nggai kep dihyei dini nok ban ba, minyei biam bico kep mbigdip nya hagom.

⁷Tirigi asinsam minyei ne minyei ngkwei hon. Minyei miap ahyet di nibimbi bong dem kep nok kru lene hagom biam sindem bisri hanyen.

⁸Minyei dima biam bikriau mbigdip nya kikau ug ei mbangti nya ei mpia di atin ei su.

⁹Apek hanjop niya kwas yamti mem minyei leu binhyepo pigau hanjop dima buut kep dihyei ninjek dip hagom bu bi sren.

¹⁰Abindei ba, minyei bousi nya hei bibiam kak mbangti nya ba, minyei pmot nya biam ei nungug kieti nya.

¹¹Mindhe-ndhe nya idut minyei dima bindei yok. Keledai bigbehei nya idut minyei dima ba, idut cug inggobiausi.

¹²Ha nya cem itot yaham ei biei ninggrupti nya simiak minyei ba, ighyet ei nimeng nggrousi nya.

¹³Apinak biget di but kwei leu mpia-bbed him ei nungug tou nyati lene abindei dihyei bimpung tut mun di kei nya.

¹⁴Abindei ba, minta susti kieng kep dihyeisi binok njita mem mindhe-ndhe nihyen kep nya kin njita ninyeng hagom mem tungwatu nya cem igyem kep inggum. Lene bon yoni igyai miai ba,

¹⁵ita ba anggur bidut ningei di bindei di ingon kei bibor. Ita biei zaitun bipot ningei di bindei bingon llei bibor. Igyai miai ba, ibiyai njita di igyem di biyai nisindemti biyok.

¹⁶Mpia but nok gi dem mem TUHAN de biei nya kin buom nya di Noni ta ei minu Libanon.

¹⁷Ha nya itot yaham ei ninda nyati lene kindus mbrei nya itot yaham ei mbigdip nya.

¹⁸Kambir bigbehei nya ibong bidem mbigdip nya. Minmei mbrei nya iku yo nyahan ei bor behei sir pimbien.

¹⁹Apai tes bed mmun di biang mpia ngei kin mpia ndot. Mpia njap cem kimbas dem igbit nituti di ando ei su.

²⁰Apai tes mmun leu binhyepo mindhe-ndhe bigbehei ilus-lus nyen mem nidinditi.

²¹Mindhe singa di nehen pap nya igyau tirigi inggok mun di igyem di Allah tin ei mem yok.

²²Ingkwei hanyen mem njap bigyoti bibong nyahan ei yaham di iku yok eisi.

²³Mpe dima lene tungwatu nya ikiju bikinyon ei ide midyaiti bigyai kep midyai dima kikau ug bipek mmunti.

²⁴TUHAN e, aba angon di ki bipai tes mun nyeng mang bibor. Dihyeisi dini mpung tut Ade nipai testi nya.

²⁵Muk ndigsi bon nijeisi kin ninyanti di jei bibor. Ade mindhe-ndhe di apai tes nya nindig kin nimien di bit bon ikwop nimangti kan bi nya ibong bidem minyei jou ba,

²⁶ kibar minyei nya piar ei minyei ngwa dip. Mindhe naga Lewiatan di apai tes cem kek-kek nyen ei muk jou.

²⁷Mun dini yok hagom itou kep Na di TUHAN lewo akwas njita tut yok dem igbit nituti.

²⁸Akwas njita tut yok leu api imbus bijo keyam. Atin ei mun di igyem kep nya leu api igyem kep inggum ba, inghop mpung tut.

²⁹Tirigi akiek anghim bak mindhe-ndhe nya lene ittin nindig bibor. Tirigi ayai innei leu ihwap nsi lene imai bingkwei hanyen biyuug ei dihyei ndungti hanyen nok gi nipousi pima.

³⁰Noro tirigi ahi innei ei ihwap nsi lene igyaijo hanyen. Abindei ba, mun di jo dihyeisi dini bep bidem ninyeng hagom.

³¹Dijoi sut gima TUHAN de nikei-kau-keisi jo ninno bijo kikau ba, ningon llei sut mun di Noni pai tes nya hagom!

³²Noni tou kep dihyeisi dini nggilun bibindei ba, ugwa-kwei. Noni ngget nungug him bibindei ba, hum mmup brou leu nimbigdip nya.

³³Diba doia binggei sut TUHAN kikau ug bipek diyaijo ningwig honti. Dinggei sut ditde Allah kikau tirigi dingat rin ei dihyeisi dini.

³⁴Dijoi sut gima Noni joi sut doia di tibim ei duhui him lewo Noni bindei ba, dingon llei bibor.

³⁵Nna ba, yo di ibon kep sisar ipror bingwig leu dihyei ninjek dip ba, yo di isibut nya isar bihigom. Dinnei e, ma anggei sut TUHAN! Jikwei ba, inggei sut TUHAN!