Read Hatam MAZMUR 105 Bible Online

MAZMUR 105 - Hatam bible

MAZMUR 105

¹Jikwei ba, ipai sigyo bak TUHAN bisimbot dat ninyeng di jei bibor cem. Ma itri tut nide midyai nya bak ngkiai nya.

²Jikwei ba, ipai doia nibinggei sut TUHANti. Ipui sut Nide midyai di bibon ninggap leusi nya.

³Noni ne TUHAN di ninyeng jei ri. Jikwei ba, ingon llei bibor lewo Noni nyeng tut nye. Ma yo di ikuk yok biNoni ingon llei bibor.

⁴Jahara Noni apino Noni misindem tut je. Ma jikuk je biNoni bijo ninno bijo kikau.

⁵He, je di jintun Abraham di TUHAN de awak pima him kin je di jintun Yakub di Noni dimig ei su pima him e,

⁶ma jiyok ngon kep Nide mindur di bibon nya. Ma jingon prion ser Nide nikos tutti nya au.

⁷TUHAN ne ide Allah rin ba, nide nikos tutti nya kieng kep dihyeisi dini hagom.

⁸Noni yok ngon kep gi preu di Noni preu ei mem nye bijo ninno bijo kikau. Ningon miprion ser gi preu dima hanyen bi sren.

⁹ Noni preu ei bit Abraham kin Ishak cem.

¹⁰ Noni ndat kep gi preu dima bak Yakub. Nide gi preu mijo ninno bijo kikau mem mben Israel.

¹¹Noni preu ei mem noni “Midiyai minu Kanaan bina leu api ade nintun nani him di bram nani nya minyeng tut minu dima yo.”

¹²Nipou ne Allah de limwa nya ibong ingkiaisi ei minu Kanaan ba, imangti ibou poi he.

¹³Ibong-bong nyen bit ngkiai nya ba, ipri leu minu hi ug ei minu hiter bu.

¹⁴ Noro TUHAN sindui sut ba, ngkiai nya yoom kep Nide limwa nya bi. Noni nyohou yok bisok kep nibou ndig ngkiai nya bipai biyok,

¹⁵“Ma jihwen bit Ditde awak di dimig ei su nya ba, jimbuk tut Ditde nabi nya cem au.”

¹⁶ TUHAN sindui sut ba, ninggum nindig bibor hwen yok ba, ide njita hagom ngwig leu yok.

¹⁷ Noro Noni pinak tungwagom bibie mem yok ba, no dima ne Yusuf di nikindig bat nya itri nok awak bibie ri.

¹⁸ Ngkiai nya iba lante bikri kep nimigya. Iba ngkimom nitu biteu nikimam kikau,

¹⁹bibou nimbot kep nihyetti di noni tri tut dem igbit ug e. Lewo TUHAN nihyet ndo brei bipia Yusuf ningon sren.

²⁰ Lene nibou ndig minu Mesir di ninyeng tak kep mben mang bibor kes Yusuf leu ig bui nsi ba,

²¹ ta noni nok nibou di ninyeng tak kep limwa nya kin no di nyohou dimig midyai bidem minu Mesir nisurti-nipekti cem.

²²Noni krau kep midyai di ninyeng tak kep yo di igya kui nibou ndig ba, yai nisindemti mem gima pingok yo di ingon ki nya ingonti cem.

²³ Leu api Yakub ug bong nok ngkiai ei minu Mesir.

²⁴ TUHAN bindei ba, nide limwa nya idigek kep mpia ba, isindem biborti dor njiriek ide siceu nya.

²⁵TUHAN sindui sut ba, mben Mesir ingon mpo tut Nide limwa nya ba, iba ingon di mang biyai Nide awak nya.

²⁶ Noni pinak Nide awak di Musa kin Harun di Noni dimig yok ei su nya.

²⁷Iba nisindemti di igyai leu TUHAN bibon mindur nya kin mimbrei cem ei minu Mesir.

²⁸ Yo cin dima igyai igbit Allah nicuk yoti. Leu api TUHAN kes nidinditi di dindi-kai binggai kep minu Mesir nisurti-nipekti.

²⁹ Noni bindei minyei di ide nya hagom nggrom apino wau nya hagom mai bingwig.

³⁰ Noni bindei bu ba, ugwaham di sider wap nya ngwig kep minu Mesir kin nibou ndig de ig cem.

³¹ Allah cuk kros kin amihip nya bigyem pia ei minu dima nisurti-nipekti.

³² Noni kes biget es di mbras nok tig njep biluei biget bibindei ba, kigyei ninjeng srei.

³³Noni cok tut ide ba anggur kin biei zaitun kin biei nindigsi nya hagom bingwig.

³⁴ Noni cuk hai ceng nya bisider wap bingwig ei minu Mesir. Bit bon hi kwop hai ceng dima imangti kan bi.

³⁵Apino hai ceng nya igyem mahai meng kin njita beisi hagom ei minu dima.

³⁶ Noni bindei ba, munggwom pinai mighumbou ei mben Mesir ide ig bei nsi nya yahagom imai.

³⁷ Gima yok hagom leu lene Noni hei sut mben Israel leu minu Mesir bimbut tut ndigban perak kin mas. Yahagom inghuisi kwes ba, isindem bibor cem.

³⁸Tirigi mben Israel ikes yok bimbut leu yok tu lene mben Mesir ingon nggan-triot kei lewo ittin tut yok.

³⁹ Allah bindei ba, bumbuhui tou gom yon gau nide limwa nya ba, cou hum piga digai ide prak meng yati mem mmun cem.

⁴⁰ Yahara Noni leu api Noni pinak ha dumti nya kin njita di cut kwei leu mpia-bbed him cem ba, igyem kep inggum.

⁴¹ Noni bindei ba, bor ki leu minyei di biam sindem nok minyei pmem ei iggum ndigsi.

⁴²Noni yok ngon kep gi preu di kwes-kwau di Noni preu ei mem Nide awak di Abraham.

⁴³Leu api Noni buwak Nide limwa di Noni dimig ei su nya ba, iba ingon di llei bibor bipai doia bimbos-hi mbos.

⁴⁴Noni yai ngkiai nya ide minu bak Nide limwa nya apino igyai ide miai nya ba, ima bou yok nok ide dihyei ninda rom,

⁴⁵leu binhyepo Nide limwa nya mibit Nide niggai serti nya bice tut Nide nicuk yokti nya cem. Jikwei ba, inggei sut TUHAN!