Read Hatam MAZMUR 109 Bible Online

MAZMUR 109 - Hatam bible

MAZMUR 109

¹Doia Daud mem no di bie tut doia nimpung. Allah di dikon-kon nyen anyeng e, ma agwam ba, ammou hak au.

²Lewo yo di isibut kin niris kep mun cig di itri tut mumpui hyet di igbit bi tut da nya ikwei yon ttai da.

³Igyon ttai da ba, ighyet mpung tut ningon sibui sut dati lene ihwen da mikui-kausi.

⁴Mbro nok gino dingon ngakei yok bidingat nadi mem yok cem lo, ipai kep dinghapti.

⁵Iba gi kinei bibuhup dikei sut yokti ba, iba ingon di sibui sut da bibuhup dingon ngakei yoti.

⁶Akon nikei di ningon mang bigwam mem gima mbus ditde nitok joti nya ingonti. Asindui sut ba, no di mbrap gau noni mipai kep noni.

⁷Nnaba nikei imbus ningonti bipai sut bipia noni bon mun tunggwei. Nnaba ibisrip huk bipia nide nadi di ngat ne sisar di bon ri.

⁸ Nnaba niyaijo ngwig hon kros ug ba, hiter ya luei nohoti.

⁹Nnaba nimunggwom bat nya iwer moibihi ug ba, nitnem cem wer no kibom ug.

¹⁰Nnaba nimunggwom bat nya inok yo di itindei kep hiter indati tut njita ba, tungwatu nya ijji yok leu ig di tti di lus tu ba, ibong bas hak ug.

¹¹Nnaba no di kwei kus nide ningwam di jo bak dima pos no dima nide ndigban di nyeng tut nya hagom hak ug ba, tungwatu nya icat nide mun di com nahanggwap tut nya hagom bingwig ug.

¹²Nnaba hi ningon nggriu sut noni bingondut nimunggwom bat di mai leu yok nya au.

¹³Nnaba nide nintun him yamti di bram yam nya yahagom imai urung hak leu binhyepo nimpung munggwom di misrek ei nidipti bu ibbwe ser ninyeng ug.

¹⁴Nnaba TUHAN yok ngon kep nidigup bat-nidigai bat di nipou nya ide sisar lene bikos ser nipmem de sisar bi.

¹⁵Nnaba TUHAN yok ngon kep ide sisar kikau noro hi di yok ngon kep yo dima ei dihyeisi dini bi.

¹⁶Lewo no dima brim ningkek mem gima ngondut hiter bi sren. Noro hwen bit nuhui mbum nya kin nindwau sut mun nya biyai nimai bak yo di isindem bi nya.

¹⁷Noni krau kep nisigionti cem. Nna ba nonti tug ndei nisigion noti hak ug. Noni kou sut gi njei mun di kei bak hiter. Nna ba hiter igyai mun di kei bak noni au.

¹⁸Nisigion yokti dima ne mun di bon kep ngan-ngan noyam kin sinsun di juk ei noti ri. Nnaba nisigionti dima coi ug ei ninghuisi dem kep minyei di dut kin mini di ibidip ingkek dip.

¹⁹Nnaba nisigionti dima nggai noni noyam kin sinsun di nggai ningkekti bingot noni nok bang di bikri kep nintig bou.

²⁰TUHAN e, akes hukum dima ei no di ris mun ei da dip kin no di kin kep dinghapti dip hak ug.

²¹Noro ampu da bit leu Ade nipreu ei mem dati. Ditde TUHAN Allah e, ateu da bidingwes ngun tug hon Ade nisingatti kin Ade ningon ngakeisi cem.

²²Lewo duhui mbum ba, niwei om kep da cem ba, dingon bok kikau ug ei dingon mien.

²³Mbigom midisar nok ningwes ei mpia mmunti. Didem kep hai ceng di hou cok tut bingwig.

²⁴Niyem njita bi mem nituti poi lene gima bindei ba, dibiau digit. Dikrin-krau ba, dinggang bai bidikinei-kinau cem.

²⁵ Yo di ingat da ingwes om da ba, ibikit-kit nyen ibou tut da cem.

²⁶Ditde TUHAN Allah e, ampu da ba, ateu da bidingwes ngun tug hon angon ngakeisi.

²⁷Leu api siceu di ingwes om da mikan tut bipia gima ne Ade niyai munti rin ba, Na di TUHAN rino ayai nok gima.

²⁸Mbro nok gino isigion da lo, ma akwas mun di kei tut da. Mbro nok gino ikiju lo, abindei ba, igwam nimmaiti. Noro ma ayai ningon di nggei-hi-nggei bak Ade awak di dani.

²⁹Nna ba siceu nya inyeng di kinei kieng kep yok ba, nimmai nggai kep yok noyam kin sinsun ndok di jei di nijeisi pek imig ggom di nggai yok.

³⁰Midiba dihyet ndig binggei sut TUHAN biditri tut ninyeng di jei mpe dino Nide limwa nya idem yam ei ig mbusyamei,

³¹lewo Noni mbrap gau yo di yuhui mbum nya ba, teu yok bingwes ngun leu yo di ikes hukum nimai ei yok dip nya.