Read Hatam MAZMUR 118 Bible Online

MAZMUR 118 - Hatam bible

MAZMUR 118

¹Jikwei ba, ipai sigyo bak TUHAN lewo Noni singat tut nye ba, ningon ngakei nyeti ug hon nohonti bi sren cem.

²Je di mben Israel e, ma jipai “TUHAN de ningon ngakei nyeti ug hon nohonti bi sren.”

³Je di nimpung imam nya e, ma jipai “TUHAN de ningon ngakei nyeti ug hon nohonti bi sren.”

⁴Je di jikuk je bak TUHAN e, ma jahagom jipai “TUHAN de ningon ngakei nyeti ug hon nohonti bi sren.”

⁵Tirigi mun di buhun bibor cut igkep da ne dahara TUHAN leu api Noni buhup dihyet bikwek da bidiyati kwes.

⁶ Dinghuisi mpig sut mun nyeng hi bi. Lewo TUHAN Ningat rin bit da. Bit bon tungwatu nya ibibon da kinei kan bi.

⁷TUHAN ya simiak da bimpu da. Midingat ditde siceu nya icut bida bou diyai him.

⁸Niba ningon com TUHANti bon ninyeng dor njiriek niba ningon com tungwatu nyati.

⁹Gi kei rino nyende Niba ningon com TUHANti bon ninyeng dor njiriek niba ningon com yo di inyeng jeisi nya.

¹⁰Siceu nya imang bibor ingwig ttai da noro dihwen yok bicut bingwig tug hon nisindemti di TUHAN yai bida.

¹¹Yoni igya bigyon ttai da noro dihwen yok bicut bingwig tug hon nisindemti di TUHAN yai bida.

¹²Ibimbu da dem kep mimpam noro dihwen yok bicut bingwig tug hon nisindemti di TUHAN yai bida. Inok biei war di nimon lo, tirigi hum yem lene hum sror biyem war bingwig.

¹³Siceu nya ihwen da bibor ba, nahanok ma dicut bak yoni noro TUHAN mpu da.

¹⁴ Noni sindem tut da leu api dinggei sut Noni lewo Noni teu da bidingwes ngun tu.

¹⁵Ma jingig jitingou mem TUHAN de limwa nya ighyet di kui yam bingon llei ei ide prak meng yati drek dip gi yoom kep ide siceu nya. Ipai “TUHAN ba Nide nisindemti di mindur bihwen yok bingwig su!”

¹⁶Nyeni ihwen yok bingwig tug hon TUHAN de nisindemti! TUHAN de nisindemti di mindur hwen yok bingwig su!

¹⁷Midimai urung bi. Noro diyaijo leu binhyepo ditri tut TUHAN niyai munti nya.

¹⁸Noni ttem da sindem bibor noro sindui sut da bidimai drek dip bi.

¹⁹Jikau dimbou pmem ei TUHAN De Ig leu da leu binhyepo dicoi bidipai sigyo bak Noni.

²⁰Gima ne dimbou pmem nuhui di bie tut yo di ingon sren nya yongkom ug ei TUHAN Noho bei ri.

²¹TUHAN e, dinggei sut Na lewo abuhup dihyet ba, abindei dino siceu nya icut bida tu.

²² Tig mma di tukan nya ikou sut dima rinok cou nipmem di yai ninyeng jei dor njiriek tig mma nindigsi nya.

²³TUHAN bon mun dini ba, nyeni ingon llei sut nindig bibor!

²⁴Njap di ammani ne njap nibiyok ngon kep TUHAN niyai nibousi ri. Jikwei ba, illei ngwig sut nindig bibor!

²⁵ TUHAN e, ateu nye kikau biningwes ngun. TUHAN e, ayai nibindei timek nyende siceu nyati binye!

²⁶ Ma TUHAN njei mun di kei bak no di kwei tug hon Nonti ninyenga! Nye di nigwam ei TUHAN De Ig ninggei sut je di jicoi kwei.

²⁷TUHAN ne Allah rin ba, Noni singat tut nye nindig bibor. Ma jiba dui meng di jitot kwei su bikinyon ei njap nindigti ba, jibimbut tut bijibikrop ttai nimbar hum dok.

²⁸Nani ne ditde Allah rin ba, dipai sigyo biNa biditri tut anyeng jeisi.

²⁹Jikwei ba, ipai sigyo bak TUHAN lewo Noni singat tut nye ba, ningon ngakei nyeti ug hon nohonti bi sren.