Read Hatam MAZMUR 136 Bible Online

MAZMUR 136 - Hatam bible

MAZMUR 136

¹ Jikwei ba, ipai sigyo bak TUHAN lewo Noni kei-ngat-kei. Nide ningon ngakeisi jo ninghig-niker.

²Jikwei ba, ipai sigyo bak Allah Di Ninyeng Jei Bibor. Nide ningon ngakeisi jo ninghig-niker.

³Jikwei ba, ipai sigyo bak TUHAN Di Ninyeng Nindig Bibor. Nide ningon ngakeisi jo ninghig-niker.

⁴Nongkom he rino bon mindur di bibon ninggap leusi nya. Nide ningon ngakeisi jo ninghig-niker.

⁵ Noni ba ningon ki bipai tes mpia-bbed him. Nide ningon ngakeisi jo ninghig-niker.

⁶Noni ngig dihyeisi dini ei muk ngwa dip. Nide ningon ngakeisi jo ninghig-niker.

⁷ Noni bibon mun di piga mpia ei mpia-bbed him. Nide ningon ngakeisi jo ninghig-niker.

⁸Mpia njap ninyeng tak kep njap. Nide ningon ngakeisi jo ninghig-niker.

⁹Bed mmun kin ham mpia-bbed him nya inyeng tak kep mmun. Nide ningon ngakeisi jo ninghig-niker.

¹⁰ Noni yai nimai bak mben Mesir ide munggwom mighumbou nya. Nide ningon ngakeisi jo ninghig-niker.

¹¹ Noni buwak mben Israel ba, yehei leu minu Mesir. Nide ningon ngakeisi jo ninghig-niker.

¹²Noni ba ninda di sindem di mimbri kui bibuwak yok leu. Nide ningon ngakeisi jo ninghig-niker.

¹³ Noni kwas Muk Lipig hacan buut kui nai buut butnap. Nide ningon ngakeisi jo ninghig-niker.

¹⁴Noni buwak Nide limwa mben Israel ba, yuug dihip ei nite hi. Nide ningon ngakeisi jo ninghig-niker.

¹⁵Noro bindei ba, nibou ndig minu Mesir kin nide tentara nya yahagom isar muk ningwig ug. Nide ningon ngakeisi jo ninghig-niker.

¹⁶Noni bie tut Nide limwa nya ba, ite-te nyen ei iggum ndigsi. Nide ningon ngakeisi jo ninghig-niker.

¹⁷Noni bindei timek nibou ndig di mimbri kui ingkek nya. Nide ningon ngakeisi jo ninghig-niker.

¹⁸Noni yai nimai bak nibou ndig di inyeng jei nya. Nide ningon ngakeisi jo ninghig-niker.

¹⁹ Bitut Sihon di nok nibou ndig mem mben Amori. Nide ningon ngakeisi jo ninghig-niker.

²⁰ Kin Og di nok nibou ndig mem mben Basan. Nide ningon ngakeisi jo ninghig-niker.

²¹Noni kes ide dihyei ngwa dip bak Nide limwa mben Israel bigyati. Nide ningon ngakeisi jo ninghig-niker.

²²Nide awak di Israel igyai bigyati binok idihyei bu. Nide ningon ngakeisi jo ninghig-niker.

²³Mpe dino ide siceu nya ibindei timek nye lene Noni bbwe ser nye bi. Nide ningon ngakeisi jo ninghig-niker.

²⁴Noni kwek nye leu ide siceu nya inda nsi. Nide ningon ngakeisi jo ninghig-niker.

²⁵Noni yai njita bak mun di ninnei tau nuhwapsi nya hagom bigyem. Nide ningon ngakeisi jo ninghig-niker.

²⁶Jikwei ba, ipai sigyo bak Allah di ninyeng tak kep mpia-bbed him. Nide ningon ngakeisi jo ninghig-niker.