Read Hatam MAZMUR 139 Bible Online

MAZMUR 139 - Hatam bible

MAZMUR 139

¹Doia Daud mem no di bie tut doia nimpung. TUHAN e, ayok atta kep da ba, akan bidem tut dingonti kin dingut cem.

²Akan bidem tut diyai munti nya hagom. Mbro nok gino angat rin ei minu ting bibor leu da lo, akan bidem tut dingon kanti nya.

³Akan bidem tut dimbutti nya kin nijam di dibong dibongti cem. Akan bidem tut diyai munti nya hagom.

⁴Nipou tirigi dimbrap bigyo lo, akan bidem tut mun di mitibim ei duhui him.

⁵Angat rin bikrop ttai da ba, aba Ade nisindemti biya srak ko hagau da cem.

⁶Bit bon dingon dorti tut angon kanti nya di bitut da kan bi lewo hagom jut bibor.

⁷Duug ei sirigitou leu binhyepo dinang leu Angat i? Duug ei sirigi tou leu binhyepo dingwes ngun leu Aho bei i?

⁸Gino dikui ug ei gwamti lene midingat Angat ei sirima. Gino dijuk ug ei nimai nya ikieti bidibong ei sirima lene Angat rin ei sirima.

⁹Gino didimba kikau binjiriek mpia nipriti bidigwam ei bei mpia nikimbasti di ting bibor lo,

¹⁰Angat rin ba, ampu da ba, abie tut da ei sirima.

¹¹Mbro nok gino dahara nidinditi binggai kep ser da bidahara nipigati di piga digai da binok mmun mau lo,

¹²nidinditi dima dindi bou ayai him bi lewo mmun mau piga kei dem kep nok mpia nicomti ba, nidinditi kin nipigati hacem noyam bou ayai him.

¹³Apai tes ditde nimbumbati nya hagom leu api aba hagom bicim yamti ei dipmem ninghopti.

¹⁴Dipai sigyo biNa lewo apui ahyet tut da bidinok mindur di abibon! Dikan tut bipia Ade midyai nya hagom kei bibor kei ba, bibon ninggap leusi cem.

¹⁵Tirigi apai tes dinjum ba, aba hagom bicim yamti ei dipmem ninghopti ba, dibindig nut ei sirima nding leu tungwatu nya igyai him noro hagom jo nibreisi mem Na.

¹⁶Angat danti njem-nnei nipou tirigi dingat rin ei dipmem ninghopti bigyo. Apas kep ditde njap nijeisi ei Ade daptarti nipou tirigi noni srek tut da bidikinyon eisi bigyo.

¹⁷Allah e, nggruk bibor mem dikan tut angon kanti nya. Bit bon tungwatu nya ikwop angon kanti nya nimangti kan bi!

¹⁸Gino didem mem gima dikwop angon kanti nimangti ne nimangti dor njiriek iggum di bigbibor nimangti. Tirigi dida diyai dibinut bu bidikan-kan nyen tut Nani.

¹⁹Allah e, nnaba akes hukum nimai ei yo di isibut nya dip. Nnaba ajji yo di imbuk nya ug ei minu ting bibor leu da hak ug!

²⁰Yoni ipai Nani kinei bibor ba, ighyet wer mpiahi tut Ade minu ndig nya cem.

²¹TUHAN e, dingon mpo tut yo di ingon mpo tut Na. Dingwes om kep yo di yaham imbuk kep Na!

²²Dingon mpo tut yok nindig bibor. Dibibon yok nok siceu nya.

²³Allah e, anggok tut dingon mien. Ambus dingonti ba, asigbou da cem leu binhyepo angon dorti tut dingon kanti nya.

²⁴Aput ser sisar di dikan tut bi nya di jo ei dingonti. Ma abie tut da kak puig di ug hon nohonti bi.