Read Hatam MAZMUR 144 Bible Online

MAZMUR 144 - Hatam bible

MAZMUR 144

¹Doia Daud. Ma jikon TUHAN di ya srak ko hagau da ninyenga! Noni pingok da tut nihwen munti bingginau da tut nikon pranti.

²Noni ne No di mpu da kin No di ya srak ko hagau da kin No di teu da bidingwes ngun kin mpia di diya coi nya ri. Noni nyohou da binok mpia di dinang coi lene bindei ba, ngkiai nya ibou cut bida.

³ TUHAN e, apo tungwatu ne mindei rin i? Apino bitig dino angig ayai kep noni i? Apo no di bindei dino angig ayai kep noni dima ne tou rin i?

⁴No dima dem kep ninnei di tau nuhwap nsi kin ningwes di kigyei he.

⁵TUHAN e, akau Ade mpia-bbed him ba, ajuk kwei ba, angget nungug nya leu binhyepo nimmup brou bikui.

⁶Acom Ade kigyei kep Ade siceu nya leu binhyepo abintek gimahap yok binang. Akri Ade tibor ba, akes igkep yok leu binhyepo idrui sut.

⁷Asu anda kwei leu gwamti ba, ateu da bidingwes ngun leu minyei di su. Ateu da bidingwes ngun leu ngkiai nya inda nsi.

⁸Yo dima ipai-pai wai biris mun igkei ba, iba neheng boom biei kep nikei nya cem.

⁹Allah e, apingok dingonti tut doia nijep ba, dikek nggong mbrei tirigi dipai doia dima biNa.

¹⁰Abindei ba, nibou ndig nya ibindei timek ide siceu nya ba, abikwek Ade awak di dani cem.

¹¹Abindei bidingwes ngun leu siceu di isibut bibor nya ide singau simeda ninggwenti. Ateu da bidingwes ngun leu mben ngkiai di ipai-pai wai di iris mun igkei ba, iba neheng boom biei kep nikei nya cem inda nsi.

¹²Ma asindui sut ba, nyeni nipmot bat nya idem kep ndia kioi di hei bindig nut mem nijam di ipilei ug. Ba, nipmisop bat nya idem kep dihim di ubbu ngat di ibimau ig nibou ndig de nuhuisi nya.

¹³Asindui sut ba, nyende ig gudan nya mpung tut ningat ninyeng hagom ba, domba ngot di igya sus ndigsi nya cem ibep ba, imangti ug ei ningot sribu-ribu.

¹⁴Asindui sut ba, nyende sapi nya nimangti kum eisi kikau lene hi di pror ba, nipmot tis bi cem. Asindui sut ba, nimiap nahara niweisi kak puig ngot di jo bidem nyende minu ndig bi.

¹⁵Mun dini yok hagom mibindei ba, mben dima ingon nggei-hi-nggei. Limwa di ide Allah ne TUHAN rin cem mingon nggei-hi-nggei!