Read Hatam MAZMUR 145 Bible Online

MAZMUR 145 - Hatam bible

MAZMUR 145

¹Daud de doia nibinggei sut TUHAN. Ditde Allah kin ditde Nibou Ndig e, miditri tut anyeng di jei bidipai sigyo biNa bijo ninno bijo kikau.

²Dipai sigyo biNa bikwop mmun-njap bidinggei sut Na bijo ninno bijo kikau.

³TUHAN ninyeng jei bibor. Gima rino ma tungwatu nya inggei sut Noni nindig bibor. Bit bon nye di tungwatu ingon dorti tut ninyeng jeisi kan bi.

⁴Tungwatu nya mitri tut Ade midyai di mindur nya bak ide nintun him yamti di bram yam nya sindam bitri tut mimbri di kui angkek cem.

⁵Yoni misimbot kep biyam tut Ade nikei-kau-keisi kin anyeng jeisi cem. Midikim mbrap tut Ade midyai di mindur nya.

⁶Tungwatu nya misimbot kep biyam tut ayai munti di sindem bibor nya. Dani cem miditri tut anyeng jeisi.

⁷Yoni mitri tut Ade nisingat tut nyeti biba doia bikiek angon sren-srausi.

⁸TUHAN ningon ngakei tungwatu nya ba, ngondut yok cem. Ningon sibui sut yok haninyai bi ba, ningon ngakei yokti ug hon nohonti bi sren.

⁹Noni singat tut tungwatu nya yahagom ba, ningon nggriu sut mun di Noni pai tes nya hagom.

¹⁰TUHAN e, mun di apai tes nya hagom minggei sut Na. Ade limwa nya yahagom mipai sigyo hanyen biNa!

¹¹Yoni misimbot kep biyam tut Ade ninyeng tak kep limwa nyati di kei-kau bipui sut ade nisindemti,

¹²leu binhyepo tungwatu nya yahagom mikan tut Ade midyai di mindur nya kin Ade ninyeng tak kep limwa nyati di kei-kau cem dia-diau kei cem.

¹³Ade ninyeng tak kep limwa nyati jo ninghig-niker. Ade nisindemti ug hon nohonti bi sren. TUHAN ningon gom biyai igbit nipreu eisi nya hagom. Noni ba ningon di nggriu sut nye biyai Nide midyai nya hagom.

¹⁴Tirigi mun di buhun bibor cut igkep tungwatu nya ne Noni mpu yok. Noni mikon yo di icut nya buusap yok.

¹⁵Mun di ninnei tau nuhwap nsi nya hagom igyok ingon mem Na di TUHAN lewo akwas njita kin mikwau tut yok dem igbit nijama.

¹⁶Akwas njita di isuar nya nok gi dem tut yok leu api yahagom igyemti dem mem yok.

¹⁷TUHAN ba ningon di sren kin ningon di nggriu biyai kep Nide midyai nya hagom.

¹⁸Noni kwei ya kui yo di yahara Noni kin yo di iba ingon gom bingat nadi biNoni cem.

¹⁹Noni miyai mun di indwau sut nya bak yo di inggei sut Noni. Noni ngig nitingou mem ighyet tirigi yahara Noni apino Noni teu yok bingwes ngun.

²⁰Noni miya srak ko hagau yo di ingon ngakei Noni yahagom. Noro bindei timek yo di isibut nya.

²¹Dinggei sut TUHAN kikau. Ma Nide mun di pai tes nya hagom inggei sut ninyeng di kwes-kwau bijo ninno bijo kikau.