Read Hatam MAZMUR 146 Bible Online

MAZMUR 146 - Hatam bible

MAZMUR 146

¹Anggei sut TUHAN! Dinnei e, anggei sut TUHAN!

²Midinggei sut TUHAN mem nijam di diyaijo dini bidipai doia nibinggei sut Allahti tirigi dingat rin ei dihyeisi dini.

³Ma jiba jingon com nibou dihyeisi dini nya ide nisindemti au. Lewo tungwatu nya isindem mem gima iteu je bijingwes ngun kan bi.

⁴Leu gino imai lene ingut ngkwei hanyen ug ei dihyeiti. Ingon kanti kin ide nikos tutti nya hagom sar bingwig mem njap di imai dima.

⁵No di ba ningon com Yakub de Allah binok nide TUHAN Allah di mpu noni ne ningon nggei-hi-nggei.

⁶ Noni ne Allah di pai tes gwamti kin dihyeisi kin muk ndigsi kin mun di joti nya cem rin ba ningon gom bijo ninno bijo kikau.

⁷Noni mbrap gau yo di ide siceu nya ico kep yok nya ba, kwas njita tut yo di yuhui mbum nya. TUHAN kwek yo di isima nya ba, igyati kwes,

⁸lene bindei ba, yo di igyai tu nya igyai da bingat mpia hanyen. Noni kon yo di icut nya bikiju hanyen ba, ngondut Nide limwa di ingon sren nya.

⁹Noni nyohou mben ngkiai di ibong timiei bit nye nya bimpu kibom nya kin moibihi nya noro bindei ba, yo di isibut nya ingon kanti kin ide nikos tutti nya pek kep bi.

¹⁰TUHAN ne Nibou Ndig bijo ninno bijo kikau ri. Je di timiei Sion e, jide Allah ninyeng tak kepti jo ninno bijo kikau. Ma jinggei sut TUHAN!