Read Hatam MAZMUR 147 Bible Online

MAZMUR 147 - Hatam bible

MAZMUR 147

¹Ma jinggei sut TUHAN! Ninggei sut TUHANti ne kei bibor kei ba, nipai doia nibinggei sut Noniti bindei ba, ingon kei bibor!

²TUHAN miwin kep minu ndig Yerusalem bibuwak yo di isima ei ingkiaisi nya hanyen kwei.

³Noni bindei ba, yo di ingon cut bihigom leu su nya ibrim ingkek hanyen. Noni ngot kep ibokti nya.

⁴Noni pai igbit ham mpia-bbed him nya nimangti biyai ninyeng bak hagom.

⁵Ide TUHAN nindig bibor ba, mipbor ngat cem. Bit bon nyeni ingon dorti tut Nide ningon kiti di ug hon nohonti bi kan bi.

⁶Noni kon yo di ide siceu nya ico kep yok bikiju hanyen noro dram yo di isibut nya binok tig di ndung-diem ug ei dihyeisi.

⁷Ma jiba doia binggei sut TUHAN. Jiba nggong mbrei bikon ide Allah ninyenga.

⁸Noni ne No di ba bumbuhui bijun mpia-bbed him rin ba, tin ei biget mem gima but kwei ei dihyeisi lene bindei ba, mintu-minta hei ei nungug tou nya.

⁹Noni kwas njita tut mindhe-ndhe nimuhup tu nya kin miniwou nimien di dwas-dwas nyen cem.

¹⁰TUHAN ngat ningwes ei kuda di sindem kin tentara di mimbri kui ingkek nyati bi.

¹¹Noro ngat ningwes ei yo di ingon gom tut Noni kin yo di iba ingon com Nide ningon ngakeisi di ug hon nohonti bi sren nya.

¹²Minu ndig Yerusalem e, ma anggei sut TUHAN! Sion e, ma anggei sut Ade Allah!

¹³Lewo Noni bindei ba, jide dimbou pmem nya hagom nddong kei binjei mun di kei bak ade timiei nya.

¹⁴Noni nyohou ade minu niya kwas yamti leu binhyepo jibong kei jigwam kei kikau lene bindei ba, ade ig gudan mpung tut gandum nitu di kei bibor.

¹⁵Noni sok nihyet kwei ei dihyeisi dini leu api dihyeisi dini yai igbit nisokti.

¹⁶Noni bindei juk es nok binggum mbrei lene krau nggou di kingkrai yam bigimahap nok atriem ndung di igimahap.

¹⁷Noni bindei cut biget es di mbras nok tig njep ba, bit bon hi di ya hek biget es dima kan bi.

¹⁸Noni ba nicukti bibindei ba, biget es jet hanyen. Noni bindei ba, hou nimig kui leu api minyei pmot nya cem biam bram.

¹⁹Noni tri tut Nide nisok kep yokti bak Nide limwa nya bisok tut nimbrap tutti kin niggai serti nya bak Nide limwa di dimig yok ei su nya.

²⁰Noni bibon ngkiai nya hi nok gima bi sren. Yo dima ikan tut Nide niggai serti nya bi. Ma inggei sut TUHAN!