Read Hatam MAZMUR 148 Bible Online

MAZMUR 148 - Hatam bible

MAZMUR 148

¹Jinggei sut TUHAN! Jikwei ba, inggei sut TUHAN! Je di gwamti e, ma jinggei sut TUHAN! Je di jibong ei ginyo kug e, ma jinggei sut TUHAN!

²Je di malaikati nya e, ma jahagom jinggei sut TUHAN! Je di tentara gwamti e, ma jahagom jinggei sut TUHAN!

³Mpia njap kin bed mmun e, ma jinggei sut Noni! Ham mpia-bbed him di jimjit nya e, ma jinggei sut Noni!

⁴Mpia-bbed him di jo anai e, ma anggei sut TUHAN. Minyei di jo nuhu kwei ei mpia-bbed him[32] e, ma anggei sut TUHAN.

⁵Nna ba mun dima yok hagom inggei sut TUHAN lewo Noni pai tes mun nyeng hagom tug hon nicukti nya.

⁶Hagom jo nijoti tug hon nimbrap tutti. Bit bon hi son leu nijoti kan bi.

⁷Je di jibong ei dihyeisi dini e, ma jinggei sut TUHAN. Je di sroi ei muk jou kin muk ndigsi,

⁸kin kigyei di srei kin biget es di mbras nok tig njep kin es di kingkrai yam kin bumbuhui kin hou di nimig ten bibor di bit TUHAN nicukti e, ma jinggei sut TUHAN.

⁹Nungug tou kin mbigdip nya kin biei di ngat ningat nya kin bigbehei nya,

¹⁰kin mindhe-ndhe di tungwatu nya ipijuk kan kin mindhe-ndhe di niten-pos nya kin mun di srei ei dihyeisi kin ha nya hagom e, ma jinggei sut TUHAN.

¹¹Je di nibou ndig nya kin jide limwa nya jahagom kin nibou di inyeng jei nya kin nibou nindigsi nya,

¹²kin sop gwam nitta pilei nya kin pinai pilei nya kin andigpoi nya kin munggwom nya e, ma jinggei sut Noni.

¹³Nna ba yoni yahagom inggei sut TUHAN! Lewo ninyeng jei dor njiriek ninyeng nindigsi nya hagom. Nide nikei-kau-keisi kieng kep mpia-bbed him kin dihyeisi dini.

¹⁴Noni ribindei dino Nide limwa nya inok mben di isindem bibor leu binhyepo Nide limwa di ningon kieti nya minggei sut Noni. Jikwei ba, inggei sut TUHAN!