Read Hatam MAZMUR 17 Bible Online

MAZMUR 17 - Hatam bible

MAZMUR 17

¹Daud ngat nadi. TUHAN e, angig atingou mem dihyet tirigi dingat nadi tindei ningon di sren-srausi hak. Ahati tut nadi di diba dingon sren bingat.

²Na di akan mun di igbit e, aya srak ko hagau da drek dip ditde munhyet hak ug.

³Tirigi ambus dingonti ba, akwei ngig ayai kep da mem mmun lene angat bipia dingon sren-srau. Ditto ei bidanti bipia midiyai mun tunggwei tug hon dihyet di tibim ei duhui him bi.

⁴Diyai kep Ade nicuk dati nya noro digiyai bram yo di isibut nya igyaisi nya bi.

⁵Didimig diyaijoti ba, dibibit mun di ando bida lene dite leu bi sren.

⁶Allah e, dahara Nani lewo abuhup dihyet ninno tu. Gima rino angig atingou mem dihyet ba, amiap kep ditde nadi.

⁷Ando tut ade ningon ngakeisi di bindei ninggap leu sutti a. Lewo ateu yo di igwam coi Nani ba, ingwes ngun. Nok gino ide siceu ipi bihwen yok lo, yo di igwam kui Na ingon jo nyahan.

⁸Anyohou da dem kep nok anyohou Nanti ayai njep. Aku da nyahan ei anyehei behei,

⁹bidiya coi leu yo di isibut nya. Ditde siceu di igyok ingon gom mem gima igyai nimai bida nya igyon ttai da.

¹⁰Ikan tut ningondut tungwatu nyati bi ba, iba illei-llausi bimbrap.

¹¹Itindei ser bihwen bit da. Igyon ttai da binggok nikwesti mem gima injei da ug ei dihyeisi.

¹²Idem kep mindhe singa di ibriug da kin mindhe singa nipmot bo di bong nyahan ser puig nghas ei nindingti.

¹³TUHAN e, akiju! Ahwen ditde siceu nya ba, acut yok. Aba Ade singau simeda biteu da bidingwes ngun leu yo di isibut di imbuk tut da nya.

¹⁴Akwek da leu yo di inyeng tut ndigban nyeng hagom bit leu ijoi sutti ei dihyeisi dini inda nsi. Akes hukum ei yok dip tug hon mun di buhun bibor di atin ei mem yok ba, akes hukum dima ei yo di intun him yok nya dip cem.

¹⁵Noro midingat Na bou diyai him lewo diyai mun tunggwei hi bi. Mpe di dikiju leu dibong eisi lene dingon nggei-hi-nggei lewo Angat rin bit da.