Read Hatam MAZMUR 18 Bible Online

MAZMUR 18 - Hatam bible

MAZMUR 18

¹TUHAN de awak di Daud pai doia dini bak TUHAN ba, bikiek mpe di po TUHAN kwek no leu Saul kin nide siceu nindigsi nya inda nsi pima. Doia dini mem no di bie tut nimpung doia.

²TUHAN e, dingon ngakei Na. Nani ne ditde nisindemti ri.

³TUHAN nok tentara nibousi di sindem bibor di igya coi binok mpia di diya nding. Ditde Allah nok bor ngug di digwam coi. Noni ne mun di ibipukep tibor ninggwenti nya di kieng ser da rin ba, nyohou da leu binhyepo dibong kei digwam kei bit Noni.

⁴Dipai sigyo bak TUHAN! Lewo mpe di po dahara Noni pima ne Noni kwek dani leu ditde siceu inda nsi.

⁵Bon nya di srou da ug ei minu nimai nya ide yon ttai da. Muk ngei di bindei sar da tti nindig bibor biyon kep da.

⁶Mun di suwok ei minu nimai nya ide yon ttai da. Minu nimai nya ide di nok kau mbrei jo doho bei.

⁷Dingat rin ei mun di buhun tak dati bibor. Gima rino dahara Na di TUHAN. Dahara ditde Allah leu binhyepo Noni mimpu da. Mpe dima lene Noni gwam ei Nide Ig bimiap kep dihyet biyok nitingou kep ditde nahara Noti.

⁸Apino Allah nigga biborti bindei ba, dihyei ugwa-kwei. Dihyei bingmai ba, nungug kiou nya cem lor bibingmai.

⁹Hum mmup hei kwei leu nuhwap nsi lene hum njeng kin hum mbom hei kwei leu ninsi a.

¹⁰Noni bindei kki mpia-bbed him leu api juk kwei bico bumbuhui di dindi-kai dip.

¹¹Noni bri bigwam ei Nide kerub[8] dip bidimba tut lene dwop-dwop nyen ei hou him ninyehei.

¹²Lene ba nidinditi binggai Nonti ba, bumbuhui mpia mmou di ndok jun ttai Noni.

¹³Kigyei ei Noho bei bindei com biget di mbras nok tig njep kin hum di cut kwei bitibim bumbuhui di ndok pimati.

¹⁴Leu api TUHAN kes kru bicut kwei leu mpia-bbed him bibindei ba, nihyet tibim ug.[9]

¹⁵Noni prindei Nide tibor nya bibuhuk Nide siceu nya apino intek gimahap. Noni ba kigyei ninjeng di srei bitot-tot nyen bibindei ba, inang.

¹⁶Tirigi TUHAN ba nigga biborti bikon nihyet kep Nide siceu rino muk jou nikiou tau bijo nibreisi ba, dihyei ninghim cem kau.

¹⁷TUHAN su ninda leu anai kwei bikrau da. Noni brim da leu minyei di jut bibor.

¹⁸TUHAN teu da bidingwes ngun leu ditde siceu di isindem bibor kin yo di ingon mpo tut da nya inda nsi lewo isindemti dor njiriek da.

¹⁹Mpe di mun di buhun bibor cut igkep da ne ditde siceu nya igyon ttai da bihwen da. Noro TUHAN mpu da,

²⁰bikwek da leu mun di nahanok micut igkep da. Noni teu da bidingwes ngun lewo joi sut da.

²¹TUHAN singat tut da lewo dibon mun di igbit. Noni kwas mun di kei cem tut da lewo diyai mun tunggwei bi.

²²Dibit TUHAN nicukti nya. Digikiek doho tai leu ditde Allah bi.

²³Dibit Nide nikos tutti nya hagom. Digitunggwei sut nicukti nya bi.

²⁴Noni kan tut bipia mun di kinei hi rap da bi. Doom da ei minu ting leu mun di kinei.

²⁵TUHAN kan tut bipia diyai mun tunggwei sut Noni hi bi. Gima rino buhup bida tut dibon munti nya di igbit.

²⁶TUHAN e, angon gom tut yo di ingon gom tut Nani ba, asingat bibor tut yo di isingat nya.

²⁷Ando tut angon di kwes-kwau bak yo di ingon kwes nya. Noro aba nitok bak yo di isibut nya.

²⁸Ateu yo di yoom kep ingonti bingwes ngun noro acut yo di ingon jei nya.

²⁹Ditde TUHAN Allah e, atin ditde mini njeng binjeng kei ba, Ade ninjeng piga ditde nidinditi.

³⁰Asindem tut da mem gima dicok tut ditde siceu nya. Dicut ide tentara nibousi di igya coi bidiyati tug hon ditde Allah di mpu da.

³¹Allah nibon munti nya kei bibor kei. Bon nyeni iba ingon com Nide nipreu eisi nya cem. Noni dem kep mun di ibipukep tibor ninggwenti nya mem yo di igya coi Noni yahagom.

³²Lewo TUHAN Nongkom he rino Allah. Allah Nongkom he rino ya srak ko hagau nyeni.

³³Noni ne Allah di sindem tut da bibindei ba, mun nyeng hi bigen ser ditde puig bi.

³⁴ Noni sindem tut dimig binok rusa nimig di dilleu bi. Noni cuon diyaisi tirigi dimbut ei mbigdip nya cem.

³⁵Noni ngginau da leu binhyepo dikon pran kan apino diba ditde tibor di sindem bibor bicom bisinei.

³⁶TUHAN e, anyohou dani ba, ateu da bidingwes ngun cem. Aba Ade nisindemti bahati tut da. Ayai abou tut da bidinok no di sindem bibor dor njiriek nindigsi nya.

³⁷Anyohou da apino disima ba, digicut bi sren.

³⁸Diyon igkep ditde siceu nya bidibindei timek yok. Doom da leu pran bi bibou diya kep yok bingwig ug e.

³⁹Diba yo bihwen mpia ba, igikiju hanyen bu kan bi. Bit bon igyai ideti bi ba, itti bimai ei dimig him.

⁴⁰Ayai nisindemti bida mem gima dibikon pran ba, dibicut ditde siceu nya cem.

⁴¹Abindei ba, ditde siceu nya ikiju binang leu da apino dibindei sar yo di iba nitok bida cem yahagom.

⁴²Yahara noro hi gimpu yok bi. Yahara TUHAN noro Noni buhup ighyet bi.

⁴³Ditam yok binem-nnai bidem dihyei ndung di dimbos bingwig. Dico kep yok noyam kin dico kep igkrop kak puigsi.

⁴⁴Akwek da bidingwes ngun leu nimpung di ibit Ade nicukti bi nya inda nsi leu api akon da bidinok no di ninyeng tak kep ngkiai nya. Ngkiai nya di dikan tut bi nya cem inok ditde awak bu tu.

⁴⁵Ngkiai nya ibou cut bidani. Gino imiap dicukti nya lene ice tut bibit hak ug.

⁴⁶Mimbri di kui ingkek cut leu yok leu api iba idigit-digoi behei leu ide tentara nibousi di igya coi nya.

⁴⁷TUHAN niyaijo o! Dikon ditde No di ya srak ko hagau da ninyeng o! Jikon ditde Allah di teu da bidingwes ngun ninyeng di jei o!

⁴⁸Noni sindem tut da leu binhyepo dibindei timek ditde siceu nya. Noni om ngkiai nya ei doho bei,

⁴⁹lene teu da bidingwes ngun leu ditde siceu di iba nitok bida nya. TUHAN e, asindem tut da leu binhyepo dibindei timek ditde siceu nya ba, anyohou da leu yo di imbuk tut tungwatu nya nindig bibor cem.

⁵⁰ Gima rino dikon anyeng ei ngkiai nya ikieti. Dipai doia ba, dibikon anyeng a.

⁵¹Allah sindem tut Nide nibou ndig bibindei ba, noni bindei timek nide siceu nya bibor. Allah ningon ngakei no di Noni dimig ei su kikau. No dima ne Daud kin nide nintun him yamti di bram yam nya bijo ninno bijo kikau ri.