Read Hatam MAZMUR 19 Bible Online

MAZMUR 19 - Hatam bible

MAZMUR 19

¹Doia Daud mem no di bie tut doia nimpung.

²Mpia-bbed him ndo igbit Allah nikei-kau-keisi. Niban di jun mpia ei mpia-bbed him ndo igbit nipai testi di Noni bon bou ninda him brei bak tungwatu nya.

³Mpia njap tri tut nikei-kau-keisi dini bak mpia njap di nidipti bu. Mpia mmun tri tut bu bak mpia mmun di nidipti bu.

⁴Mun dima yok tri tut nikei-kau-keisi tug hon nihyet di tibim ei nuhui him kin nugwei di nyeni imiap ei itingou nsi bi.

⁵ Noro ighyet tibim kikau ug ei dihyei nisurti-nipekti. Ipaisi tibim ug bipek minu nohon keti. TUHAN ngot ig ei mpia-bbed him mem mpia njap.

⁶Mpia njap com nimig dem kep nok pinai pilei di sindi wak nitnem lene ba ningon di llei bibor behei leu nide nghim nsi. Lene dem kep nok no di ba ningon di llei bibiyai hamem ninghuisi di sindi nimig jo kep nibinang yamti.

⁷Mpia njap kinyon ei nimbutti leu nipriti kikau ug ei nikimbasti. Bit bon mun nyeng hi ku no leu niwamti kan bi.

⁸TUHAN nikos tutti nya ne kei-kau-kei ba, sindem tut nye. Nyeni iba ingon com TUHAN nicukti nya di bindei yo di ingon mbum nya igyai ingon di ki biluei bu.

⁹TUHAN nidimigsi dima ne dem kei ba, bindei yo di yahagom di ibit nya ingon llei bibor. TUHAN nimbrap tutti nya ne kwes-kwau ba, bindei tungwatu nya ingon dor niti.

¹⁰Nikuk nye bak TUHANti dima ne kwes-kwau. Dem tut gima ikuk nye bak bijo ninno bijo kikau. TUHAN nikos tutti nya hagom igbit cem sren-srau cem bijo ninno bijo kikau.

¹¹TUHAN nikos tutti nya bon ninyeng ba, brim ingon nindig bibor leu mas di indig kep hum bipimbai kei. Gima yok nyop kei dor njiriek ahwei lon ningei di pimbai kei.

¹²Ade nikos tutti bindei Ade awak di dani dingon ki. Atin ei imuhup mem yo di ibit Ade nikos tutti.

¹³Bit bon hi ningon ngat nitunggweisi nya kan bi. Noro TUHAN e, ma akwek da leu sisar di diba dingon mbum bibon!

¹⁴Ma anyohou da ser nhyepo dibisinggre bidibon sisar ba, sisar dima ninyeng tak kep da cem au. Tug hon nisinati dima ne sisar nimap mikui dati bi ba, dingon ngun leu nipigau hanjopti.

¹⁵TUHAN e, handei kon ba, ajoi sut dihyet di tibim ei duhui him kin dikan-kan nyenti. Nani ne No di ya srak ko hagau da ba, kwek da leu sisar cem ri!