Read Hatam MAZMUR 20 Bible Online

MAZMUR 20 - Hatam bible

MAZMUR 20

¹Doia Daud mem no di bie tut doia nimpung.

²Handei kon ba, TUHAN buhup ahyet mpe dino mun di buhun buhun tak na. Handei kon ba, Yakub de Allah nisindemti nyohou na!

³Handei kon ba, Noni ba ninda di su kwei leu Nide Ig ei Mbigdip Sion bimpu na.

⁴Handei kon ba, joi sut Ade midut nibikuk na biNoniti nya hagom ba, ningon kei sut Ade midut nindig mindhe ei nimbar hum dokti nya cem.

⁵Handei kon ba, Noni yai mun nyeng di allei sut nya hagom bina bibindei ba, Ade nikos tutti nya hagom mipek kep mem na.

⁶Leu api miniba ningon di nggei bimbos-hi-bos tirigi abindei timek ade siceu nya biniba kendera bikon ide Allah ninyeng cem. Handei kon ba, TUHAN buhup igbit mun di ahara No tut nya hagom.

⁷Nogindini dikan tut bipia TUHAN yai nisindemti bak Nide nibou ndig di Nonti dimig ei su leu binhyepo bindei timek nide siceu nya. TUHAN gwam ei Nide mpia di kwes-kwau ei gwamti bibuhup nibou ndig nihyet. Nibou ndig ba TUHAN de nisindemti bibindei timek nide siceu nya.

⁸Tungwatu bihi iba ingon com ide kroba pran nya lene bihi iba ingon com ide kuda nya. Noro tut nyeni ne iba ingon com ide TUHAN Allah bitut Nide nisindemti.

⁹Yo pima mindrat mpia bicut noro nyeni mikiju bigya ngkiem kei.

¹⁰TUHAN e, handei kon ba, abindei ba, nibou ndig mibindei timek nide siceu nya. Abuhup[10] nadi di ningat ei mpe di nahara Nani.