Read Hatam MAZMUR 27 Bible Online

MAZMUR 27 - Hatam bible

MAZMUR 27

¹Doia Daud. TUHAN ne nipigati di piga digai da kin No di teu da leu sisar biyai niyaijo nijep bida cem ri. Gima rino dittin tut tungwa hi bi. Noni ne tentara nibousi di diya coi. Gima rino dinghuisi mpig sut mun nyeng hi bi sren.

²Tirigi yo di isibut nya ihwen da bigyai nimai bida lene yoni rima indrat ndiyok bikinoi ug ei dihyeisi.

³Mbro nok gino nimpung tentara nindig igyon ser da lo, didigit tut bi. Mbro nok gino ditde siceu nya mihwen da lo, midiba dingon com TUHAN kikau.

⁴Dahara TUHAN mem mun nyeng gom ngat he ba, dillei sut bipia dibong ser TUHAN De Ig tereu nok ditde nghim nsi kikau ug bipek diyaijo ningwig honti. Miduun leu nide nikei-kau-keisi ei sirima bidahara Noni leu binhyepo Noni bie tut da.

⁵Tirigi mun di kinei micut igkep da lene Noni mikieng ninyehei gau da binyohou da bidingwes ngun ei Nide Ig lewo Noni nok tring ser da.

⁶Gima rino midibindei timek ditde siceu nya di igyon ttai da bingwig. Midiba dingon di llei bibor bibon midut nindig mindhe kep humti ei Nide Ig. Midiba doia binggei sut TUHAN.

⁷TUHAN e, gino dingat nadi lene ma angig atingou mem dihyet! Ma angondut da ba, abuhup dihyet!

⁸Tirigi ahig da hwou mem gima dikuk da biNa lene dibuhup “TUHAN e, dibipbur bidihwou kuk da biNa,

⁹ma aku Nanti nyahan leu da au. Anghek da ba, akou sut da cem au. Lewo Nani rino ampu da. Allah e, ateu da leu sisar ba, ayai niyaijo nijep bida tu. Gima rino ma akes da ei au.”

¹⁰Allah e, mbro nok gino dicig-dipmem nya ikes da ei lo, anyohou da.

¹¹TUHAN e, ma apingok dingonti leu binhyepo dikan igbit tut angon kanti mem da. Abuwak da kak puig di sren kei lewo ditde siceu nya imang ndig.

¹²Ditde siceu nya iris mun ei da dip ba, ikiju bisinsam da bipai kep da cem. Noro ma akes da ei indati au.

¹³Dikan tut bipia TUHAN de mun di kei nya mipek kep mem da tirigi diyaijo ei dihyeisi dini.

¹⁴Ma ayok ngon mem TUHAN ba, akum ei ade niba ningon comti. Ma angon cut leu au. Ma aba angon com TUHAN!