Read Hatam MAZMUR 29 Bible Online

MAZMUR 29 - Hatam bible

MAZMUR 29

¹ Doia Daud. Je di Allah pai tes ei gwamti e, jinggei sut TUHAN ninyeng di jei biborti kin Nide nisindemti.

²Ma jinggei sut TUHAN di dia-diau! Ma jijuk sinsun midut di kwes-kwau leu api jibikuk je bak.[12]

³Allah di dia-diau kei ba kru bihwen muk ngwa dip lene nihyet bong muk ndigsi.

⁴TUHAN nihyet tibim sindem bibor kwei ba, nihyet dima biyai nyeni ingon di mai leu.

⁵TUHAN nihyet bindei ba, biei njem nya tti lene nihyet bindei dahat buom Libanon cem.

⁶Noni bindei ba, ngkit tot Nungug Libanon lene nungug dima pri-pri nyen nok sapi pmot ba, Nungug Siryon pri-pri nyen nok sapi pmot nikre.

⁷TUHAN nihyet bindei ba, kigyei cut lene ninjeng bitot igyaisi cem.

⁸TUHAN nihyet kit iggum ndigsi ba, Noni kit iggum ndigsi Kades cem.

⁹TUHAN nihyet bindei ba, biei berangan nya ugwa-kwei lene bindei bu ba, biei bigbehei nimeng nya cem llet bingwig. Nihyet bindei mun dima yok sri lene yo di ingat rin ei Nide Ig yahara “Jinggei sut TUHAN o!”

¹⁰TUHAN ninyeng tak kep muk ndigsi di jut bibor ba, ninyeng tak kep nok Nibou Ndig bijo ninno bijo kikau.

¹¹Dijoi sut gima TUHAN sindem tut Nide limwa nya bibindei ba, ibong kei igwam kei cem.